އިންފޮމޭޝަން ކޮމިޝަނަރުގެ މަގާމަށް ކުރިން އެ މަގާމު އަދާކުރެއްވި އަބްދުލްއަޒީޒު ޖަމާލް އަބޫބަކުރު އައްޔަންކުރެއްވުމަށް ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް މިއަދު ފޮނުއްވައިފިއެވެ.

އެ މަގާމަށް ބޭފުޅަކު އައްޔަން ކުރަން ނަންފޮނުވީ މިހާރުގެ އިންފޮމޭޝަން ކޮމިޝަނަރު އަހުމަދު އާހިދު ރަޝީދުގެ ދައުރު އަންނަ މަހު ހަމަވާތީ އެވެ.

Advertisement

ރައީސް ފޮނުއްވި ސިޓީފުޅު މިއަދުގެ ޖަލްސާގައި ތަޅުމަށް އިއްވުމަށްފަހު މި މައްސަލަ ދިރާސާކުރުމަށް ވަނީ މިނިވަން މުއައްސަސާތަކުގެ ކޮމިޓީއަށް ފޮނުވައިފައެވެ. އެ މަގާމަށް ކުރިމަތިލުމުގެ ފުރުސަތު ހުޅުވައިލުމުން ނަން ހުށަހެޅީ ޖުމްލަ ކިތައް ފަރާތުންކަމެއް ހާމަކޮށްފައެއް ނުވެއެވެ.

ހެރިޓޭޖް މިނިސްޓްރީގެ ސްޓޭޓް މިނިސްޓަރުގެ މަގާމުގައި މިވަގުތު ހުންނެވި އަބްދުލްއަޒީޒަކީ މައުލޫމާތު ހޯދައި ލިބިގަތުމުގެ ޤާނޫނުގެ ދަށުން ފުރަތަމަ ފަހަރަށް އެ މަގާމަށް އައްޔަންކުރެވުނު ބޭފުޅެވެ.

ޖުލައި 22 2019 ގައި ދައުރު ހަމަވެ އެ މަގާމުން ވަކިވެވަޑައިގެންނެވުމުގެ ކުރިން އޭނާ ވަނީ ރައްޔިތުންގެ މަޖިލީހުގެ މާވަށު ދާއިރާގެ ގޮނޑި ވެސް ފުރުއްވައިފައެވެ. އޭގެ އިތުރުން ދިވެހި ބަހާ ބެހޭ އެކަޑަމީގައި މަސައްކަތްކުރައްވައި ބަހާ ގުޅޭ ފޮތްތައް ވެސް ލިޔުއްވައިފައިވެއެވެ.

އާހިދު އެ މަގާމަށް އައްޔަންކުރެވުނީ ސެޕްޓެމްބަރު 6 2021 ގައެވެ. އެ ބޭފުޅާގެ ފަސް އަހަރުގެ ދައުރު ހަމަވާނީ އަންނަ މަހުގެ ހަ ވަނަ ދުވަހަށެވެ.

މައުލޫމާތު ހޯދައި ލިބިގަތުމުގެ ޤާނޫނުގެ ދަށުން އިންފޮމޭޝަން ކޮމިޝަނަރުގެ އޮފީސް އުފެއްދީ ޖުލައި 13 2014 ގައެވެ.