މެދުއިރުމަތީގެ ހަނގުރާމަ ހުއްޓާލުމުގެ އެއްބަސްވުމެއްގައި އެމެރިކާގެ ރައީސް ޑޮނަލްޑް ޓްރަމްޕާއި އީރާނުގެ ރައީސް މަސްއޫދު ޕެޒެޝްކިއަން ބުދަ ދުވަހު ސޮއިކުރައްވައިފިއެވެ.

މި އެއްބަސްވުމުގެ ދަށުން އީރާނުން މުއްސަނދިކޮށްފައިވާ ޔުރޭނިއަމްގެ ބާރު ދަށްކުރުމަށާއި ބަދަލުގައި އީރާނަށް އިގްތިސާދީ ބޮޑެތި ލުއިތައް ދިނުމަށް ހިމަނާފައިވެއެވެ.

Advertisement

ޓްރަމްޕް މި އެއްބަސްވުމުގައި ސޮއިކުރީ ޖީ7 ސަމިޓަށް ފަހު ފްރާންސްގެ ޕެލަސް އޮފް ވާސައިގައި ފްރާންސްގެ ރައީސް އެމަނުއެލް މެކްރޮންއާ އެކު ބޭއްވި ފަރިއްކޮޅެއްގެ ތެރޭގައި ކަމަށް އެމެރިކާގެ އޮފިޝަލަކު އޭއެފްޕީއަށް ކަށަވަރުކޮށްދީފައިވެއެވެ. ގަނޑުވަރުން ނުކުންނަމުން ޓްރަމްޕް ބުނީ "މިހާރު ސޮއިކޮށްފިން" ކަމަށެވެ. އީރާނުގެ ދައުލަތުގެ ނިއުސް އެޖެންސީ (އައިއާރްއެންއޭ) އިން ވަނީ ދެ ގައުމުގެ ރައީސުންގެ ސޮޔާ އެކު މި ލިޔުން ފައިނަލްވެއްޖެ ކަމަށް އެ ގައުމުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީއާ ހަވާލާދީ ބުނެފައެވެ.

މި އެއްބަސްވުމުގެ ދަށުން އެމެރިކާއިން ވަނީ އީރާނުގެ ތެލުގެ އެކްސްޕޯޓާ ދެކޮޅު ދަތިކުރުމުގެ ފިޔަވަޅުތައް ވަގުތުން އުވާލުމަށް އެއްބަސްވެފައެވެ. އަދި ނިއުކްލިއާ ޕްރޮގްރާމާ ބެހޭ ފައިނަލް އެއްބަސްވުމަކަށް އާދެވުމުން ސަރަހައްދީ ގައުމުތަކުގެ އެހީއާ އެކު 300 ބިލިއަން ޑޮލަރުގެ އާރާސްތުކުރުމުގެ ފަންޑެއް ދޫކުރުމަށް ވެސް މަގުފަހިކޮށްދޭނެ ކަމަށް އެއްބަސްވުމުގައިވެއެވެ. އީރާނުން މުއްސަނދިކޮށްފައިވާ ޔުރޭނިއަމްގެ މިންވަރު ދަށްކުރާނީ އދ.ގެ ނިއުކްލިއާ އިދާރާ (އައިއޭއީއޭ) ގެ ބެލުމުގެ ދަށުންނެވެ. ނަމަވެސް އެމެރިކާގެ އޮފިޝަލަކު ވިދާޅުވީ މިކަމަށް އެމެރިކާއިން މާލީ ގޮތުން އެއްވެސް ހަރަދެއް ކުރަން ނުޖެހޭނެ ކަމަށެވެ.

މި އެއްބަސްވުމާ މެދު ތަފާތު ރައުޔުތައް ވަނީ ފާޅުކޮށްފައެވެ. އީރާނުން ސިފަކުރަނީ މިއީ އެމެރިކާގެ "ނާކާމިޔާބީ" ކަމަށެވެ. ލުބުނާނުގެ ހިޒްބުﷲ ޖަމާއަތުގެ ވެރިޔާ ނައީމް ގާސިމް މި އެއްބަސްވުން ސިފަކުރީ އީރާނަށް ލިބުނު "ބޮޑު ކާމިޔާބީއެއް" ގެ ގޮތުގައެވެ. އެހެން ނަމަވެސް ޓްރަމްޕްގެ ރިޕަބްލިކަން ޕާޓީއަށް ނިސްބަތްވާ ސެނެޓަރު ބިލް ކެސިޑީ ވަނީ ވަރަށް ބޮޑަށް ފާޑު ކިޔާފައެވެ. "އީރާނުގެ ނިއުކްލިއާ އުންމީދުތަކެއް ހުއްޓުވައެއް ނުލެވުނު. އަދި ހޮރްމޫޒް ކަނޑުއޮޅި ބަންދުކުރާނެ ކަމުގެ ބިރުދެއްކުމުން ކަންކަން ކާމިޔާބުވާކަން އެ މީހުންނަށް އެނގިއްޖެ. މިއީ ފާއިތުވި އެތައް އަހަރެއްގައި ޚާރިޖީ ސިޔާސަތުގައި ހެދި އެންމެ ބޮޑު ގޯސް" ކަމަށް އޭނާ ބުނެފައިވެއެވެ. 

މި އެއްބަސްވުމަކީ ވަގުތީ އިންތިޒާމެއް ކަމަށް ވާއިރު މީގެ ބޭނުމަކީ އީރާނުގެ ނިއުކްލިއާ ބާރުވެރިކަމާ ބެހޭ ގޮތުން ދިގު މުއްދަތުގެ މަޝްވަރާތައް ފެށުމަށް ވަގުތު ހޯދުމެވެ. އެއްބަސްވުމާ އެކު ދެ މަސް ދުވަހުގެ މަޝްވަރާގެ މުއްދަތެއް ފެށިފައި ވާއިރު ފުރަތަމަ ފިޔަވަޅަކީ ހޮރްމޫޒް ކަނޑުއޮޅި އަލުން ހުޅުވާލުމެވެ. ހުކުރު ދުވަހު ސްވިޓްޒަލެންޑުގައި މިކަމަށް ޚާއްޞަ ރަސްމިއްޔާތެއް ބާއްވަން ވެސް ނިންމާފައިވެއެވެ.