ރަޝިއާއާ ދެކޮޅަށް ހަނގުރާމަ ކުރަނިކޮށް ހައްޔަރުކުރެވުނު އުތުރު ކޮރެއާގެ ދެ ސިފައިން ދެކުނު ކޮރެއާއާ ހަވާލުކުރި ކަން ޔޫކްރެއިނުން އަމިއްލައަށް ހާމަކުރި މައްސަލައިގައި ދެކުނު ކޮރެއާ ސަރުކާރުން ރަސްމީ މާފަކަށާއި ސާފު ތަފްސީލަކަށް އެދިއްޖެއެވެ.

ދެކުނު ކޮރެއާގެ ރައީސް އޮފީހުގެ ސީނިއާ ސެކްރެޓަރީ ސޮން ގީ ހޮން މީޑީއާގައި ބުނީ ޔޫކްރެއިނުން އެ ދެ ސިފައިން ބަދަލުކުރި ކަމުގެ ޚަބަރު ދެ ފަރާތުން އެއްބަސްވެގެން ނިންމާފައި އޮތީ ސިއްރު ކުރާ ގޮތަށް ކަމަށެވެ. އެކަން ހާމަވީ ޔޫކްރެއިނުގެ ރައީސް ވޮލޮޑީމީރް ޒެލެންސްކީ އދ. ގެ ޢާންމު މަޖިލީހުގެ ޖަލްސާގައި އެ ދެ ސިފައިން ދެކުނު ކޮރެއާއާ ހަވާލުކޮށްފައިވާ ކަމަށް އިއުލާނު ކުރުމުންނެވެ.

Advertisement

ދެކުނު ކޮރެއާއިން އެކަމާ ހިތްހަމަ ނުޖެހުމުން ޔޫކްރެެއިނުން ބުނީ އެ މުއާމަލާތް ހިންގި އިރު ސިއްރު ހިފެހެއްޓުމުގެ އެއްބަސްވުމެއް ނެތް އެކުލަވާލާފައި ނެތް ކަމަށެވެ. ދެކުނު ކޮރެއާއިން ބުނީ އެ ދޮގުކުރުމުގެ ސަބަބުން ދެ ޤައުމުގެ ދެމެދުގައި އޮތް އިތުބާރަށް ބޮޑު ގެއްލުމެއް ލިބިފައިވާ ކަމަށެވެ.

ޔޫކްރެއިނުން 2025 ވަނަ އަހަރުގެ ޖެނުއަރީގައި ހައްޔަރުކުރި އެ ދެ ސިފައިންނަކީ ރަޝިއާގެ ކުރްސްކް ސަރަޙައްދުގައި ހަނގުރާމަ ކުރަނިކޮށް ދިރިހުއްޓައި އަތުލައިގަނެވުނު ފުރަތަމަ އުތުރު ކޮރެއާ ސިފައިންނެވެ. މިހާރު އެ ދެ މީހުންގެ މައްސަލަ ދެކުނު ކޮރެއާގެ ކަމާ ގުޅޭ ޤާނޫނުތަކާ އެއްގޮތަށް ބަލައި ރައްކާތެރިކަން ދިނުމާ މެދު ގޮތެއް ނިންމުމުގެ މަރުޙަލާގައި އޮތެވެ.

އެމީހުން ދެކުނު ކޮރެއާއަށް ފޮނުވާލީ އުތުރު ކޮރެއާއަށް އަނބުރާ ފޮނުވާލައިފި ނަމަ ނުރައްކާ އޮތް ކަމަށް ގަބޫލު ކުރެވޭތީ އެވެ. އަދި އެ ދެ ސިފައިން އެކަމަށް އަމިއްލައަށް އެދުމުން ކަމަށް ޒެލެންސްކީ އދ. ގެ ޖަލްސާގައި ބުނެފައިވެ އެވެ.