އީރާނުގެ ރައީސް މަސްޢޫދު ޕެޒެޝްކިއާން އިންޑިއާއަށް ވަޑައިގަންނަވާނެ ކަމަށް އީރާނު މީޑިއާއިން ރިޕޯޓުކޮށްފި އެވެ.

އޭނާގެ މި ދަތުރުފުޅަކީ އަންނަ މަހު އިންޑިއާގެ ވެރިރަށް ނިއު ދެއްލީގައި ބާއްވާ ބްރިކްސް ސަމިޓުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. އިންޑިއާއިން ރިޔާސަތު ބަލަހައްޓާ މިއަހަރުގެ ސަމިޓުގެ ޝިއާރަކީ "ކެތްތެރިކަމާއި އީޖާދީ ވިސްނުމާއި އެއްބާރުލުމާއި ދެމެހެއްޓެނިވިކަމަށް ބިނާކުރުން" އެވެ.

Advertisement

ޕެޒެޝްކިއާން އެންމެ ފަހުން އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރެއްވީ 2024 ވަނަ އަހަރު އޮކްޓޫބަރުގައި ރަޝިއާގެ ކަޒާންގައި ބޭއްވި ބްރިކްސް ސަމިޓުގެ ހަވާސާގައެވެ. އެ ބައްދަލުކުރެއްވުމުގައި ދެ ޤައުމުގެ ދެމެދުގައި ހުރި ކަންކަމާއި ސަރަޙައްދީ މައްސަލަތަކާ ގުޅޭ ގޮތުން ދެ ލީޑަރުން މަޝްވަރާ ކުރެއްވިއެވެ.

މީގެ ކުރިން މިދިޔަ ޖޫން މަހު އީރާނުގެ ޚާރިޖީ ވަޒީރު ޢައްބާސް ޢަރަޤްޗީ ބްރިކްސް ޚާރިޖީ ވަޒީރުންގެ ބައްދަލުވުމުގައި ބައިވެރިވެވަޑައިގަތުމަށް އިންޑިއާއަށް ވަޑައިގެންނެވިއެވެ. އެ ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން ޢަރަޤްޗީ ވިދާޅުވީ ހުޅަނގު އޭޝިއާގެ ނާޒުކު ޙާލަތު ފިނިކުރުމުގައި އިންޑިއާއަށް "މާ ބޮޑު ދައުރެއް" އަދާކުރެވޭނެ ކަމަށެވެ.

ހަމަނުޖެހުމުގެ ޙައްލަކީ ހަނގުރާމައެއް ނޫން ކަމަށާއި ކުރިމަގެއް އޮތީ "މަޝްވަރާއިން ޙައްލު ހޯދައިގެން" ކަމަށް ވެސް އީރާނުގެ ޚާރިޖީ ވަޒީރު ފާހަގަކުރެއްވިއެވެ. އިންޑިއާގެ މެދުވެރިކަމަށް ހޯމޮރުޒް ކަނޑުއޮޅީގެ ސެކިއުރިޓީ ދެމެހެއްޓުމުގެ ޒިންމާ ތެހެރާނުން އަބަދުވެސް އަދާކުރާނެ ކަމާއި ރަޙުމަތްތެރި ޤައުމުތަކުގެ ވިޔަފާރީގެ ސަލާމަތް ކަށަވަރުކޮށްދެވޭނެ ކަމަށް ޢަރަޤްޗީ ވިދާޅުވިއެވެ.

ބްރިކްސްގެ ފުރިހަމަ މެންބަރެއްގެ ގޮތުގައި އީރާނު ހިމެނުނީ 2024 ވަނަ އަހަރު އެވެ. އެ އަހަރު މެމްބަރުކަން ލިބުނު އެހެން ގައުމުތަކުގެ ތެރޭގައި މިޞްރާއި އިތިއޯޕިއާ އަދި ޔޫއޭއީއާ ހިމެނެ އެވެ. 2025 ވަނަ އަހަރު އިންޑޮނީޝިއާ ވެސް އެ ޖަމާޢަތާ ގުޅި ފުރިހަމަ މެންބަރުންގެ ޖުމުލަ 11 އަށް އެރިއެވެ.