އިރުމަތީ އިންޑޮނީޝިއާއަށް ބާރުގަދަ ބިންހެލުމެއް - ސުނާމީގެ އިންޒާރު ނެރުނު

އިރުމަތީ އިންޑޮނީޝިއާގެ ފްލޯރެސް އައިލެންޑް ކައިރިއަށް ބާރުގަދަ 7.7 މެގްނިޓިއުޑްގެ ބިންހެލުމެއް އައުމާ ގުޅިގެން، އެ ސަރަހައްދުގައި ހިމެނޭ 22 ސަރަހައްދަކަށް ސުނާމީގެ އިންޒާރު ނެރެފައިވާ ކަމަށް އިންޑޮނީޝިއާގެ ޖިއޮފިޒިކްސް އިދާރާ (ބީއެމްކޭޖީ) އިން ބުނެއެވެ.

މި ބިންހެލުން އައީ ރާއްޖޭ ގަޑީން ބަލަނީނަމަ ގަޑިން މިއަދު (ހޮނިހިރު) ފަތިހު 2:58 (21:58 GMT، އޮގަސްޓް 14) ގައެވެ. ބިންހެލުމުގެ މަރުކަޒަކީ އިރުމަތީ ނޫސާ ޓެންގަރާ ޕްރޮވިންސްގެ އެންޑޭ ސިޓީގެ އުތުރު-ހުޅަނގުން 68 ކިލޯމީޓަރު (42 މޭލު) ދުރު، ފުންމިން 10 ކިލޯމީޓަރު ކަމަށް ޔޫއެސް ޖިއޮލޮޖިކަލް ސާވޭ (ޔޫއެސްޖީއެސް) އިން ބުނެއެވެ.

ސުނާމީ ރާޅު ފޯރާނެ ކަމަށް ބީއެމްކޭޖީން ލަފާކޮށްފައި ވަނީ ރާއްޖޭ ގަޑީން ބަލަނީނަމަ މިއަދު ފަތިހު 3:02 އިން 4:41 (22:02 އިން 23:41 GMT) އާ ދެމެދު ކަމަށެވެ. އިންޒާރު ނެރެފައި ވަނީ އިރުމަތީ ނޫސާ ޓެންގަރާ، ހުޅަނގު ނޫސާ ޓެންގަރާ، ދެކުނު ސޫލަވޭސީ އަދި ދެކުނު-އިރުމަތީ ސޫލަވޭސީ ސަރަހައްދުތަކުގައި ހިމެނޭ 22 ސަރަހައްދަކަށެވެ.

ބިންހެލުމަށް ފަހު ފުރަތަމަ 45 މިނެޓު ތެރޭގައި 5.5 އިން 6.1 މެގްނިޓިއުޑް އާ ދެމެދު ހަތަރު އާފްޓާޝޮކެއް އައި ކަމަށް ޔޫއެސްޖީއެސް އިން ބުނެއެވެ. އެންމެ ބޮޑު އާފްޓާޝޮކްގެ ބާރުމިނަކީ 6.1 މެގްނިޓިއުޑެވެ.

ފްލޯރެސް ސަރަހައްދަކީ "ޕެސިފިކް ރިންގް އޮފް ފަޔާ" ގައި ހިމެނޭ ބިންހެލުން ގިނަ ސަރަހައްދެކެވެ. 2021 ވަނަ އަހަރުގެ ޑިސެންބަރު މަހު ހަމަ މި ސަރަހައްދަށް 7.3 މެގްނިޓިއުޑްގެ ބިންހެލުމެއް އެރި ނަމަވެސް ބޮޑު ގެއްލުމެއް ނުވެއެވެ. ނަމަވެސް 1992 ވަނަ އަހަރު ފްލޯރެސްއަށް އެރި ބޮޑު ބިންހެލުމުގައި ސުނާމީގެ ސަބަބުން 2،500 އަށްވުރެ ގިނަ މީހުން މަރުވިއެވެ.