ޔޫއޭއީގެ ޝާރިޖާއިން ޕާކިސްތާނުގެ ކަރާޗީއަށް ދަތުރުކުރި ކާގޯ މަތިންދާ ބޯޓެއް ގެއްލިގެން ޕާކިސްތާނުން ހޯދަން ފަށައިފި އެވެ.

ޕާކިސްތާނުގެ އެއާޕޯޓު އޮތޯރިޓީން ބުނީ އެ ބޯޓުން ފަސް މީހުން ދަތުރު ކުރި ކަމަށެވެ. ކޭ2 އެއާވޭޒުން އޮޕަރޭޓްކުރި އެ ބޯޓުން ނެވިގޭޝަން ސިސްޓަމަށް މައްސަލައެއް ދިމާވެގެން ރިޕޯޓު ކުރި ފަހުން ރޭ 9:18 ގައި އެއާ ޓްރެފިކް ކޮންޓްރޯލާ ގުޅުން ކެނޑުނެވެ.

Advertisement

1ފްލައިޓްރޭޑާ24 ގެ ޑޭޓާ ދައްކާ ގޮތުން އެއަށް ފަހު މިނެޓެއް ނުވަނީސް ބޯޓު ގާތްގަނޑަކަށް 1525 މީޓަރު ތިރިއަށް ވެއްޓި ދެން 30 ސިކުންތު ތެރޭ 1830 މީޓަރު މައްޗަށް އެރުމަށް ފަހު 11140 މީޓަރު އުސްމިނުން ގާތްގަނޑަކަށް ސީދާ ތިރިއަށް ދާން ފެށީއެވެ. އެންމެ ފަހުން ސިގްނަލް ލިބުނީ 335 މީޓަރު އުސްމިނުގައި މިނެޓެއގައި 22400 ފޫޓުގެ ބާރުމިނުގައި ތިރިއަށް ދަނިކޮށެވެ. ކަރާޗީގެ ހުޅަނގުން 287 ކިލޯމީޓަރު ދުރުން ބޯޓާ ގުޅުން ކެނޑުނެވެ.

ރިޕޯޓުތައް ބުނާގޮތުގައި އެ ފްލައިޓުގެ ހަބަރެއް ވޭތޯ ޕާކިސްތާން ކަނޑުގެ ސިފައިންގެ މަނަވަރެއް ޕާކިސްތާން ނެޝަނަލް ޝިޕިން ކޯޕަރޭޝަންގެ ބޯޓަކާއި ކަނޑުގެ ސިފައިންގެ ދެ މަތިންދާބޯޓު ދަނީ ބަލަމުންނެވެ. މިހާތަނަށް ބައެއް އަދި ދަތުރުކުރި މީހެއްގެ ހަބަރެއް ނުވާ ކަމަށްވެ އެވެ.

ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވެސް ވަނީ މި ހާދިސާއާ ގުޅިގެން ހިތާމަ ފާޅުކުރައްވައި ގެއްލިފައިވާ ފަޅުވެރިންގެ ޢާއިލާތަކަށް ތައުޒިޔާ ވިދާޅުވެފައެވެ.

ގެއްލުނު ބޯޓަކީ ކޭ 2 އެއާވޭޒްގެ ފްލީޓުގައި އޮތް ހަމައެކަނި ބޯޓެވެ. މި ފްލައިޓު އެ ކުންފުނިން ބޭނުން ކުރަން ފެށީ މަރާމާތަށް ފަހު 2024 ވަނަ އަހަރުގެ ޑިސެމްބަރު މަހު އެވެ.

އެ ބޯޓަކީ 1999 ވަނަ އަހަރު ރަޝިޔާގައި ފަސިންޖަރުން އުފުލަން ބޭނުން ކުރި މަތިންދާ ބޯޓެކެވެ.

މި ހާދިސާގައި ބޯޓު ވެއްޓި މީހުން މަރުވެއްޖެ ކަން ކަށަވަރު ވެއްޖެނަމަ މި ހާދިސާ ވެގެން ދާނީ 2020 ވަނަ އަހަރުގެ މެއި މަހު ކަރާޗީގައި ޕާކިސްތާން އިންޓަނެޝަނަލް އެއާލައިންސްގެ ބޯޓެއް ރަންވޭ ކައިރިއަށް ވެއްޓި 99 މީހުންގެ ތެރެއިން 97 މީހުން މަރުވި ހާދިސާއަށް ފަހު ޕާކިސްތާނުގައި ހިނގި ފުރަތަމަ ބޮޑު މަދަނީ ވައިގެ ހާދިސާއަށެވެ.