އިންޖީނިއަރުންގެ ދުވަހާ ގުޅުވައިގެން ތިލަމާލެ ބްރިޖުގެ މަސައްކަތް ބައްލަވައިލެއްވުމަށް ރައީސް ޑރ. މުޙައްމަދު މުޢިއްޒު މިއަދު ފުރަތަމަ ފަހަރަށް އެ ބްރިޖުގައި ފައިމަގުގައި މާލެއިން ވިލިމާލެއަށް ވަޑައިގެންފިއެވެ.

މި ހަރަކާތުގައި ރައީސްގެ އިތުރުން ހައުސިން މިނިސްޓަރު ޑރ. ޢަބްދުﷲ މުއްޠަލިބާއި ރާއްޖޭގައި ހުންނަވާ އިންޑިއާ ސަފީރު ބާލަސުބްރަމާނިއަމް އާއި ބްރިޖުގެ ކޮންޓްރެކްޓަރު އެފްކޮންސް ކުންފުނީގެ އިސް ބޭފުޅުން ބައިވެރިވެވަޑައިގެންނެވިއެވެ. މާލެއާއި ވިލިމާލެއާ ދެމެދު ޕްރީ-ކާސްޓް ސެގްމަންޓުތައް ގުޅުވައިލުމުގެ ހުރިހާ މަސައްކަތެއް މިދިޔަ ހަފުތާގައި ވަނީ ނިމިފައެވެ.

ބްރިޖުގައި ހުންނަވައި ރައީސް ވިދާޅުވީ މި ކާމިޔާބީއަށް ވާޞިލުވެވުނީ ރާއްޖެއާއި އިންޑިއާއާ ދެމެދު ކުރެވުނު މަތީ ފެންވަރުގެ މަޝްވަރާތަކުގެ ނަތީޖާއެއްގެ ގޮތުން ކަމަށެވެ. އެ މަނިކުފާނު ވިދާޅުވީ ކުރިއަށް އޮތް އަހަރެއްހާ ދުވަހުގެ ތެރޭގައި ބްރިޖުގެ މަސައްކަތް މުޅިން ނިންމައިލެވޭނެ ކަމަށް އުއްމީދުކުރައްވާ ކަމަށެވެ.

އެމަނިކުފާނު ވިދާޅުވީ މި ބްރިޖުގެ ނިމުން ވެގެންދާނީ މުޅި ގްރޭޓާ މާލޭ ސަރަހައްދުގެ ބޮޑު ކުރިއެރުމަކަށް ކަމަށެވެ.

ރައީސް ވަނީ ބޮޑުވަޒީރު ނަރެންދުރަ މޯދީއާއި އިންޑިއާ ސަރުކާރުން މި މަޝްރޫޢަށް ދެއްވާ އެއްބާރުލެއްވުމަށް ޝުކުރު އަދާކުރައްވައިފައެވެ. އެ މަނިކުފާނު ވިދާޅުވި ގޮތުގައި 2023 ވަނަ އަހަރު ދުބާއީގައި ބޭއްވި 23 ވަނަ ކޮޕް ސަމިޓުގެ ހަވާސާގައި ބޮޑުވަޒީރު މޯދީއާ ފުރަތަމަ ބައްދަލުކުރެއްވި އިރު ބްރިޖުގެ މަސައްކަތް އަވަސްކުރެއްވުމަށް އެ މަނިކުފާނު އަމިއްލަފުޅަށް ހުށަހެޅުއްވިއެވެ.

އެ ބައްދަލުކުރެއްވުމާ ގުޅިގެން ދެ ޤައުމުން މަތީ ފަންތީގެ ކޮމިޓީއެއް އެކުލަވައިލައި ރާއްޖޭގެ އުމްރާނީ ތަރައްޤީއާ ބެހޭ ވުޒާރާއާ ގުޅިގެން މަޝްރޫޢު ހަލުވިކުރުމަށް ގިނަ މަސައްކަތްތަކެއް ކޮށްފައިވާ ކަމަށް ރައީސް ވިދާޅުވިއެވެ.

އިންޑިއާ ސަފީރު ބާލަސުބްރަމާނިއަމް ވިދާޅުވީ ދިވެހި ސަރުކާރާ ވަރަށް ގާތުން ގުޅިގެން މި މަޝްރޫޢުގެ މަސައްކަތް ކުރިއަށް ގެންދާ ކަމަށެވެ. ސަފީރު ފާހަގަކުރެއްވި ގޮތުގައި މިއީ އިންޑިއާ ސަރުކާރުން އެ ޤައުމުން ބޭރުގައި ހިންގާ އުމްރާނީ ތަރައްޤީގެ އެންމެ ބޮޑު އެއް މަޝްރޫޢެވެ.

ރައީސް ވިދާޅުވި ގޮތުގައި ތިލަމާލެ ބްރިޖުގެ ފެންވަރާ މެދު ޝައްކު ކުރައްވާނެ ޖާގައެއް ނެތެވެ. ބްރިޖުގެ ކޮލިޓީ ބެލެހެއްޓުމުގެ ޒިންމާ ހަވާލުކޮށްފައި ވަނީ ސިނަމާލެ ބްރިޖުގެ ކޮލިޓީ ވެސް ބެލެހެއްޓި ދުނިޔޭގައި އެ ދާއިރާގެ އެންމެ ކުރީ ސަފުގައި އޮތް އެއް ކުންފުނި ކަމުގައިވާ އާރޫޕާ ކަމަށް ރައީސް ވިދާޅުވިއެވެ.

މާލެ ވިލިމާލެ ގުޅީފަޅު އަދި ތިލަފުށި 6.74 ކިލޯމީޓަރުގެ ބްރިޖަކުން ގުޅުވައިލުމަށް ކުރީ ސަރުކާރުގައި ފެށި މި މަޝްރޫޢަކީ 500 މިލިއަން ޑޮލަރު (7.7 ބިލިއަން ރުފިޔާ) ގެ މަޝްރޫޢެކެވެ. މީގެ ތެރެއިން 400 މިލިއަން ޑޮލަރަކީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ދޫކޮށްފައިވާ ލޯނެކެވެ. ބާކީ 100 މިލިއަން ޑޮލަރު ދީފައި ވަނީ އިންޑިއާ ސަރުކާރުގެ ހިލޭ އެހީގެ ގޮތުގައެވެ.