ޗައިނާގެ ދެކުނަށް މިހާރު ކުރަމުންދާ ވިއްސާރައިގަ އެ ސަރަހައްދުގައި ހުރި ހަރުފަ ވިއްސާ ފާމެއްގައި ފެންބޮޑުވެ ހަލާކުވުމުން ގާތްގަނޑަކަށް 900 ހަރުފަ އާންމުންގެ ތެރެއަށް ދޫވެފައިވާ ކަމަށް ރިޕޯޓުތައް ބުނެފި އެވެ.

ޗައިނާގެ ގުއާންގްޒީ ޒުއާން އޮޓޮނޮމަސް ސަރަހައްދުގައި ބޮޑުވި ފެންގަނޑުގައި ހެންގްޒޮއު އަވަށުގެ ގޯޅިތަކުން ހަރުފަ ދަތުރުކުރާ މަންޒަރު ފެންނަ ވީޑިއޯތައް އިންޓަނެޓުގައި ވަނީ އާންމުވެފައި އެވެ. މި ހަރުފަތައް ހިފުމަށް އެ ފާމުން 10 މީހުންގެ ޓީމެއް އެކުލަވާލައި ދާގަނޑާއި ސްޓަން ގަން ބޭނުންކޮށްގެން ދަނީ މަސައްކަތް ކުރަމުންނެވެ.

Advertisement

އެ އަވަށުގެ ކޮމިޓީގެ އިސްވެރިޔާ ވޫ ޒީ ބުނީ ފިލައިގެން ދިޔަ ގިނަ ހަރުފައަކީ ވިހަ ނެތް ފެން ހަރުފަ ކަމަށެވެ. ނަމަވެސް ފިލި ހަރުފަތަކުގެ ތެރޭގައި ނުރައްކާތެރި ވިހަ ހުންނަ ކޯބްރާ ވެސް ހިމެނޭ ކަމަށް ބެލެވެއެވެ. 

އޭނާ އެހެން ބުނެފައި ވަނިކޮށް ހޯމަ ދުވަހު ހަރުފަތައް ދޫވެގެން ދިޔައިރު ހަރުފައެއް ދަތް އަޅައިގެން އެކަކަށް ވަނީ ހޮސްޕިޓަލުގައި ފަރުވާ ދީފައި ކަމަށް ރިޕޯޓުތައް ބުނެ އެވެ. އާންމުން ވަނީ މަގުމަތީގައި ބޮޑުވެފައިވާ ފެންގަނޑުގެ އެކި ތަންތަނުން ހަރުފަ ފެންނަމުންދާ ކަމަށާއި އެކަން ބިރުވެރިކަމަކަށް ވެފައިވާ ކަމަށް ބުނެފަ އެވެ.

އެހެންވެ އެ ފާމާއި އަވަށު ކޮމިޓީން ވަނީ ހަރުފައެއް ފެނިއްޖެ ނަމަ އެކަން ރިޕޯޓު ކުރުމަށް އާންމުންނަށް އިލްތިމާސް ކޮށްފައި އެވެ.

ޗައިނާއަށް ބޯކޮށް ވާރޭވެހި ފެންބޮޑުވެފައިވަނީ ތޫފާން "މެއިސާކް" އަރައިގެންނެވެ. މި ތޫފާނުގައި އެ ސަރަހައްދުގެ 55 ކޯރެއް ބަންޑުންވެ އަވަށްތަކަށް ފެންގަނޑު ފެތުރުމުން ހިނގި ހާދިސާތަކުގައި މިހާތަނަށް 17 މީހުން މަރުވެ އެތައް ސަތޭކަ ބަޔަކު ވަނީ ރައްކާތެރި ހިސާބުތަކަށް ބަދަލު ކޮށްފައި އެވެ.

ޗައިނާގެ ގުއާންގްޒީ ޒުއާން އޮޓޮނޮމަސް ސަރަހައްދުގައި މި ތޫފާނާއި ގުޅިގެން އޮތީ ރެޑް އެލާޓު ނެރެފައި އެވެ.