މާލޭ ވިޔަފާރި ބަނދަރާ ގުޅޭ ބޭނުންތަކަށް ދެކުނު ހާބަރު ސަރަހައްދު ބޭނުންކުރުމަށްޓަކައި އެ ތަނުގައި ހިންގާ ފުޑްކޯޓް ޔުނިޓުތައް ހުސްކުރަން އެސްޓީއޯއިން ނޯޓިސް ފޮނުވައިފިއެވެ.

ފުޑްކޯޓުތައް ހުސްކުރަން ޖެހެނީ މާލޭ ވިޔަފާރި ބަނދަރު ތިލަފުއްޓަށް ބަދަލުކުރާއިރު އެ ސަރަހައްދުގައި ބައެއް ވަސީލަތްތައް ޤާއިމުކުރަން ރާވާފައިވާތީ ކަމަށް އެނގިފައިވެއެވެ. ތިލަމާލެ ބްރިޖް ބޭނުންކުރަން ފެށުމާ ގުޅިގެން ވެސް އެ ސަރަހައްދު އެކި ކަންކަމަށް ބޭނުންވާނެ ކަމަށް ވެއެވެ. އެހެން ނަމަވެސް މި ކަމާ ގުޅޭ ރަސްމީ ބަހެއް ލިބޭ ގޮތް ވަނީ ނުވެފައެވެ.

Advertisement

ޔުނިޓުތައް ހިންގާ ފަރާތްތަކަށް އެސްޓީއޯއިން ފޮނުވި ލިޔުމުގައި ބުނެފައި ވަނީ ދެ ފަރާތުގެ ދެމެދުގައި ހެދިފައިވާ އެއްބަސްވުމުގެ ދަށުން ނޯޓިސް ލިބޭ ދުވަހުން ފެށިގެން 90 ދުވަހުގެ ތެރޭގައި ޔުނިޓުތައް ހުސްކޮށް ހަވާލުކުރަން ޖެހޭނެ ކަމަށެވެ. އެ ތަނުގައި ކެފޭ ހިންގާ ބައެއް ފަރާތްތަކުން ބުނާ ގޮތުގައި ލިބިފައި ވަނީ ތިން މަސް ދުވަހުގެ މުހުލަތެކެވެ. ނަމަވެސް ހުރިހާ ފަރާތަކަށް އެއް މުއްދަތެއް ދިން ކަން ޔަގީނެއް ނޫނެވެ.

ގާތްގަނޑަކަށް 30 މިލިޔަން ރުފިޔާ ޚަރަދުކޮށްގެން ތަރައްޤީކުރި މި ފުޑްކޯޓު ރަސްމީކޮށް ހުޅުވީ 23 ޖުލައި 2018 ގައެވެ. ތިން ސައިޒެއްގެ 26 ޔުނިޓު ހިމެނޭ އެ ތަނުގައި 960 އަކަފޫޓާއި 1260 އަކަފޫޓު އަދި 1660 އަކަފޫޓުގެ ޖާގަތައް ހުރެއެވެ.

ފުޑްކޯޓު ތަރައްޤީކުރުމުގެ ކުރިން ވެސް އެ ސަރަހައްދަކީ ކެފޭތައް ހިންގަމުން ދިޔަ ތަނެކެވެ.