ނޯވޭގެ ރަސްގެފާނު ހެރަލްޑް އަވަހާރަވެއްޖެ

ލޭގެ މައްސަލައަކާ ގުޅިގެން ހޮސްޕިޓަލުގައި ފަރުވާ ހޯއްދަވަމުން ގެންދެވި ނޯވޭގެ ރަސްގެފާނު ހެރަލްޑް ފަސްވަނަ ޢުމުރުފުޅުން 89 އަހަރުގައި މިއަދު އަވަހާރަވެއްޖެއެވެ.

ނޯވޭގެ ޝާހީ ގަނޑުވަރުން ހުކުރު ދުވަހު ނެރުނު ބަޔާނުގައި ވާ ގޮތުން ރަސްގެފާނު އަވަހާރަވީ އޮސްލޯ ޔުނިވާސިޓީ ހޮސްޕިޓަލުގައި އޮގަސްޓް 28 ވަނަ ދުވަހުގެ ހެނދުނު 6:35 ގައެވެ. ރަސްގެފާނުގެ ޙާލުކޮޅު "ވަރަށް ސީރިއަސް" ކަމަށް ކުރީ ދުވަހު އިޢުލާނުކުރުމާ ގުޅިގެން ޝާހީ ޢާއިލާގެ ބޭފުޅުން ބުރާސްފަތި ދުވަހު ހޮސްޕިޓަލަށް ޒިޔާރަތްކުރެއްވި އިރު ގަނޑުވަރު ކައިރިއަށް ރައްޔިތުން ޖަމާވެ މާ ބޮނޑިތައް ބެހެއްޓިއެވެ.

ހެރަލްޑް ފަސްވަނަ ހޮސްޕިޓަލުގައި އެޑްމިޓްކުރީ އޮގަސްޓް 17 ގައެވެ. އެ މަނިކުފާނު އެޑްމިޓްކުރީ ހީމޮލިޓިކް އެނީމިއާ ކިޔާ މަދުން ފެންނަ ބައްޔަކަށް ފަރުވާ ހޯއްދެވުމަށެވެ. އެއީ ހަށިގަނޑުގައި ރަތް ލޭގެ ސެލްތައް އާދަޔާ ޚިލާފަށް އަވަހަށް ހަލާކުވެ ވަރުބަލިވުމާއި ނޭވާލާން އުނދަގޫވުން މެދުވެރިކުރުވާ ޙާލަތެކެވެ.

ރަސްގެފާނުގެ ދޮށީ ދަރިކަލުން ވަލީއަޙުދު ހޯކޮން އެ މަނިކުފާނަށް ފަހު ހޯކޮން އަށްވަނައިގެ ނަމުގައި ތަޚުތާ ހަވާލުވެވަޑައިގެންނެވީ ޤާނޫނީ ގޮތުން ރަސްކަން ވާރުތަވެގެންނެވެ.

ޔޫރަޕުގެ އެންމެ ދުވަސްވީ ރަސްކަލުގެ ގޮތުގައި ހުންނެވި ހެރަލްޑް ވެވަޑައިގެންފައި ވަނީ 14 ވަނަ ޤަރުނަށް ފަހު ނޯވޭ ބިމުގައި އުފަންވެވަޑައިގެންނެވި ފުރަތަމަ ރަސްގެފާނަށެވެ. 1937 ވަނަ އަހަރު ފެބްރުއަރީ މަހު އޮސްލޯ ކައިރީގައި އުފަންވެވަޑައިގެންނެވި ހެރަލްޑް ކުޑައިރު ނާޒީން ނޯވޭ ހިފުމުން މައިކަނބަލާއާ އެކު ސްވީޑެނަށް ފަހުން އެމެރިކާއަށް ވަޑައިގެންނެވި އިރު ބައްޕާފުޅު އޯލާވް ފަސްވަނައާއި ކާފާފުޅު ހޯކޮން ހަތްވަނަ ހަނގުރާމައިގެ ދުވަސްވަރު ހުންނެވީ އިނގިރޭސިވިލާތުގައެވެ.

ބައްޕާފުޅު 1991 ވަނަ އަހަރުގެ ޖެނުއަރީ މަހު އަވަހާރަވެވަޑައިގެންނެވުމާ އެކު ތަޚުތާ ހަވާލުވެވަޑައިގެންނެވި ހެރަލްޑް 35 އަހަރު ވެރިކަން ކުރެއްވި އިރު ތެލުގެ މުއްސަނދިކަމާ އެކު ނޯވޭ ކުރިއެރި ދައުރަށް ރައީސްކަން ކުރެއްވިއެވެ.

ފަހު އަހަރުތަކުގައި ޞިއްޙީ އެކި މައްސަލަތައް ކުރިމަތިވެވަޑައިގެން ޕޭސްމޭކަރެއް ހައްދަވައި ރަސްމީ ޝެޑިއުލް ކުޑަ ކުރެއްވި ނަމަވެސް ނޯވޭ ޕާލިމެންޓް ކުރިމަތީ އުމުރަށް ކުރެއްވި ހުވާފުޅާ ޙަވާލާ ދެއްވައި ތަޚުތު ދޫކޮށްލެއްވުމާ ދެކޮޅު ހައްދަވައެވެ. 2011 ވަނަ އަހަރު އެންޑޭސް ބެހެރިން ބްރެއިވިކް ދިން ބޮމުގެ ހަމަލާތަކުގައި 77 މީހުން މަރުވި ހާދިސާއަށް ފަހު ހެރަލްޑް ވިދާޅުވީ "މިނިވަންކަމަށް އޮތް ޔަޤީންކަން ބިރުވެރިކަމަށް ވުރެ ވަރުގަދަ ކަމާ މެދު ޝައްކެއް ނެތް" ކަމަށެވެ.

މި ބަސްފުޅާ އެކު ނޯވޭ ރައްޔިތުންގެ ހިތްތަކުގައި އެ މަނިކުފާނަށް ދެމިގެންވާ ލޯތްބެއް އުފެދިގެންދިޔައެވެ.