އިލެކްޝަންސް ކޮމިޝަން (އީސީ) ގެ ރައީސް ކަމަށް މުހައްމަދު ޝަކީލް އައްޔަންކުރުމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.

ޝަކީލް އެ މަގާމަށް އައްޔަންކުރަން ރުހުން ދިނުމާ މެދު ގޮތެއް ނިންމެވުމަށް އެދިވަޑައިގެން ރައީސް ޑރ. މުޙައްމަދު މުޢިއްޒު މަޖިލީހަށް ފޮނުއްވީ އިއްޔެ އެވެ. އިއްޔެގެ ޖަލްސާގައި އެ މައްސަލަ ވަނީ މިނިވަން މުއައްސަސާތަކުގެ ކޮމިޓީއަށް ދިރާސާ ކުރުމަށް ފޮނުވާފައި އެވެ.

Advertisement

މިއަދުގެ ޖަލްސާގައި ޝަކީލަށް ރުހުން ދީފައިވަނީ 51 މެންބަރުންގެ ވޯޓާ އެކުގައެވެ. އެ މަގާމަށް އޭނާ އައްޔަންކުރުމާ ދެކޮޅަށް އިދިކޮޅު އެމްޑީޕީގެ އަށް މެންބަރަކު ވޯޓު ދެއްވިއެވެ.

އީސީގެ ރައީސް ކަމުގައި އެންމެ ފަހުން ހުންނެވި މުޙައްމަދު ޒާހިދު އިސްތިއުފާ ދެއްވުމާ ގުޅިގެން ޝަކީލް ދާދިފަހުން ވަނީ އީސީގެ މެންބަރު ކަމަށް އައްޔަންކުރައްވައިފައެވެ. އެ މަގާމަށް އައްޔަންކުރެއްވުމާ ހަމައަށް ޝަކީލް ހުންނެވީ ހައްޖު ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައެވެ. އަދި އޭނާއަކީ ވެރިކަން ކުރާ ޕާޓީ ޕީއެންސީގެ ރަޖިސްޓްރާގެ މަގާމު އެންމެ ފަހުން ފުރުއްވި ބޭފުޅާއެވެ.

ޝަކީލް ވަނީ މީގެ ކުރިން ވެސް އީސީގައި މަސައްކަތް ކުރައްވައިފައެވެ. އެގޮތުން އެ ކޮމިޝަންގެ ޑިރެކްޓާ ޖެނެރަލްގެ މަގާމާއި ކޮމިޝަނުގެ މެންބަރު ކަން ވެސް އޭނާ ކުރެއްވިއެވެ.