މިހާރު ކުރިޔަށްދާ ބިޔަ މަޝްރޫއުތަކުގެ ތެރެއިން ތިލަމާލޭ ބްރިޖުގެ މަސައްކަތް މާ ލަސްތަކެއް ނުވެ ނިންމާލެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް އޮފީހުން ކުރިއަށްގެންދާ "ދަ ޕަލްސް" ޕޮޑްކާސްޓްގައި ރައީސް ވިދާޅުވީ ތިލަމާލެ ބްރިޖް މަޝްރޫއުއަކީ ކުރީ ސަރުކާރުގައި ހަމަޖެހި ފެށުނު މަޝްރޫއުއެއް ނަމަވެސް ދެ އަހަރު ފާއިތުވެދިޔައިރު އެކަށީގެންވާވަރުގެ އެއްވެސް މަސައްކަތެއް ކުރެވިފައި ނެތް ކަމަށެވެ. ރައީސް ވިދާޅުވީ މި ސަރުކާރު ފެށުނު އިރުގައި މާލެއާ ވިލިމާލެއާ ދޭތެރޭގައިވެސް އެއްވެސް މަސައްކަތެއް ނުކުރެވޭ ކަމަށެވެ.

Advertisement

އެމަނިކުފާނު ވިދާޅުވީ ތިލަމާލެ ބްރިޖު މަޝްރޫއުއަކީ މި ސަރުކާރުން ސުމަކުން ފެށި މަޝްރޫއުއެކޭ ބުނެވިދާނެ ކަމަށެވެ. ރައީސް ވަނީ ބްރިޖު މަޝްރޫއު މިހާރު ކުރިއަށްދާ ގޮތުގައި ކުރިއަށްދާނަމަ ލަސްތަކެއް ނުވެ އެ މަޝްރޫއު ނިމޭނެ ކަމަށް ވިދާޅުވެފަ އެވެ.

އެކަމަށް އިންޑިއާ ސަރުކާރުން ފުރިހަމައަށް އެއްބާރުލުން ދޭ ކަމަށާއި ދެ ގައުމުގެ މެދުގައި އޮތް ގުޅުމާއެކު ތިލަމާލެ ބްރިޖް މަޝްރޫއު ހަލުވި ސްޕީޑްގައި ކުރިއަށްދާ ކަމަށް ވިދާޅުވި އެވެ.

މި މަޝްރޫއުގެ ދަށުން މިހާރު ވިލިމާލެ އާއި މާލެ އާއި ގާތްގަނޑަކަށް ގުޅާލާއި ނިމިފައިވާއިރު ގުޅީފަޅާއި ވިލިމާލެއާ ގުޅާލުމުގެ މަސައްކަތްވެސް ގާތްގަނޑަކަށް ވަނީ ނިމިފައި އެވެ.

މި ޕޮޑްކާސްޓުގައި ރައީސް އިތުރަށް ވިދާޅުވީ ސަރުކާރުން ފަށާފައިވާ ބޮޑެތި މަޝްރޫއުތައް ނިމޭ އަހަރަކަށް އަންނަ އަހަރު ވާނެ ކަމަށެވެ.