އާސަންދައިން ޚަރަދުކޮށްގެން ރާއްޖޭން ބޭރަށް ބޭސްފަރުވާއަށް ފޮނުވާ މީހުންގެ ތެރެއިން އެންމެ ގިނައީ ކެންސަރު ބަލީގެ ފަރުވާއަށް ފޮނުވާ މީހުން ކަމަށް ހެލްތް މިނިސްޓަރު ގީލާ އަލީ ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ކުރެއްވި ސުވާލަކަށް ޖަވާބު ދެއްވަމުންނެވެ.

Advertisement

މިނިސްޓަރު ވިދާޅުވީ މިދިޔަ އަހަރު އެ ބަލީގެ ފަރުވާއަށް 2000 އަށް ވުރެ ގިނަ މީހުން ރާއްޖޭން ބޭރަށް ފޮނުވާފައިވާ ކަމަށެވެ. އެއީ ކެންސަރުގެ އެކި ފަރުވާތަކަށާއި ރާއްޖޭން ނުހެދޭ އުނދަގޫ ޓެސްޓްތައް ހެދުމަށް ކަމަށް ވިދާޅުވި އެވެ.

މިނިސްޓަރު މިއަދު ހާމަކުރެއްވި ތަފާސް ހިސާބު ދައްކާގޮތުން އެއް އަހަރުން އަނެއް އަހަރަށް ކެންސަރު ޖެހޭ މީހުންގެ އަދަދު ދަނީ އިތުރު ވަމުންނެވެ. އެގޮތުން 2023 ވަނަ އަހަރު 1638 މީހުން ކެންސަރު ފަރުވާއަށް ރާއްޖެއިން ބޭރަށް ފޮނުވިއ ިރު 2024 ވަނަ އަހަރު 1996 މީހުން ފޮނުވާފައިވެ އެވެ. 

މިނިސްޓަރު ވިދާޅުވި ގޮތުގައި އެ އަދަދުތަކުގެ ތެރޭގައި މުޅިން އަލަށް ފޮނުވި މީހުންނާއި ބަލީގެ ބާވަތުން ތަކުރާރުކޮށް ފޮނުވި މީހުންނާއި ކައިރި ޤައުމުތަކުގައި ދިރިއުޅޭ މީހުން ވެސް ހިމެނެއެވެ. ކެންސަރު ބަލީގެ ކުރީކޮޅު ބަލި ދެނެގަނެ ފަރުވާ ކުރެވިއްޖެ ނަމަ ފުރާނަ ސަލާމަތްކުރެވޭތީ ބަލި ދެނެގަތުމުގެ ޚިދުމަތް ފެށުމަކީ މި ސަރުކާރުން ކުރި އެންމެ މުހިންމު މަސައްކަތް ކަމަށް ވެސް އެ ކަމަނާ ވިދާޅުވިއެވެ.

އެގޮތުން މިހާރު އުރަމަތީގެ ކެންސަރަށް ސްކްރީންކުރަން ހަދާ މެމޮގްރަފީގެ ޚިދުމަތް މާލެ ސަރަޙައްދާއި ފަސް ރީޖަނަލް ހޮސްޕިޓަލަކާއި ފުވައްމުލަކު ހޮސްޕިޓަލާއި ބ. އަތޮޅު ހޮސްޕިޓަލުގައި ލިބޭނެ ކަމަށް ވިދާޅުވި އެވެ. މިނިސްޓަރު ވިދާޅުވީ މިހާތަނަށް 750 މީހުން އެ ޚިދުމަތް ރާއްޖޭގައި ތިބެގެން ހޯދާފައިވާ ކަމަށް މިނިސްޓަރު ވިދާޅުވިއެވެ.

މީގެ އިތުރުން ރަހިމުގެ ދޮރަށް ޖެހޭ ކެންސަރަށް ޓެސްޓުކުރުމުގެ ޚިދުމަތް ހުރިހާ އަތޮޅެއްގައި ފެށުމަށް ސަރުކާރުން ނިންމާފައިވާ ކަމަށް ވެސް ގީލާ ވިދާޅުވިއެވެ.

ކެންސަރަށް ދޭ ފަރުވާއެއް ކަމަށްވާ ކީމޯތެރަޕީ މިހާރު ރާއްޖޭގައި ތިބެގެން ހޯދެން ހުންނާތީ ރާއްޖޭން ބޭރުން އެ ފަރުވާ ހޯދީ އެންމެ 39 މީހުން ކަމަށް މިނިސްޓަރު ވިދާޅުވިއެވެ. ހުޅުމާލެ ހޮސްޕިޓަލުގައި ކެންސަރަށް ފަރުވާ ކުރުމަށް ފަސް އެނދުގެ ފެސިލިޓީއެއް ޤާއިމުކޮށްފައިވާ ކަމަށާއި ބަލީގެ ކުރީކޮޅު ދެނެގަނެވި ފަރުވާ ދެވޭ މީހުންގެ އަދަދު އިތުރުވެފައިވާ ކަމަށް ވެސް އެ ކަމަނާ ވިދާޅުވިއެވެ.