އިއްޔެ ހުޅުމާލޭ ފުރަތަމަ ފިޔަވަހީގެ ކުރެދިމާ ހިނގުން ހިމެނޭ ސަރަހައްދުން ކަރަންޓު ދިޔައީ އަމިއްލަ ފަރާތަކުން ޢިމާރާތްކުރުމުގެ މަސައްކަތެއް ކުރަމުންދަނިކޮށް ބިމުގެ އަޑީގައި އޮތް ހައިވޯލްޓޭޖް ކޭބަލަކަށް ގެއްލުންވެގެން ކަމަށް ސްޓެލްކޯއިން ބުނެފި އެވެ.

އެ ސަރަހައްދުން ކަރަންޓު ކެނޑުނީ ހަވީރު 5:15 ހާއިރު އެވެ. އެ ސަރަހައްދަށް އަލުން ކަރަންޓު ދެވުނީ ރޭގަނޑު 6:45 ހާއިރު އެވެ.

Advertisement

ސްޓެލްކޯއިން ބުނީ ބިންކޮނުމުގެ ތެރެއިން ކަރަންޓު ވިއުގައިގެ ކޭބަލަށް ލިބުނު ގެއްލުމުގެ ސަބަބުން މިދިޔަ ހަފްތާގެ ބުރާސްފަތި ދުވަހުވެސް ފޭސް އެކެއްގެ ބައެއް ސަރަހައްދުތަކުން ކަރަންޓު ކެނޑުނު ކަމަށެވެ. ސްޓެލްކޯއިން ބުނީ ކުޑަ ދުވަސްކޮޅެއްގެ ތެރޭގައި ތަކުރާރުކޮށް މިފަދަ ކަންކަން ހިނގުމުން ކަރަންޓު ވިއުގައަށް ލިބެމުންދާ ގެއްލުންތަކާ މެދު ކަންބޮޑުވުން އިތުރުވެފައިވާ ކަމަށެވެ.

މި ޙާދިސާތައް ޖެހިޖެހިގެން ހިނގުމާ ގުޅިގެން ރައްޔިތުންނަށް ވަރަށް ބޮޑު ދަތިތަކާ ކުރިމަތިލާން ޖެހިފައިވާ ކަމަށް ފާހަގަކޮށް ކަމާ ބެހޭ ފަރާތުން ވަނީ ކަންބޮޑުވުން ފާޅުކޮށްފައެވެ.

އެހެންކަމުން ޢިމާރާތްކުރުމާއި މަގުކޮނުމުގެ މަސައްކަތް ކުރާ ހުރިހާ ފަރާތްތަކުންވެސް ބިމު އަޑީގައި އެޅިފައިވާ ކޭބަލްތަކަށް ގެއްލުން ނުލިބޭނެ ފަދައިން ރޭވުންތެރިކަމާ އެކު މަސައްކަތް ކުރިއަށް ގެންދިއުމަށް ވަނީ އިލްތިމާސްކޮށްފައެވެ.

ޢިމާރާތްކުރުމުގެ މަސައްކަތް ކުރާ ފަރާތްތަކުން މިހާރަށް ވުރެ ޒިންމާދާރުވެ ކަރަންޓު ވިއުގައިގެ ރައްކާތެރިކަން ކަށަވަރުކުރުމަކީ މި ޙާދިސާތައް ތަކުރާރުވިޔަ ނުދިނުމަށްޓަކައި ކޮންމެހެން ބޭނުންތެރި ކަމެއް ކަމަށް ސްޓެލްކޯއިން ބުނެ އެވެ.

ހުޅުމާލޭ ދޭއްގައިވެސް ދޭތެރެއަކުން ކަރަންޓު ކެނޑުމުގެ ހާދިސާތައް ހިނގަނީ އިމާރާތް ކުރުމަށް ބިން ކޮނުމުގެ ތެރޭގައި ކޭބަލްތަކަށް ގެއްލުން ލިބިގެންނެވެ.