ބޯހިޔާވަހިކަމުގެ މަޢުލޫމާތު ފޯރުކޮށްދިނުމަށް ވައިބާ ގްރޫޕުތަކެއް ހަދައިފި އެވެ.

ސަރުކާރުން ދަނީ މާލެ ސަރަހައްދުގެ ބޯހިޔާވަހި ކަމުގެ ހަތަރު މަޝްރޫއެއް ކުރިޔަށް ގެންދަމުންނެވެ. އެންމެ ފަހުން ފޯމު ހުށަހެޅުމުގެ ފުރުސަތު ހުޅުވާލާފައި އޮތީ ބޯހިޔާވަހިކަން އެންމެންނަށް ޕްރޮގްރާމަށެވެ.

ހައުސިން މިނިސްޓްރީން މައުލޫމާތު ދޭގޮތުގައި ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކާ ގުޅޭ މަޢުލޫމާތު ރައްޔިތުންނަށް ފޯރުކޮށްދިނުމުގެ މަޤްޞަދުގައި އެ މިނިސްޓްރީއިން ހަތަރު ވައިބާ ކޮމިއުނިޓީއެއް އުފައްދާފައިވާ ކަމަށެވެ.

އޭގެ ތެރޭގައި ހިމެނެނީ ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ޚާއްސަ ތިން ވައިބާ ކޮމިއުނިޓީ އެވެ. ދެން ހަދާފައިވަނީ ބޯހިޔާވަހިކަން އެންމެންނަށް ސްކީމަށް ހާއްސަ ކޮމިއުނިޓީ އެވެ. 

މިނިސްޓްރީން ހަދާފައިވާ ވައިބާ ކޮމިއުނިޓީ ތަކަކީ:

• ބިންވެރިޔާ ސްކީމްގެ ދަށުން ހުޅުމާލެއިން ގޯތި ލިބިފައިވާ ފަރާތްތަކަށް ޚާއްސަ "ބިންވެރިޔާ ހުޅުމާލެ" ވައިބަރ ކޮމިއުނިޓީ

• ބިންވެރިޔާ ސްކީމްގެ ދަށުން ގުޅީފަޅުން ގޯތި ލިބިފައިވާ ފަރާތްތަކަށް ޚާއްސަ "ބިންވެރިޔާ ގުޅިފަޅު" ވައިބަރ ކޮމިއުނިޓީ

• ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ޚާއްސަ "ބިންވެރިޔާ ގިރާވަރުފަޅު" ވައިބަރ ކޮމިއުނިޓީ

• "ބޯހިޔާވަހިކަން އެންމެންނަށް" ސިޔާސަތާއި ގުޅޭ މައުލޫމާތު ހިއްސާކުރުމަށް ޚާއްސަ "ބޯހިޔާވަހިކަން އެންމެންނަށް" ވައިބަރ ކޮމިއުނިޓީ

ހައުސިން މިނިސްޓްރީން ބުނީ މި ވައިބާ ކޮމިއުނިޓީތައް މެދުވެރިކޮށް ބޯހިޔާވަހިކަމުގެ މަޝްރޫޢުތަކާ ގުޅޭ އެންމެ ފަހުގެ އިއުލާނުތަކާއި އަދާހަމަތައް ލިބިގެންދާނެ ކަމަށެވެ.

މި ސަރުކާރުގެ ފުރަތަމަ ބޯހިޔާވަހި ކަމުގެ މަޝްރޫއު ކަމަށްވާ ބޯހިޔާވަހިކަން އެންމެންނަށް ސްކީމްގެ ދަށުން ފްލެޓާއި ގޯތި ލިބޭ މީހުން މިއަހަރު ނިމުމުގެ ކުރިން އިއުލާނު ކުރާނެ ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައި އެވެ.