ޖަޕާނުގެ ވެރިރަށް ޓޯކިޔޯގެ އިރުމަތީގައި އޮތް ޗީބާ ޕްރިފެކްޗާއަށް ތާރީޚީ މިންވަރަކަށް ވާރޭ ވެހި ފެންބޮޑުވުމުގެ ސަބަބުން ހަތަރު މީހަކު މަރުވެ އެތައް ހާސް ބަޔަކު ތާށިވެއްޖެއެވެ.

ހުކުރު ދުވަހާ ހަމައަށް 24 ގަޑިއިރު ތެރޭ ޗީބާގެ ބައެއް ސަރަޙައްދުތަކަށް 360 މިލީމީޓަރަށްވުރެ ގިނައިން ވާރޭ ވެހިފައިވެއެވެ. ޖަޕާނުގެ ބޮން ބުޑިސްޓު ބަންދާ ދިމާކޮށް ދަތުރުފަތުރު އެންމެ ބާރު ބޮޑު މި ދުވަސްވަރު ބޮޑެތި މަގުތަކާއި ރޭލު ދަގަނޑުތައް ފެނު އަޑީގައި އޮތެވެ.

Advertisement

ޗީބާ ޕްރިފެކްޗާގެ ކާރިސާ މެނޭޖްމެންޓް އޮފީހުން ބުނީ މަރުވި މީހުންގެ ތެރޭގައި ފެންބޮޑުވެފައި އޮތް މަގެއް މަތީ ފެން މައްޗަށް އައިސްފައި އޮއްވައި ފެނުނު 60 ނުވަތަ 70 ގެ އަހަރުތައް ގުނަމުންދާ ފިރިހެނަކާއި ފެނު އަޑިއަށް ގޮސްފައި އޮތް ކާރެއްގެ ތެރޭ ތާށިވި 66 އަހަރުގެ އަންހެނެއް ހިމެނޭ ކަމަށެވެ. ތިންވަނަ މީހާއަކީ މަގު މައްޗަށް ވެއްޓިފައި އޮއްވައި ފެނުނު ފިރިހެނެކެވެ. ހަތަރުވަނަ މީހާގެ ޖިންސާއި ޢުމުރު އަދި ކަށަވަރު ނުވެއެވެ. ފަސްވަނަ މީހަކު މަރުވެފައިވާ ކަމަށް ބެލެވޭ އިރު ހަވަނަ މީހެއްގެ ޚަބަރެއް ނުވެއެވެ.

ޓޯކިޔޯ އިލެކްޓްރިކް ޕަވާ ކުންފުނިން ހާމަކުރި ގޮތުގައި ހެނދުނު 11:00 (ޖީއެމްޓީ ގަޑީން ބަލާ ނަމަ 02:00 ރާއްޖެ ގަޑީން ބަލާ ނަމަ ހެނދުނު 07:00) ގެ ނިޔަލަށް 22,000 އަށްވުރެ ގިނަ ގޭބިސީން ކަރަންޓު ކެނޑިފައިވެއެވެ. ގާތްގަނޑަކަށް 80 ގެއަކަށް ފެންވަދެ 230,000 އަށްވުރެ ގިނަ މީހުންނަށް ރައްކާތެރި ތަންތަނަށް ދިޔުމަށް އިރުޝާދު ދީފައިވެއެވެ. ޖަޕާނުގެ ގްރައުންޑް ސެލްފް ޑިފެންސް ފޯސް އިން ވަނީ ސޯގާ ރޭލު ސްޓޭޝަނުގައި ގަޑިތަކެއް ވަންދެން ތާށިވެފައި ތިބި 4,000 މީހުން އެތަނުން ނެރެފައެވެ. ނަރީޓާ ވައިގެ ބަނދަރުގައި ވެސް ރޭ ހަތަރުދަމު އެތައް ހާސް ބަޔަކު ތާށިވެފައި ތިއްބެވެ. އެ ސަރަޙައްދުން ރޭލު ޚިދުމަތް ހުއްޓިފައި އޮތް ނަމަވެސް ހުކުރު ދުވަހު ހެނދުނު ލަސްތަކާ އެކު ބައެއް ޚިދުމަތް އަލުން ފެށިފައިވެއެވެ. ނަރީޓާ އެއާޕޯޓުގެ ފްލައިޓްތައް ހުކުރު ދުވަހު ޢާންމު ހާލަތުގައި ކުރިޔަށް ދިޔައެވެ. ޗީބާ ޕްރިފެކްޗާގެ ސަރުކާރު ޢިމާރާތުގައި ވެސް އެތައް ސަތޭކަ ބަޔަކު ރޭ ހޭދަކޮށްފައިވެއެވެ.

ޗީބާގެ ގަވަރުނަރު ތޮޝީހީތޯ ކުމަގައި ހުކުރު ދުވަހު ހެނދުނު ނޫސްވެރިންނާ ވާހަކަ ދައްކަމުން ބުނީ "މިއީ ނުހަނު އާދަޔާ ޚިލާފު ޙާލަތެކެވެ. ކުރީގެ އެތައް ކާރިސާއަކާ ކުރިމަތިލީ ނަމަވެސް މިފަދަ ހާދިސާއެއް ދުވަހަކު ވެސް ތަޖުރިބާ ނުކުރަމެވެ" ކަމަށެވެ.

ޖަޕާނުގެ މީޓިއޮރޮލޮޖިކަލް އެޖެންސީން ވަނީ ހުކުރު ދުވަހު ހެނދުނު ވާރޭ ތުނިވުމާ ގުޅިގެން ޗީބާގެ 12 އަށްވުރެ ގިނަ މުނިސިޕަލިޓީއަށް ނެރެފައި އޮތް އެންމެ މަތީ ދަރަޖައިގެ އިންޒާރު ދަށްކޮށްފައެވެ. ނަމަވެސް އެ ދުވަހުގެ ފަހުން އިތުރަށް ވާރޭ ވެހޭނެ ކަމަށް އެ އެޖެންސީން ލަފާކޮށްފައިވެއެވެ. އިރު އެރުމާ އެކު ނެގި ފޮޓޯތަކާއި ޓީވީ މަންޒަރުތަކުން ފެންނަ ގޮތުގައި ގެތަކާއި ކާރުތަކާއި ރޭލު ދަގަނޑުތައް ކިސަޑު ފެނުގައި އޮތެވެ.