ދައުލަތުގެ ގިނަ މަގާމުތަކެއް އަދާކުރައްވާފައިވާ ޑރ. މުހައްމަދު އަލީގެ ޖަނާޒާ މިރޭ އިޝާ ނަމާދަށް ފަހު ބާއްވާ ގޮތަށް ހަމަޖައްސައިފި އެވެ.

ޑރ. މުހައްމަދު އަލީ އަވަހާރަވީ އިއްޔެ ހަވީރު އައިޖީއެމްއެޗުގައި އެވެ. އެމަނިކުފާނު އަވަހާރަވީ ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށް ފަހު އެވެ.

Advertisement

އެމަނިކުފާނުގެ ޖަނާޒާ ބޭއްވުމަށް ހަމަޖެހިފައިވަނީ މިރޭ އިޝާނަމާދަށް ފަހު އިސްލާމީ މަރުކަޒުގައި އެވެ. މޫނު ދެއްކުން ހަވީރު 4:00 އިން ފެށިގެން އިސްލާމީ މަރުކަޒުގައި ކުރިޔަށް ދާނެ އެވެ.

އަވަހާރަވި އިރު ޑރ. މުހައްމަދު އަލީގެ އުމުރުފުޅަކީ 67 އަހަރެވެ.

ޑރ. މުހައްމަދު އަލީވަނީ ކޮންޓްރޯލާ އޮފް އިމިގްރޭޝަންގެ މަގާމާއި ރައީސް އޮފީހުގެ ކުރީގެ ޗީފް އޮފް ސްޓާފްގެ މަގާމު އަދާ ކުރައްވާފައިވެ އެވެ. އެމަނިކުފާނު ވަނީ އިސްލާމިކް މިނިސްޓްރީގެ ސްޓޭޓް މިނިސްޓަރުކަން ކުރައްވާފައި އެވެ.

ތިމާވެށީގެ ދާއިރާއިން ޕީއެޗްޑީ ހާސިލް ކުރައްވާފައިވާ މުހައްމަދު އަލީ ވަނީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމާއި ޑރ. މުހައްމަދު ވަހީދު ހަސަން މަނިކުގެ އިތުރުން އަބްދުﷲ ޔާމީންގެ ވެރިކަމުގައި ސަރުކާރުގެ އިސް މަގާމުތައް އަދާ ކުރެއްވި އެވެ.