ތ. މަޑިފުށިން ފުރައިގެން ދަތުރު ކުރަމުން ދަނިކޮށް ގއ. ކުޑަލަފަރީ ކައިރިން ބަންޑުންޖަހާލައި އަޑިއަށް ދިޔަ "ފްރެންޑް 4" ސަޕްލައި ދޯނިން ގެއްލުނު ތިން މީހުން ހޯދުމަށް ހުވަދޫ ކަނޑުގެ ބޮޑު ބައެއް ބަލައި ނިންމާފައިވާ ކަމަށް އެމްއެންޑީއެފުން ބުނެފި އެވެ.

މި ހާދިސާ ހިނގާފައިވަނީ މިމަހުގެ ހަ ވަނަ ދުވަގެ ރޭ ކުޑަލަފަރީގެ އިރުއުތުރުން އަށް ނޯޓިކަލް މޭލު ބޭރުންނެވެ. އެ ވަގުތުން ފެށިގެން ސިފައިން ދަނީ މެދުކެނޑުމެއް ނެތި ގެއްލުނު ފަރާތްތައް ހޯދުމުގެ މަސައްކަތް ކުރަމުންނެވެ.

Advertisement

އެގޮތުން ވައިގެ މަގުން 9920 އަކަ ނޯޓިކަލް މޭލާއި ކަނޑުމަގުން 2790.10 އަކަ ނޯޓިކަލް މޭލުގެ ސަރަޙައްދެއް މިހާތަނަށް ބެލިއްޖެ ކަމަށް އެމްއެންޑީއެފުން ބުނެފިއެވެ. ދޯނި އަޑިއަށް ގޮސްފައި އޮތީ ހުވަދޫ ކަނޑުގެ ތެރެއަށް ކަމަށްވާއިރު އެ ސަރަޙައްދުގެ ފުންމިން 1600 މީޓަރަށް ވުރެ ބޮޑުވާނެ ކަމަށް ބެލެވެއެވެ. އެއީ އަސްކަރީ ސަބްމެރީނެއް ވެސް އޮޕަރޭޓް ނުކުރެވޭހާ ފުން ހިސާބެއް ކަމަށް އެމްއެންޑީއެފުން ބުންޏެވެ.

ގެއްލުނު މީހުން ހޯދުމުގެ މަސައްކަތުގައި އިންފްރާރެޑް ސެންސަރު ހަރުކޮށްފައިވާ ޔޫއޭވީ ޑްރޯންތައް ދަނީ ބޭނުންކުރަމުންނެވެ. އެމްއެންޑީއެފުން ބުނީ ރޭގަނޑު ވެސް ކަނޑުމަތީގައި އެއްޗެއް އޮތްތޯ ދެނެގަތުމުގެ ޤާބިލުކަން ލިބިފައިވާ މި ޑްރޯންތައް މެދުވެރިކޮށް ހާދިސާ ހިނގި ރެއިން ފެށިގެން ބަލަމުން ދިޔަ ކަމަށެވެ. އެ މަސައްކަތުން ދޯނި ފެތުމާ ގުޅިގެން ކަނޑުމަތީ އޮޔާދާ ގޯންޏާއި އެ ނޫން ވެސް ބައެއް ތަކެތި ދެނެގަނެވިފައިވާ ކަމަށް ސިފައިން ބުނެފައިވެއެވެ.

މީގެ އިތުރުން އޮސްޓްރޭލިއާ ސަރުކާރުން ހަދިޔާކޮށްފައިވާ ކޯސްޓްގާޑް ޝިޕް އިމާދުއްދީނާއި ކޯސްޓްގާޑުގެ އިންޓަސެޕްޓާ ކްރާފްޓްތަކާއި ހާބަރ ޕެޓްރޯލް ލޯންޗާއި ޕޮލިސް ލޯންޗު ބޭނުންކޮށްގެން ވެސް ބެލިފައިވެއެވެ. ހުވަދޫ ކަނޑުގެ ދެކުނުން ގއ. އަތޮޅުގެ ފަރުތަކާއި އުތުރުން ލ.އަތޮޅުގެ ފަރުތައް ވެސް ބެލިފައިވާ ކަމަށާއި ހުވަދޫ ކަނޑުގެ ސަރަޙައްދު މާދަމާގެ މަސައްކަތުން އެއްކޮށް ބަލައި ނިމޭނެ ކަމަށް އެމްއެންޑީއެފުން ބުނެފައިވެއެވެ.

މި ހާދިސާ ހިނގި ރޭ ދޯނި ފެތެމުން ދިޔަ ވަގުތު ފުންމާލި ހުރިހާ އެންމެން ސަލާމަތްކުރެވިފައިވާ ކަމަށް ސަލާމަތްވީ މީހުންގެ ފަރާތުން މަޢުލޫމާތު ލިބިފައިވާ ކަމަށް ބުނެ އެވެ. ސަލާމަތްވީ މީހުންގެ ތެރޭގައި ކޯސްޓްގާޑުގެ ހާބަރ ޕެޓްރޯލް ލޯންޗުގެ ކްރޫއަކާއި އެމްއެންޑީއެފްގެ އޯގްޒިލަރީ ފަޔަރމަނަކާއި ފުލުހެއް ހިމެނެއެވެ. ދޯނީގެ ތިން ފަޅުވެރިން ވެސް ސަލާމަތްވެފައިވެއެވެ.

ގެއްލިފައިވަނީ ދޯނީގެ ކެޕްޓަނާއި ސިފައިންގެ މީހަކާއި ފުލުހެކެވެ. ސަލާމަތްވީ ފަރާތްތަކުން ބުނެފައިވާ ގޮތުގައި ދޯނީގެ ކެޕްޓަން މުޙައްމަދު ޙަމްދޫން ދޯނި ސަލާމަތްކުރެވޭތޯ އެންމެ ފަހު ވަގުތާ ޖެހެންދެން މަސައްކަތް ކުރި ނަމަވެސް ދޯނި އަޑިއަށް ދިޔައީ ވަރަށް ކުއްލި ގޮތަކަށެވެ.

ސަލާމަތީ ބާރުތަކުން ހާދިސާގައި ދައްކާފައިވާ ހިތްވަރު ވެސް އެމްއެންޑީއެފުން ފާހަގަކޮށްފައިވެއެވެ. ކޯސްޓްގާޑުގެ ޑައިވަރ ސާޖަންޓް އަސްރާރު ޢަލީ ހުވަދޫ ކަނޑުގެ ގަދައިގައި ދެ ބިދޭސީން ސަލާމަތްކުރުމަށް ކުރި މަސައްކަތާއި ދިވެހި އަސްކަރިއްޔާގެ ސްޓާފް ސާޖަންޓް އިބްރާހީމް އަޙްމަދާއި ޕޮލިހުންގެ ސާޖަންޓް ޢަލީ ނާފިޢު އާއި ސާޖަންޓް ޢަލީ ސައިފް އަދި އޯގްޒިލަރީ ފަޔަރމަން ޢަބްދުﷲ ޝަފީޤުގެ ހިތްވަރުގަދަ މަސައްކަތް ްއެމްއެންޑީއެފުން ފާހަގަ ކުރި އެވެ.

މި ހާދިސާ ހިނގިތާ އަށް ދުވަސް ފާއިތުވެފައިވާއިރު ގެއްލުނު ތިން މީހުން ހޯދުމުގެ މަސައްކަތް ސިފައިން ހުއްޓުމެއް ނެތި ކުރިއަށް ގެންދާ ކަމަށް ބުނެފައިވެ އެވެ.