އިޒްރޭލު ސަފީރު ހާޒިރުކޮށް، ހުޅަނގު އައްސޭރީގެ ހައުސިން މަޝްހޫރުއު ހުއްޓާލަން އިނގިރޭސިވިލާތުން ގޮވާލައިފި

ފަލަސްތީނުގެ ހުޅަނގު އައްސޭރީގައި 1,200 އަށް ވުރެ ގިނަ ގެދޮރު ޢިމާރާތް ކުރުމުގެ ބީލަން އިޒްރޭލުން ހުޅުވައިލުމާ ގުޅިގެން އެ ޤައުމުން އިނގިރޭސިވިލާތުގެ ލަންޑަނަށް ކަނޑައަޅާފައިވާ ސަފީރު ފޮރިން މިނިސްޓްރީއަށް ހާޒިރުކޮށް އެ މަޝްރޫޢު ވަގުތުން ހުއްޓައިލުމަށް މިއަދު ގޮވާލައިފިއެވެ.

މި ބީލަމަކީ "އީ1" ގެ ނަމުން މަޝްހޫރު ގާތްގަނޑަކަށް 12 އަކަ ކިލޯމީޓަރުގެ ބިމެއްގައި ޖުމްލަ 3,400 ގެ ބިނާކުރުމުގެ ޕްލޭނުގެ ދަށުން ހުޅުވައިލި ބީލަމެކެވެ. އެ ބިން އޮންނަނީ ޤުދުސް އާއި އިސްރާއީލުގެ ޔަހޫދީ އާބާދީ މާލޭ އެޑޫމިމް އާ ދެމެދުގައެވެ.

މިދިޔަ އަހަރުގެ އޮގަސްޓް މަހު އިސްރާއީލުން މި ޕްލޭނަށް ރަސްމީ ހުއްދަ ދީފައިވާއިރު އެ ނިންމުމާ ދެކޮޅަށް އދ. ގެ ސެކެރެޓަރީ ޖެނެރަލް ވެސް ވަނީ އެއީ ފަލަސްޠީނުގެ ގުޅިފައިވާ މިނިވަން ދައުލަތެއް ޤާއިމުކުރުމަށް "ވުޖޫދީ ނުރައްކަލެއް" ކަމަށް ސިފަކޮށްފައެވެ. މި މަޝްރޫޢު ކުރިއަށް ގެންގޮސްފިނަމަ ފަލަސްޠީނު ރައްޔިތުން ގިނަ ޢަދަދަކަށް ދިރިއުޅޭ އިރުމަތީ ޤުދުސް ހުޅަނގު އައްސޭރިފަށާ ވަކިވެ ބައިބައިވެދާނެ ކަމުގެ ބިރު ބޮޑެވެ.

އިނގިރޭސިވިލާތުގެ ފޮރިން މިނިސްޓަރު އެޑް މިލިބޭންޑް މި ފިޔަވަޅު ސިފަކުރެއްވީ "ބަލައިނުގަނެވޭނެ ހަލާކުކުރަނިވި ޢަމަލެއް" ގެ ގޮތުގައެވެ. އެ ފިޔަވަޅުގެ ސަބަބުން ދެ ދައުލަތުގެ ހައްލަށް ނުރައްކާ ވާނެ ކަމަށް ވެސް ވަޒީރު ވިދާޅުވިއެވެ. "އިސްރާއީލު ސަރުކާރުން ވަގުތުން އީ1 ގެ ޕްލޭންތައް ހުއްޓައި ބީލަން އަނބުރައި ނެގައި ހުރިހާ ޔަހޫދީ އާބާދީ ފުޅާކުރުމެއް ހުއްޓައިލަން ޖެހޭ" ކަމަށް އެ ބަޔާނުގައި ވިދާޅުވެފައިވެއެވެ. މިލިބޭންޑް ވިދާޅުވި ގޮތުގައި މި ބައްދަލުވުމާ ބެހޭ ގޮތުން އިސްރާއީލުގެ ޚާރިޖީ ވަޒީރު ގިދިއޮން ސާރް އަށް ސީދާ މެސެޖު ފޮނުއްވާފައިވެއެވެ. ޣައިރު ޤާނޫނީ ޔަހޫދީ އާބާދީ ފުޅާކުރުމުގައި ބައިވެރިވާ ފަރާތްތަކާ ދެކޮޅަށް ދަތިކުރުމުގެ ފިޔަވަޅު އެޅުން ހިމެނޭ ގޮތަށް ކުރިއަށް އޮތް ދުވަސްތަކުގައި ފިޔަވަޅުތައް ޢިއުލާނު ކުރައްވާނެ ކަމަށް ވެސް ވަޒީރު ވިދާޅުވިއެވެ.

ފަލަސްޠީނު އޮތޯރިޓީން ވެސް ވަނީ މި ބީލަން ކުށްވެރިކޮށްފައެވެ. ފަލަސްޠީނު މިނިވަންކަމުގެ ޖަމިއްޔާ (ޕީއެލްއޯ) ގެ ދަށުން ހިންގާ ކޮލޮނައިޒޭޝަން އެންޑް ވޯލް ރެސިސްޓެންސް ކޮމިޝަނުން ނެރުނު ބަޔާނެއްގައި ބުނީ މި ޕްލޭންތައް ކުރިއަށް ގެންގޮސްފިނަމަ ހުޅަނގު އައްސޭރިފަށުގައި ފަލަސްޠީނު ރައްޔިތުން ޔަހޫދީ އާބާދީތަކުން ވަށައިލެވިފައިވާ "ގުޅުމެއް ނެތް ވަކި ޖީބުތަކެއް" ގެ ގޮތުގައި ބަންދުވެގެން ދާނެ ކަމަށެވެ.

އިސްރާއީލުގެ ޖަމިއްޔާ ޕީސް ނައު އިން ބުނި ގޮތުގައި ބީލަން ހުޅުވައިލީ އޮގަސްޓް 18 ވަނަ ދުވަހު އިސްރާއީލުގެ ބޯހިޔާވަހިކަމުގެ ވުޒާރާއިންނެވެ. ހުށަހެޅުންތައް ބަލައިގަންނަ ސުންގަޑިއަކީ އޮކްޓޫބަރު 19 އެވެ. އެއީ އޮކްޓޫބަރު 27 ގައި ބާއްވާ އިސްރާއީލުގެ އިންތިޚާބުގެ އެއް ހަފުތާ ކުރިއެވެ. ޕީސް ނައު އިން ތުހުމަތު ކުރި ގޮތުގައި ސަރުކާރުން ބޭނުންވަނީ ވޯޓުގެ ކުރިން ޢިމާރާތް ކުރުމުގެ ވަޢުދުތައް ޔަޤީންކުރުމެވެ.

މިދިޔަ އަހަރު އިނގިރޭސިވިލާތާއި ފަރަންސޭސިވިލާތް ހިމެނޭ ގޮތަށް 21 ޤައުމަކުން ވަނީ އީ1 ޕްލޭނަށް ދިން ހުއްދަ ކުށްވެރިކޮށް އެއީ ބައިނަލްއަޤުވާމީ ޤާނޫނާ ޚިލާފު ކަމެއް ކަމަށް ބުނެ ނިންމުން ބާތިލުކުރުމަށް ގޮވާލައިފައެވެ. އިރުމަތީ ޤުދުސް ނުލައި ހުޅަނގު އައްސޭރިފަށުގައި ގާތްގަނޑަކަށް ތިން މިލިޔަން ފަލަސްޠީނު ރައްޔިތުންނާއި 500,000 އެއްހައި ޔަހޫދީ އާބާދީ ވެރީން ދިރިއުޅެއެވެ.