ކުޑަކުދިންގެ ހެދިބޮޑުވުމާ ބެހޭ ބަލިތަކަށް ޚާއްޞަވެވަޑައިގެންނެވި ދިވެހި ފުރަތަމަ ޑޮކްޓަރު ޑރ. އައިމިނަތު ފަޒުނާ މިއަދު ނިޔާވެއްޖެ އެވެ.

މައުލޫމާތު ލިބިފައިވާ ގޮތުގައި ފަޒްނާ ނިޔާވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށެވެ. ނިޔާވި އިރު ފަރުވާ ހޯއްދަވަމުން ގެންދެވީ އައިޖީއެމްއެޗުގައި އެވެ.

Advertisement

ނިޔާވި އިރު އޭނާގެ އުމުރުފުޅަކީ 47 އަހަރެވެ.

ޑރ. ފަޒުނާ ތަޢުލީމާއި ތަމްރީނު ޙާޞިލުކުރެއްވީ މެލޭޝިއާގެ ނެޝަނަލް ޔުނިވާސިޓީންނާއި އެމެރިކާގެ ޔުނިވާސިޓީ އޮފް ކެލިފޯނިއާއިންނެވެ.

ކިޔަވާ ވިދާޅުވުމަށް ފަހު ޑިވެލޮޕްމަންޓަލް ޕީޑިއެޓްރީޝަނެއްގެ ގޮތުގައި އެނބުރި ރާއްޖެ ވަޑައިގެން އައިޖީއެމްއެޗުގައި ބަލި މީހުން ބައްލަވަން ފެއްޓެވިކަން އެ ހޮސްޕިޓަލުން އިޢުލާނުކުރީ 2024 ވަނަ އަހަރުގެ އޮކްޓޫބަރު މަހުގައެވެ.

ޑރ. ފަޒުނާ ވަނީ އޯޓިޒަމާއި އޭޑީއެޗްޑީ އާއި އުނގެނުމުގެ އުނދަގޫތައް ހުންނަ ކުދިން ދެނެގަތުމަށް އެސެސްމެންޓްތައް ހެއްދެވުމުގައި މުހިންމު މަސައްކަތްތަކެއް ކުރައްވައިފައެވެ.

ނިޔާވިއިރު އޭނާގެ ދެ އަންހެން ކުއްޖަކު ދުނިޔޭގައި އެބަތިއްބެވެ.

ޑރ. ފަޒުނާގެ ކަށުނަމާދު އޮތީ މިރޭ އިޝާ ނަމާދަށް ފަހު މާލޭ އާސަހަރާ މިސްކިތުގައެވެ.