2028 ވަނަ އަހަރުގެ ރިޔާސީ އިންތިޚާބަށް އެމްޑީޕީން ކެންޑިޑޭޓަކު ހޮވުމަށް ބާއްވާ ޕްރައިމަރީގައި ވާދަކުރައްވާނެކަން އިއުލާނު ކުރައްވައި، އެ ޕާޓީގެ ރައީސް ކަމުން ޢަބްދުﷲ ޝާހިދު އިސްތިއުފާ ދެއްވައިފިއެވެ.

ރިޔާސީ ޕްރައިމަރީގައި ވާދަ ކުރައްވާނެ ކަން އިއުލާނު ކުރެއްވީ މިރޭ އައްޑު ސިޓީ ހިތަދޫގައި ކެމްޕެއިން ފެށުމުގެ ގޮތުން ބޭއްވި ޖަލްސާގައި އެވެ. މި ރަސްމިއްޔާތުގައި ޝާހިދު ވިދާޅުވީ އިޤުތިޞާދީ އަދި އިޖުތިމާޢީ ގިނަ މައްސަލަތަކެއް ކުރިމަތިވެ ރައްޔިތުން ދަތި ޙާލެއްގައި ތިބި ކަމަށެވެ.

Advertisement

އެ ޙާލަތު ރަނގަޅު ކުރެވޭނީ އެމްޑީޕީއަށް ކަމަށާއި ރައްޔިތުން ބޭނުންވި ކޮންމެ ބަދަލެއް ގެނައުމުގެ މޭސްތިރީންނަކީ އެ ޕާޓީގެ މެންބަރުން ކަމަށް ވެސް ވިދާޅުވިއެވެ. ރިޔާސީ ޕްރައިމަރީގައި ނުކުންނެވުމުގެ މަޤުޞަދަކީ 2028 ގެ އިންތިޚާބު ޕާޓީއަށް ކާމިޔާބުކޮށްދެއްވުން ކަމަށާއި ކޮންމެ ފިކުރެއްގެ މެންބަރުން ގޮވައިގެން މަސައްކަތް ކުރެއްވުމުގެ ޤާބިލުކަން ލިބިވަޑައިގެންފައިވާ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ޕާޓީގެ ރައީސް ކަމުން އިސްތިއުފާދެއްވީ އެތެރޭގެ އިންތިޚާބެއްގައި ވާދަކުރައްވާއިރު ޕާޓީގެ އިސް މަޤާމެއްގައި ހުންނެވުމަކީ ގަބޫލުފުޅު ކުރައްވާ އުސޫލު ނޫން ކަމަށް ވާތީ ކަމަށެވެ. ޑިމޮކްރެސީގެ ރީތި ހަމަތައް ދެމެހެއްޓުމަކީ އެމްޑީޕީގެ ސިފައެއް ކަމަށާއި ޕާޓީ ތެރޭގައި މިނިވަން އަދި ހަމަހަމަ އިންތިޚާބީ ފުރުޞަތުތައް ކަށަވަރު ކުރަން ޖެހޭ ކަމަށް ވިދާޅުވިއެވެ.

ޝާހިދުގެ ކެމްޕެއިން ފެށުމަށް އައްޑޫ ސިޓީގައި ބޭއްވި ރަސްމިއްޔާތު -- ދުވަސް ފޮޓޯ

ޝާހިދުގެ ކެމްޕެއިން ފެށުމަށް އައްޑޫ ސިޓީގައި ބޭއްވި ރަސްމިއްޔާތު -- ދުވަސް ފޮޓޯ

ޝާހިދުގެ ކެމްޕެއިން ފެށުމަށް އައްޑޫ ސިޓީގައި ބޭއްވި ރަސްމިއްޔާތު -- ދުވަސް ފޮޓޯ

ޝާހިދުގެ ކެމްޕެއިން ފެށުމަށް އައްޑޫ ސިޓީގައި ބޭއްވި ރަސްމިއްޔާތު -- ދުވަސް ފޮޓޯ

ޝާހިދަކީ ކުރީގެ ރައީސް މައުމޫން ޢަބްދުލްޤައްޔޫމުގެ ވެރިކަމުގައި ސިޔާސީ ޙަޔާތް ފައްޓަވައި ދިވެހި ރައްޔިތުންގެ ޕާޓީ (ޑީއާރުޕީ) ގައި އިސްކޮށް ޙަރަކާތްތެރިވެވަޑައިގެންނެވި ބޭފުޅެކެވެ. ރައީސް މައުމޫނާއި ކުރީގެ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ފޮރިން މިނިސްޓަރުކަމާއި ރައްޔިތުންގެ މަޖިލީހުގެ ރައީސްކަން ވެސް ޝާހިދު ވަނީ ކުރައްވާފައެވެ.