ޔޫއޭއީގެ ޝާރިޖާއިން ޕާކިސްތާނުގެ ކަރާޗީއަށް ދަތުރުކުރަނިކޮށް ގެއްލުނު ކާގޯ މަތިންދާ ބޯޓުގެ ބައިތައް ފެންނަން ފަށައިފި އެވެ.

ރިޕޯޓުތައް ބުނާގޮތުގައި ފަސް މީހުންނާއި އެކު ދަތުރު ކުރަމުން ދިޔަ ޕާކިސްތާނުގެ ކޭ2 އެއާވޭސްއިން އޮޕަރޭޓް ކުރާ އެ މަތިންދާ ބޯޓު ގެއްލުނީ އަރަބި ކަނޑަށެވެ. އެ ބޯޓުގެ ނެވިގޭޝަން ސިސްޓަމަށް މައްސަލައެއް ދިމާވެގެން ރިޕޯޓު ކުރި ފަހުން އަންގާރަ ދުވަހުގެ ރޭ 9:18 ގައި އެއާ ޓްރެފިކް ކޮންޓްރޯލާ ގުޅުން ކެނޑުނެވެ.

Advertisement

ބޯޓު ހޯދުމަށް ޕާކިސްތާނުގެ ކަނޑުގެ ސިފައިންނާއި ޢާންމު ސާޗް ޓީމުތައް ގުޅިގެން ހިންގި އޮޕަރޭޝަނުގައި އިއްޔެ ބޯޓުގެ ބައިތައް ފެނިފައިވަނީ ޕާކިސްތާނުގެ އޮރްމާރާ ބަނދަރުގެ 53 ނޯޓިކަލް މޭލު ދެކުނުން ޢަރަބި ކަނޑުގެ ސަރަޙައްދަކުންނެވެ. ބޯޓުގެ ބައިތައް ފެންނަމުން ދިޔަޔަސް އެއްވެސް މީހަކު އަދި ފެނިފައެއް ނުވެ އެވެ.

ޕާކިސްތާނުގެ ރިޓަޔާޑް ރިއާ އެޑްމިރަލް ފައިޞަލް ޝާހް މީޑިއާށް ވިދާޅުވެފައިވާ ގޮތުގައި ބޯޓުގެ މައިގަނޑު ބައި އަދިވެސް ހޯދިފައި ނުވާ ކަމަށާއި އެ ހޯދުމަށް ކަނޑު އަޑި ބެލުމަށް ޚާއްޞަ އާލާތްތައް ބޭނުންވެދާނެ ކަމަށެވެ. އަދި ބޯޓުގެ އެބައިތައް ވަނީ އެ ސަރަހައްދުގެ ކަނޑުގެ ވަރަށް އަޑީގައި ކަމަށް ބެލެވޭ ކަމަށެވެ.

ޕާކިސްތާނު ސަރުކާރުން ވަނީ ފްލައިޓުން ދަތުރު ކުރި އެންމެންގެ ވަނަވަރު އާންމުކޮށްފައި އެވެ. ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ ފަޅުވެރިންގެ ޢާއިލާތަކަށް ހަމްދަރްދީ ފޮނުއްވައި ސާޗް އޮޕަރޭޝަނަށް ލިބެން ހުރި ހުރިހާ ވަސީލަތެއް ބޭނުންކުރުމަށް އަންގަވައިފައެވެ. 

ގެއްލުނު ބޯޓަކީ ކޭ 2 އެއާވޭޒްގެ ފްލީޓުގައި އޮތް ހަމައެކަނި ބޯޓެވެ. މި ފްލައިޓު އެ ކުންފުނިން ބޭނުން ކުރަން ފެށީ މަރާމާތަށް ފަހު 2024 ވަނަ އަހަރުގެ ޑިސެމްބަރު މަހު އެވެ.

އެ ބޯޓަކީ 1999 ވަނަ އަހަރު ރަޝިޔާގައި ފަސިންޖަރުން އުފުލަން ބޭނުން ކުރި މަތިންދާ ބޯޓެކެވެ.

މި ހާދިސާއަކީ 2020 ވަނަ އަހަރުގެ މެއި މަހު ކަރާޗީގައި ޕާކިސްތާން އިންޓަނެޝަނަލް އެއާލައިންސްގެ ބޯޓެއް ރަންވޭ ކައިރިއަށް ވެއްޓި 99 މީހުންގެ ތެރެއިން 97 މީހުން މަރުވި ހާދިސާއަށް ފަހު ޕާކިސްތާނުގައި ހިނގި ފުރަތަމަ ބޮޑު މަދަނީ ވައިގެ ހާދިސާއަށެވެ.