އިސްތިއުމާރީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ޔުނައިޓެޑް އެރެބް އެމިރޭޓްސް (ޔޫއޭއީ) ގެ ވެރިރަށް އަބުދާބީއަށް ހަފުތާ ބަންދުގައި ސިއްރު ދަތުރެއްކޮށް އެ ޤައުމުގެ ރައީސް ޝެއިޚް މުޙައްމަދު ބިން ޒައިދު އާލް ނަހްޔާން (އެމްބީޒެޑް) އާ ބައްދަލުކޮށްފައިވާކަން ޔޫއޭއީން ހޯމަ ދުވަހު ޔަޤީންކޮށްދީފިއެވެ.

މި ބައްދަލުވުން ހާމަކޮށްފައިވަނީ ނަތަންޔާހޫ އެ ދަތުރު ކުރިތާ އެއް ދުވަސް ފަހުންނެވެ. މި ދަތުރު ކޮށްފައިވަނީ އިޒްރޭލުގެ އިންތިޚާބު ބޯމަތިވެފައި އޮތް ދަނޑިވަޅެއްގައެވެ. ޔޫއޭއީގެ ރައީސް ވަނީ 2023 ވަނަ އަހަރުގެ އޮކްޓޫބަރު ހަތެއްގެ ހަމަލާގެ ކުރިން ހަމާސްއިން ބޮޑު ޢަމަލެއް ހިންގައިފާނެ ކަމުގެ އިންޒާރު ނަތަންޔާހޫއަށް ދީފައި ކަމަށް ރިޕޯޓުތައް ބުނެއެވެ.

Advertisement

ޔޫއޭއީގެ ރަސްމީ ނޫސް އެޖެންސީ ވާމް އިން ބުނީ ބައްދަލުވުމުގައި ޔޫއޭއީއާ އިޒްރޭލާ ދެމެދު އޮތް ގުޅުމާއި އެ ގުޅުން ވަރުގަދަކޮށް ކުރިއެރުވޭނެ ގޮތްތަކާ ބެހޭ ގޮތުން މަޝްވަރާކުރި ކަމަށެވެ. މި ދަތުރުގެ ޚަބަރު އެންމެ ފުރަތަމަ ރިޕޯޓުކޮށްފައިވަނީ އިޒްރޭލުގެ ޗެނަލް 12 އިންނެވެ.

ޝިން ބެޓުން ވަނީ އެ ރިޕޯޓުގެ ސަބަބުން ބޮޑުވަޒީރުގެ ސަލާމަތަށް ނުރައްކާވެ އެ ޖާސޫސީ އިދާރާގެ ޢަމަލީ އުސޫލުތައް ހާމަވި ކަމަށް ބުނެ އިޒަރޭލުގެ މިލިޓަރީ ސެންސަރަށް ޝަކުވާ ހުށަހަޅައިފައި ކަމަށް ދި އެސޯސިއޭޓެޑް ޕްރެސް އިން ރިޕޯޓުކޮށްފައިވެއެވެ.

ޔޫއޭއީއާ އިޒްރޭލާ ދެމެދު ގުޅުން ބަދަހިވެފައިވަނީ 2020 ވަނަ އަހަރު އެމެރިކާ މެދުވެރިވެގެން ސޮއިކުރި އެބްރަހަމް އެކޯޑްސް އިންނެވެ. އެ އެއްބަސްވުމުގެ ދަށުން ޢަރަބި ބައެއް ޤައުމުތަކާ އިޒްރޭލާ ދެމެދު ގުޅުން ޤާއިމުކުރިއެވެ. އެމެރިކާއިން އިޒްރޭލަށް ކަނޑައަޅާފައި ހުރި ސަފީރު މައިކް ހަކަބީ މެއި މަހު ބުނީ އީރާނުގެ ހަމަލާތަކުން ދިފާޢުވުމަށް އެހީތެރިވާން އިޒްރޭލުން ޔޫއޭއީއަށް އަޔަން ޑޯމް ވައިގެ ދިފާޢީ ނިޒާމާއި ސިފައިން ފޮނުވައިފައިވާ ކަމަށެވެ.

އޮކްޓޫބަރު ހަތެއްގައި ފަލަސްޠީނުގެ މުޖާހިދުން އިޒްރޭލުގެ ދެކުނުގައި ދިން ހަމަލާގައި 1195 މީހުން މަރުވެ ގާތްގަނޑަކަށް 250 މީހުން ރަހީނުކުރިއެވެ. އެ ހާދިސާއާ ގުޅިގެން އިސްތިއުމާރީ އިޒްރޭލުން ޣައްޒާއާ ދެކޮޅަށް ފެށި ގަތުލުޢާންމުގައި މިހާތަނަށް ފަލަސްޠީނުގެ 73،669 މީހުން ޝަހީދުކޮށްލައިފައިވެއެވެ.

އިޒްރޭލުގެ ނޫސް ހާރެޓްޒުން ސެޕްޓެމްބަރު ނުވައެއްގައި ރިޕޯޓުކުރި ގޮތުގައި ހަމަލާގެ ގާތްގަނޑަކަށް 10 ދުވަސް ކުރިން ޔޫއޭއީގެ ރައީސް ވަނީ ނަތަންޔާހޫއަށް ފޯނުން ގުޅައި ހަމާސްގެ ކުރީގެ ލީޑަރު ޔަޙްޔާ ސިންވާރު "ބޮޑު ސަޕްރައިޒެއް" ތައްޔާރުކުރާ ކަމުގެ އިންޒާރު ދީފައެވެ. އެ ރިޕޯޓުގައި އިތުރަށް ބުނެފައިވަނީ އެމްބީޒެޑް ކުރިން ވެސް ޝިން ބެޓަށް އެ މަޢުލޫމާތު ފޯރުކޮށްދީފައިވާ ކަމަށެވެ.

ނަމަވެސް ނަތަންޔާހޫގެ އޮފީހުން ވަނީ ހަމަލާގެ ކުރިން އެފަދަ މަޢުލޫމާތެއް ލިބުނު ކަމަށް ދެކޮޅު ހަދައިފައެވެ. 

ހަމާސް ހަމަލާގެ ކުރިން ލިބުނު އިންޒާރަށް ނަތަންޔާހޫ އިހުމާލުވި ކަމުގެ ތުހުމަތު ކުރެވެމުންދަނީ އޮކްޓޫބަރުގައި ބާއްވާ ކުނެސެޓް އިންތިޚާބަށް ކެމްޕެއިން ކުރަމުންދާ ދަނޑިވަޅެއްގައެވެ. ކުރީގެ އަސްކަރީ ޗީފް ގާދީ އައިޒެންކޮޓް ވަރުގަދަ ވާދައެއް ކުރަމުންދާ އިރު ޕޯލްތަކުން ނަތަންޔާހޫ ފަހަތުގައި އޮތް ކަމަށް ދައްކައެވެ.