އަތޮޅުތެރޭގެ ރަށްރަށުގައި ކުނި ނެގުމުގެ ޚިދުމަތް ފެށުމަށް ބޭނުންވާ އުޅަނދުތައް ހަމަކުރުމުގެ ގޮތުން އެންވަޔަރަމެންޓު މިނިސްޓްރީން މިއަދު ވެމްކޯއާ 22 ޕިކަޕް ހަވާލުކޮށްފިއެވެ.

އެ މިނިސްޓްރީން ހާމަކުރި ގޮތުގައި ހަވާލުކުރި އުޅަނދުތަކުގެ ތެރޭގައި ހިމެނެނީ ރަށު ފެންވަރުގައި ދުއްވުމަށް ޚާއްޞަ 10 ޕިކަޕާއި 350 ކިލޯގެ ބަރުދަން އުފުލުމުގެ ޤާބިލުކަން ހުންނަ 12 ޕިކަޕް ޓްރަކެވެ. މި ދެ ބާވަތުގެ އުޅަނދު ބޭނުންކުރާނެ ގޮތް ތަފާތުވެއެވެ.

Advertisement

ރަށު ޕިކަޕްތައް ފަރުމާކޮށްފައި ވަނީ ހަނި މަގުތަކުގައި ދުއްވައި ގޭބިސީތަކުން ކުނި ނެގުމަށް ފަސޭހަވާ ގޮތަށެވެ. ޓްރަކްތައް ބޭނުންކުރާނީ ގިނަ ޢަދަދެއްގެ ކުނި އެއްފަހަރާ އުފުލައި ރަށުގެ ތަފާތު ހިސާބުތަކުން ކުނިކޮށްޓަށް ގެންދިޔުމަށެވެ.

މި ޕިކަޕްތައް މައިގަނޑު ގޮތެއްގައި ނެރޭނީ އަތޮޅުތަކުގެ ވެރިކަންކުރާ ރަށްރަށާއި އާބާދީ ބޮޑެތި އާބަން ސެންޓަރުތަކަށް ކަމަށް އެ މިނިސްޓްރީން ބުނެފައިވެއެވެ. ވިޔަފާރިތަކާއި ޢާންމު މުއައްސަސާތަކުން އުފެދޭ ކުނި ގަވާއިދުން ނެގުމުގެ އިންތިޒާމުވެސް މި އުޅަނދުތައް މެދުވެރިކޮށް ހަމަޖެހިގެންދާނެ ކަމަށް ފާހަގަކޮށްފައިވެއެވެ.

ފޮޓޯ: އެންވަޔަރަމެންޓު މިނިސްޓްރީ

އެ މިނިސްޓްރީން ބުނީ މި ވަސީލަތްތަކާ އެކު ރަށްރަށުގައި މަގުމައްޗަށް ކުނި ޖަމާވުން ފަދަ މައްސަލަތައް ޙައްލުކުރެވޭ މިންވަރު ބޮޑުވާނެ ކަމަށެވެ.

މާލެ ސަރަޙައްދުގެ އިތުރުން ބައެއް އަތޮޅުތަކުގައި ވެމްކޯ މިހާރުވެސް ޚިދުމަތް ދެމުން ގެންދެއެވެ. އެހެންނަމަވެސް ގިނަ ރަށްރަށުގައި އެކަށީގެންވާ ވަސީލަތެއް ނެތުމާ ހެދި ކުނި ނެގުމުގެ ނިޒާމު ހިންގުން ވަނީ ދަތިވެފައެވެ.

ސަރުކާރުގެ އަމާޒަކީ ރާއްޖޭގެ ހުރިހާ ސަރަޙައްދެއްގައި މެދުނުކެނޑި ކުނި ބެލެހެއްޓުމުގެ ޚިދުމަތް ފޯރުކޮށްދިނުން ކަމަށާއި ކުރިއަށް އޮތް ތާނގައިވެސް އިތުރު ރަށްރަށަށް ބޭނުންވާ ވަސީލަތްތައް ފޮނުވާނެ ކަމަށް އެ މިނިސްޓްރީން ހާމަކޮށްފައިވެއެވެ.