މާލެ ނޯތް ހާބަރުގެ ބާޒާރު މައްޗާ ވީ ފަޅީގައި އޮންނަ އޭ-ޒޯނުން އުޅަނދުފަހަރަށް ކަރަންޓާއި ފެނުގެ ޚިދުމަތް ދޭން ފަށައިފިއެވެ.

މި ހިދުމަތް ދޭން ފެށީ އިއްޔެ އެވެ.

Advertisement

އެ ބަނދަރު ބަލަހައްޓާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނެރުނު ބަޔާނެއްގައި ބުނީ ކުރިން ފެނާއި ކަރަންޓުގެ ޚިދުމަތް ދެމުން އައީ ހަމައެކަނި ބީ-ޒޯނާއި ސީ-ޒޯނުން ކަމަށެވެ. އޭ-ޒޯނުން އެ ޚިދުމަތް ދޭން ފެށީ ބޮޑުތަކުރުފާނު މަގުގެ އެ ސަރަހައްދު ފުޅާކޮށް ނިމުމުން ރައީސް ޑރ. މުޙައްމަދު މުޢިއްޒު އެކަމަށް އެންގެވުމާ ގުޅިގެން ކަމަށް އެ ކުންފުނިން ބުނެފައިވެއެވެ.

އެ މަސައްކަތް ފެށީ މި އަހަރުގެ މާރިޗު މަހުގެ ތެރޭގައި ކަމަށް ވެސް އެމްޕީއެލުން ބުންޏެވެ.

އެ ކުންފުނިން ބުނީ މާލޭ ނޯތު ހާބަރުގެ އޭ ޒޯން އިން ފެނާއި ކަރަންޓްގެ ހިދުމަތް ފޯރުކޮށްދިނުމަކީ މާލޭ ނޯތު ހާބަރު ބޭނުންކުރާ އޮޑިދޯނިފަހަރަށް އިތުރު ލުއިފަސޭހަކަމެއް ލިބިގެންދާނެ ކަމެއް ކަމަށެވެ.

މިހާރު އެ ޒޯނުން އެއް ފަހަރާ 48 އަށް އުޅަނދަށް ކަރަންޓް ފޯރުކޮށްދެވޭނެ އެވެ. އަދި ފެން ފޯރުކޮށްދޭ 16 ޕޮއިންޓް މިހާރު ވަނީ އެ ސަރަހައްދުގައި ގާއިމްކޮށްފަ އެވެ.

އެ ޚިދުމަތް ޤާއިމުކުރުމަށް އެމްޕީއެލްގެ ކަމާ ގުޅޭ ޑިޕާޓްމަންޓްތަކުން ވަރަށް ބުރަ މަސައްކަތްތަކެއް ކޮށްފައިވާ ކަން ފާހަގަކުރާ ކަމަށް ވެސް އެ ކުންފުނިން ބުނެފައިވެއެވެ.