ދިޔާ ތަކެތި ބުއިމަށް ބޭނުންކުރާ ޕްލާސްޓިކް ހޮޅި ރާއްޖެއަށް އެތެރެކުރުން ވަގުތީ ގޮތގުން ހުއްދަ ކުރީ ކަރުދާސް ހޮޅި ބޭނުންކުރުމުގައި ޢަމަލީ ދަތިތައް ކުރިމަތިވަމުންދާތީ ކަމަށް އެންވަޔަރަމެންޓު މިނިސްޓްރީން ބުނެފި އެވެ.

އެންވަޔަރަމެންޓު މިނިސްޓްރީން ނެރުނު ބަޔާނުގައި ބުނެފައިވާ ގޮތުގައި ކަރުދާސް ހޮޅިއަކީ ފޫދި ފެނަށް ގިރޭ ބޭނުންކުރާ ފަރާތްތަކަށް އުނދަގޫ އެއްޗެއް ކަމުގައި ޝަކުވާ ލިބެމުންދެއެވެ. އޭގެ އިތުރުން ކަރުދާސް ހޮޅި އުފެއްދުމުގައި އެ ހޮޅީގެ އެތެރެއަށް ޕްލާސްޓިކް ފަށަލައަކާއި ތެރެސް ލެވިފައި ހުރުމުގެ ސަބަބުން އެ ހޮޅި އެއްލައިލުމުން މައިކްރޯ ޕްލާސްޓިކް އުފެދުމުގެ ނުރައްކާ ބޮޑު ކަމަށް ވެސް އެ މިނިސްޓްރީން ބުނެފައިވެއެވެ.

Advertisement

ޕްލާސްޓިކް ހޮޅީގެ ބަދަލުގައި ތިމާވެށްޓާ ރައްޓެހި ފެންވަރު ރަނގަޅު ބަދަލެއް ތަޢާރަފުކުރުމަށް ވަގުތު ދިނުމުގެ ގޮތުން އެ ބާވަތް މަނާކުރާ އާ ތާރީޚަކީ ޖޫން 2031 ކަމުގައި ވަނީ ކަނޑައަޅައިފައެވެ.

ގަރާރަށް ގެނައި އިސްލާހުގައި ޕްލާސްޓިކް ހޮޅީގެ އިތުރުން ދެ ބާވަތެއް ހިމެނެއެވެ. އެއް ލީޓަރާއި 500 މިލިލީޓަރާ ދެމެދުގެ ޕްލާސްޓިކް ފުޅީގައި ބަންދުކޮށްފައި ހުންނަ ފެން އެތެރެކުރުން މަނާކުރާ ތާރީޚު ތިން ފަހަރެއްގެ މަތިން ފަސްކުރުމަށް ފަހު މިފަހަރު ކަނޑައެޅި އާ ތާރީޚަކީ ޑިސެމްބަރު 2029 އެވެ. ބައެއް ރަށްރަށުގައި ފެނުގެ ނިޒާމު ޤާއިމުނުކުރެވި އޮތުމާއި ނިޒާމު ހުރި ބައެއް ރަށްރަށުގައި ވެސް އެކަށީގެންވާ ޚިދުމަތް ފޯރުކޮށްނުދެވޭތީ ރައްޔިތުން އަދިވެސް ބޮޑަށް ބަރޯސާވަނީ ފުޅީގައި ބަންދުކުރި ފެނަށް ކަމަށް އެ މިނިސްޓްރީން ބުނެފައިވެއެވެ.

ތިންވަނަ ބަދަލެއްގެ ގޮތުން ތައްޔާރީ ބުއިންތައް މަނާކުރާ މިންގަނޑު 500 މިލިލީޓަރުން 250 މިލިލީޓަރަށް ވަނީ ކުޑަކޮށްފައެވެ. އެ މިނިސްޓްރީން ބުނީ 500 މިލިލީޓަރަށް ވުރެ ކުދި ފުޅީގައި ބަންދުކޮށްފައި ހުންނަ ބައެއް ތައްޔާރީ ބުއިންތައް ޚާއްޞަކޮށް އެތުލީޓުންނަށާއި ކުޑަ ކުދިންނަށް ޚާއްޞަ ބުއިންތައް އެތެރެކުރުމުގައި ކުދި އަދި މެދު ފަންތީގެ ވިޔަފާރިތަކަށް ބޮޑެތި ގޮންޖެހުންތައް ކުރިމަތިވަމުންދާ ކަމަށެވެ.

ރާއްޖެއަކީ މިފަދަ ބުއިންތައް އުފައްދާ ޤައުމަކަށް ނުވާތީ ރާއްޖޭގެ ބާޒާރަށް ޚާއްޞަކޮށް ބޭރުގެ ކުންފުނިތަކުން އުފެއްދުމުގެ ލައިން ބަދަލުކުރުމަކީ ވާނެ ކަމެއް ނޫން ކަމަށް ވެސް އެ ވުޒާރާއިން ފާހަގަކޮށްފައިވެއެވެ.

ތިމާވެށި ރައްކާތެރިކުރުމުގެ ދުރުރާސްތާ ސިޔާސަތުތައް ދަމަހައްޓަމުން ރައްޔިތުންނަށާއި ވިޔަފާރިތަކަށް ކުރިމަތިވާ ދަތިތަކަށް ދެމެހެއްޓެނިވި ހައްލެއް ހޯދުމުގެ ބޭނުމުގައި ގެނައި މި ބަދަލުގެ ދަށުން ކުނި މެނޭޖްކުރުމުގެ ޤާނޫނުގައި ކަނޑައެޅި 14 ބާވަތުގެ ސިންގަލް ޔޫސް ޕްލާސްޓިކް ތެރެއިން މި ތިން ބާވަތް ފިޔަވައި އެހެން ހުރިހާ ބާވަތެއް ރާއްޖެއަށް އެތެރެކުރުމާއި އުފެއްދުމާއި ބާޒާރަށް ނެރުން އަދިވެސް މަނާކޮށްފައި އޮތް ގޮތަށް ދެމިއެބައޮތެވެ.