މާލޭގެ ހާޑްވެއާ ފިހާރައެއްގެ ބިއްލޫރިގަނޑު ތަޅާލައި ވައްކަންކުރި ދެ މީހަކު ހައްޔަރުކޮށްފި އެވެ.

ފުލުހުން ބުނީ މާލެ ހިތަށްފިނިވާމަގުގައި ހުންނަ ހާޑްވެއާ ފިހާރައެއްގެ ބިއްލޫރިގަނޑު ތަޅާލައި އެ ތަނުން ވައްކަންކުރި ކަމުގެ ރިޕޯޓު ކުރީ މިދިޔަ ހޮނިހިރު ދުވަހު ކަަމަށެވެ. މި މައްސަލައިގަ ދެ މީހުން ހައްޔަރު ކުރީ ކޯޓު އަމުރެއްގެ ދަށުން ހަމަ އެ ދުވަހު އެވެ.

Advertisement

މި މައްސަލައިގައި ހައްޔަރުކޮށްފައިވަނީ ޏ. ފުވައްމުލައް / ދިގުވާނޑު.ފެއަރީ އަޙްމަދު ނަޞްރު (46އ) އާއި ށ. ޅައިމަގު / އަތަމާގެ ފާރިސް ޢަލީ ޝަރީފް (35އ) އެވެ.

މި ދެމީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ވަނީ އަމުރުކޮށްފައެވެ.

ފުލުހުން ބުނީ އެމީހުން ހޯދީ ސީސީޓީވީ ފުޓޭޖު ބަލައިގެން ކަމަށެވެ.

ފުލުހުން ވަނީ އެމީހުން ހައްޔަރުކުރުމުގެ އިތުރުން އެ ފިހާރައިން ވަގަށް ނެގި ލޮއިނަރު ރޯލުތައް ހޯދައި ވަނީ ވެރިފަރާތާ ހަވާލުކޮށްފައެވެ.