އިނގިރޭސިވިލާތުގެ ކުރީގެ ރާނީ އެލިޒަބަތް ދޭއްގެ އެންމެ ހަގު މާމަ ދަރިކަލުން، ޕްރިންސް ޖޭމްސް އުމުރުން 18 އަހަރުވެ، ޔުނިވާސިޓީއަށް ވަންނަން ތައްޔާރުވުމާއި އެކު ޝާހީ ލަގަބު ދޫކޮށްލަން ނިންމާނެކަމަށް ބެލެވެން ފަށައިފި އެވެ.

ޝާހީ ގަނޑުވަރު ބަކިންހަމް ޕެލަސްއިން ނެރެނު ބަޔާނެއްގައި ބުނެފައިވަނީ ޕްރިންސް އެޑްވަޑާއި ޑަޗެސް ސޯފީގެ ދަރިކަލުން ޖޭމްސް މި މަހު އޭލެވެލް ނިންމައި އިމްތިހާނުން މަތީ މާކްސް އެއް ލިބިފައިވާ ކަމަށެވެ. އަދި ޗުއްޓީއެއް ނުނަގައި އަންނަ މަހު އިނގިރޭސިވިލާތުގެ ގްލޮސެސްޓާޝަޔާގެ ސިރެންސެސްޓާގައި ހުންނަ ރޯޔަލް އެގްރިކަލްޗަރަލް ޔުނިވާސިޓީގައި މަތީ ތައުލީމަށް ކިޔަވާ ވިދާޅުވާން ފަށާނެ ކަމަށެވެ.

އެ ކޯހަކީ ގޯތި ގެދޮރާއި ބިމާއި މުދާ ބެލެހެއްޓުމާއި ބެހޭ ދާއިރާގެ ކޯހެކެވެ. އެ ކޯހުގައި ދަނޑުވެރިކަން، ރޫރަލް ޕްރެކްޓިސް ޕްލޭނިން ޤާނޫނީ ދާއިރާ ވެލުއޭޝަން އަދި ބިލްޑިން ކޮންސްޓްރަކްޝަން ފަދަ މާއްދާތައް ކިޔަވާނެ ކަމަށްބުނެފައިވެ އެވެ. 

ޖޭމްސް ވެވަޑައިގަންނަވާނީ ރޯޔަލް އެގްރިކަލްޗަރަލް ޔުނިވާސިޓީގައި ކިޔަވައިވިދާޅުވާ ޝާހީ ޢާއިލާގެ ފުރަތަމަ ބޭފުޅާއަށެވެ.

ރިޕޯޓުތައް ބުނާގޮތުގައި ޖޭމްސް ކިޔަވާ ދާއިރާއަށްވުރެ ބޮޑަށް ޝާހީ ގަނޑުވަރުގެ ބަޔާނުން އެންމެ ބޮޑަށް އަޅައިގަންނަ ކަމަކަށް ފާހަގަވީ ޖޭމްސް ސިފަކޮށްފައި ވަނީ ހަމައެކަނި "އާލް އޮފް ވެސެކްސް"ގެ ގޮތުގައި ކަމެވެ. ޝާހީ ލަޤަބު ކަމަށްވާ "ހިޒް ރޯޔަލް ހައިނެސް" ގެ އިއްޒަތް ބޭނުންކޮށްފައެއް ނުވެ އެވެ.

ރިޕޯތުތައް ބުނާގޮތުގައި ޖޭމްސްގެ ދައްތަ އުމުރުން 22 އަހަރުގެ ލޭޑީ ލޫއީޒް ވެސް މިދިޔަ މަހު ޔުނިވާސިޓީ އޮފް ސެއިންޓް އެންޑްރޫޒުން ގްރެޖުއޭޓް ވިއިރު ބޭނުންކުރީ "ލޫއީޒް މައުންޓްބެޓަން-ވިންޒާ" ގެ ނަމެވެ. ޝާހީ ލަޤަބެއް ބޭނުމެއް ނުކުރެ އެވެ.

މީގެ ކުރިން 2020 ވަނަ އަހަރު އެ ދެބެންގެ މަންމަ ސޯފީ މީޑިއާގައި ބުނެފައިވަނީ އެ އާއިލާ އަކީ ދިރިއުޅުމަށް މަސައްކަތް ކުރާ ބަޔަކަށް ވާން ބޭނުންވާ ކަމަށެވެ. އަދި ދެ ކުދިން ބޮޑުވާން ބޭނުންވަނީ އެ އިހުސާސްގައި ކަމަށާއި 18 އަހަރުވުމުން ޝާހީ ލަގަބު ބޭނުން ކުރާނެ ކަމަކީ ނާދިރު ކަމެއް ކަމަށެވެ.

ކިޔެވުން ފެށުމުގެ ކުރިން ޕްރިންސް ޖޭމްސް މި ހޫނު މޫސުމުގައި ރަސްގެފާނު ޗާލްސްގެ ސެންޑްރިންހަމް އެސްޓޭޓުގައި ދަނޑުވެރިކަމުގެ ޢަމަލީ މަސައްކަތް ކުރި ކަމަށް ރިޕޯޓުތައް ބުނެ އެވެ. ޝާހީ ބޮޑެތި ރަސްމިއްޔާތުތަކުގައި ފެނިގެންދިޔަ ޖޭމްސް ޓްރެކްޓަރު ދުއްވުމާއި ބުރަ މަސައްކަތުގައި ބައިވެރިވެ އެތަނުގެ މުވައްޒަފުން ހައިރާން ކޮށްލިކަމަށްވެ އެވެ. 

ޖޭމްސްގެ އިތުރުން ކުރީގެ ރާނީގެ މާމަ ދަރިކަނބަލުންނާއި ދަރިކަލުން ދަނީ ޝާހީ ލަގަބު ދޫކޮށްލަވަމުންނެވެ. އެގޮތުން ރަސްގެފާނު ޗާލްސްގެ ދަރިކަލުން ހެރީ ވެސް ވަނީ ލަގަބާއި ޝާހީ އާއިލާ ދޫކޮށްލައްވާފައި އެވެ. އަދި ރާނީގެ ދަރިކަނބަލުން ޕްރިންސެސް އެނީގެ ދަރިކަނބަލުންނަކަށްވެސް ޝާހީ ލަގަބެއް ނުދެއްވަ އެވެ.

ޕްރިންސެސް އެނީ ވިދާޅުވެފައިވަނީ އެ ލަގަބަކީ ގެއްލުންތަކެއް ލިބޭ ލަގަބެކެވެ. ރާނީ އެލިޒަބަތުގެ އަށް މާމަ ދަރިކަލުންގެ ތެރެއިން މިހާރު ފުލް ޓައިމް ޝާހީ ޒިންމާ އަދާކުރައްވަނީ ހަމައެކަނި ޕްރިންސް ވިލިއަމެވެ.