މި ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫއުގެ ދަށުން މިހާރު ފޯމް ހުށަހަޅާފައިވާ ފަރާތްތަކުގެ ތެރެއިން ފްލެޓު ލިބޭ މީހުންގެ ލިސްޓު އަންނަ ޑިސެމްބަރު މަހު ނެރެ، 2028 ވަނަ އަހަރު އޮގަސްޓު މަހު ފްލެޓުތައް ހަވާޅު ކުރާނެ ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވެއްޖެ އެވެ.

"ބޯހިޔާވަހިކަން އެންމެނަށް" ސިޔާސަތުގެ ދަށުން މާލެ ސަރަހައްދުން ގޯއްޗާއި ފްލެޓަށް އެދި ހުށަހަޅަން ހުޅުވާލި މުއްދަތު މިދިޔަ ޖޫން މަހުގެ 15 ގައި ހަމަވިއިރު، ފޯމު ހުށަހަޅަން ގާއިމްކޮށްފައިވާ "ބޯހިޔާވަހިކަން ޕޯޓަލް" އަށް 58،505 ފޯމު ހުށަހަޅާފައިވެ އެވެ. އެއީ ފްލެޓަށް އެދި ހުށަހެޅި 35،930 ފޯމާއި ގޯއްޗަށް އެދި ހުށަހެޅި 22،575 ފޯމެވެ.

Advertisement

މީގެ ތެރެއިން ފްލެޓުތައް އެޅުމުގެ އެއްވެސް މަސައްކަތެއް ނުކުރާ ކަމަށްބުނެ ގިނަ ބަޔަކު ދަނީ ފާޑުކިޔަމުންނެވެ.

ރޭ ޓީވީއެމްގައި ވާހަކަދައްކަވަމުން އެ ފާޑުކިޔުންތަކާއި ގުޅޭގޮތުން ނާޒިމް ވިދާޅުވީ ފްލެޓުތަކުގެ އަމަލީ މަސައްކަތް ފެށުމުގެ ކުރިން ކުރަންޖެހޭ ވަރަށް ގިނަ މަސައްކަތްތައް ހުންނަ ކަމަށެވެ. އޭގެ ތެރޭގައި ޑިޒައިން ފައިނަލް ކުރުމާއި އީއައިއޭ ހެދުންފަދަ ކަންކަން އޭނާ ފާހަގަ ކުރެއްވި އެވެ.

ނާޒިމް ވިދާޅުވީ  ފޯމުތަކުގެ ވެރިފިކޭޝަން މަރުހަލާ މިހާރު ކުރިއަށްދާއިރު ހުށަހަޅާފައިވާ މައުލޫމާތުތަކާއި އެ އެ މިނިސްޓްރީ އަށް ސަރުކާރުގެ އިދާރާތަކާއި ކައުންސިލުތަކުން ފޮނުވާފައިވާ މައުލޫމާތުތަކަށް ރިއާޔަތްކޮށް، އެޕްލިކޭޝަން ފޯމުގައި ބަޔާންކޮށްފައިވާ މައުލޫމާތުގައި ފުށުއެރުމެއްވާ ނަމަ އެކަން "ބޯހިޔާވަހިކަން" ޕޯޓަލް މެދުވެރިކޮށް އެޕްލިކަންޓަށް އަންގާނެ ކަމަށެވެ. އެކަންކަން އިސްލާހުކުރުމަށް ވަނީ ހަތް ދުވަހުގެ މުއްދަތެއް ދީފަ އެވެ.

އޭނާ ވިދާޅުވީ މިހާރު ކްރޮސް ވެރިފިކޭޝަންގެ މަސައްކަތްތައް ކުރިއަށްދާއިރު ހުރިހާ ކަމެއް ވެސް އަންގާނީ ޕޯޓަލް މެދުވެރިކޮށެވެ. އެހެންވެ، ގަވާއިދުން ބޯހިޔާވަހިކަން ޕޯޓަލް ބެލުމަށް އެދިވަޑައިގަތެވެ. އަދި ފަހު ވަގުތަށް މަޑުކޮށްގެން ނުތިބުމަށް އިލްތިމާސް ކުރެއްވި އެވެ.

އޭނާ ވިދާޅުވީ މިހާރު ކުރިޔަށްދާގޮތަށް ފްލެޓު އެޅުމުގެ މަސައްކަތްތައް ދާނަމަ 2028 ގެ އޯގަސްޓް މަހުގެ ތެރޭގައި އެ ޔުނިޓްތައް ނިންމައި، ރައްޔިތުންނާ ހަވާލުކުރުމަކީ ސަރުކާރުގެ އަމާޒެއްކަމަށެވެ. މިހާރު މަސައްކަތް ކުރިއަށްދާ ގޮތުން އެ ޝެޑިއުލާ އެއްގޮތަށް އެކަން ހާސިލުވާނެ ކަމަށެވެ.