ރާއްޖޭގައި ޕޯސްޓްމޯޓަމް ހެދުމުގެ މަސައްކަތް ފަށަން ތައްޔާރުވަމުންދާ ކަމަށް ހެލްތް މިނިސްޓަރު ގީލާ އަލީ ވިދާޅުވެއްޖެ އެވެ.

އެކަމަނާ މިހެން ވިދާޅުވީ މިއަދުގެ ރައްޔިތުންގެ މަޖިލީހުގެ ޖަލްސާގައި ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް ކުރެއްވި ސުވާލަކަށް ޖަވާބު ދެއްވަމުންނެވެ. އޭނަ ސުވާޅު ކުރެއްވީ ޕޯސްޓްޕޯޓަމް ހެދުމުގައި ހުރަހެއް ނެތްއިރު ދައުލަތުން ކޮންމެ ފަހަރަކު އެކަން ކުރުމަށް ރާއްޖެއިން ބޭރަށް ދާން ޚަރަދުކުރާއިރު، ރާއްޖޭގައި އެކަން ނުކުރެވޭ ސަބަބާއި، އެކަން ރާއްޖޭގައި ފަށަން ގަސްތުކުރާތޯ ނުވަތަ ނޫންތޯ ސާފުކުރުމަށެވެ.

Advertisement

މިނިސްޓަރު ވިދާޅުވީ ޕޯސްޓްމޯޓަމްގެ ޚިދުމަތް ރާއްޖޭގައި ދިނުމަށް މެޑިކަލް ޔުނިޓެއް ޤާއިމްކުރަން ކަމާ ގުޅުން ހުރި އިދާރާތަކާ ގުޅިގެން މާލޭ ސިޓީ ގްރޫޕް އޮފް ހޮސްޕިޓަލުން މިހާރު އެ ޔުނިޓު ޤާއިމްކުރުމުގެ މަސައްކަތް ކުރަމުންދާ ކަމަށެވެ. އެ ޔުނިޓު ޤާއިމްވުމުން މާލެ ސަރަޙައްދުގެ އިތުރުން މުޅި ރާއްޖެއަށް ބޭނުންވާ ކްލިނިކަލް ފޮރެންސިކްގެ ޚިދުމަތާއި މެޑިކޯ ލީގަލް އަދި ޕޯސްޓްމޯޓަމްގެ ޚިދުމަތް ފޯރުކޮށްދެވޭނެ ކަމަށް ވަޒީރު ވިދާޅުވިއެވެ.

އެ ޚިދުމަތަށް ބޭނުންވާ ބިން މިހާރު ހަމަޖެހިފައިވާ ކަމަށް ވެސް ވަޒީރު ހާމަކުރެއްވިއެވެ.

އެ ޔުނިޓު މެދުވެރިކޮށް ލާއިންސާނީ އަނިޔާތަކާއި ބަންދުގައި ތިބޭ މީހުންނަށް ލިބޭ އަނިޔާތައް ބެލުމާއި ޝަރުޢީ އިންޝުއަރެންސްގެ ބޭނުމަށް މީހަކަށް ލިބޭ އަނިޔާގެ މިންވަރު ވަޒަންކުރުމުގެ ޚިދުމަތް ވެސް ލިބިގެންދާނެ ކަމަށް ވަޒީރު ވިދާޅުވިއެވެ.

މީގެ އިތުރުން ޝަރުއީގޮތުން ބަލަން ޖެހޭ މަރުގެ މައްސަލަތަކުގައި މަރުވި ސަބަބު ދެނެގަތުމަށް ހަށިގަނޑު ތަހުލީލުކުރުމާއި ޖިންސީ އަދި ޖިސްމާނީ ގޯނާގެ މައްސަލަތައް ތަހުލީކުރުން ހިމެނޭ ކަމަށް ވިދާޅުވި އެވެ.

ޕޯސްޓްމޯޓަމްގެ ޚިދުމަތް ދިނުމުގެ މަޢުލޫމާތު ޤާނޫނެއްގައި ބަޔާންކޮށްފައި ވަނީ 2015 ވަނަ އަހަރުގައި ކަމަށާއި އޭގެ ފަހުން ތަފާތު ސަރުކާރުތައް އައި ނަމަވެސް އެ ޚިދުމަތް ޤާއިމްކުރަން މަސައްކަތް ކުރެވިފައި ނުވާ ކަމަށް ވަޒީރު ފާހަގަކުރެއްވިއެވެ. އެ ޔުނިޓު އެކުލަވައިލުމުގެ ކުރިން ފޮރެންސިކް ޕެތޮލޮޖީގެ ޤަވާޢިދު އެކުލަވައިލައި ގެޒެޓްކުރައްވާނެ ކަމަށް ވެސް ވަޒީރު ވިދާޅުވިއެވެ.

ފާއިތުވި 10 އަހަރު ޕޯސްޓްމޯޓަމް ހަދަން 23 ހަށިގަނޑު ރާއްޖެއިން ބޭރަށް ފޮނުވާފައިވާ އިރު އެ ޚިދުމަތް ހޯދުމަށް މީހަކަށް 55000 ރުފިޔާ ހޭދަވެފައިވެއެވެ.