ޤައުމުގެ އިޤްތިޞާދީ ހާލަތު ގޯސްވަމުންދާ ދަނޑިވަޅެއްގައި ބޮޑާނުވެ އިދިކޮޅާ މަޝްވަރާކޮށް 20 ދުވަހުގެ ތެރޭގައި ޑޮލަރުގެ އަގު 19 ރުފިޔާއަށް ތިރިކުރުމަށް ކުރީގެ ރައީސް އަދި އެމްޑީޕީގެ ޗެއާޕާސަން މުޙައްމަދު ނަޝީދު ރޭ ސަރުކާރަށް ގޮވާލައްވައިފިއެވެ.

"ދަތިވެއްޖެ" ނަމުގައި މރޭ ކުރިއަށް ގެންދިޔަ އިހުތިޖާޖުގައި ވާހަކަފުޅުދައްކަވަމުން ނަޝީދު ވިދާޅުވީ ރާއްޖޭގެ ދަރަނި މިހާރު އުފެއްދުންތެރިކަމުގެ ނިސްބަތުން 130 އިންސައްތައަށްވުރެ މައްޗަށް ގޮސްފައިވާ ކަމަށެވެ. ކުރީގެ އެމްޑީޕީ ސަރުކާރުން ޖަމާކުރި ރިޒާވް ބޭނުންކޮށްގެން މި ސަރުކާރުން ދަރަނި އަދާކުރަމުން ގެންދިޔުމުގެ ނަތީޖާއެއްގެ ގޮތުން ދައުލަތުގެ ރިޒާވް މުޅިން ހުސްވެފައިވާ ކަމަށް އެމަނިކުފާނު ފާހަގަކުރެއްވިއެވެ.

Advertisement

ކަޅު ބާޒާރުގައި ޑޮލަރުގެ އަގު 20.05 ރުފިޔާ ފަހަނައަޅައި ގޮސް 23 ރުފިޔާއާ ދިމާއަށް މިސްރާބު ޖަހާފައިވާ ކަމަށް ވިދާޅުވެ ރާއްޖެ "ހައިޕަ އިންފްލޭޝަން" އަކާ ދިމާއަށް ދަތުރުކުރަމުންދާ ކަމުގެ އިންޒާރު ނަޝީދު ދެއްވިއެވެ. ތަކެތީގެ އަގު އަތް ނުފޯރާ ހިސާބަށް އުފުލި ރައްޔިތުންނަށް ބޮޑެތި ތަކުލީފުތަކާ ކުރިމަތިލާން ޖެހިފައިވާ ކަމަށް ވެސް އެމަނިކުފާނު ވިދާޅުވިއެވެ.

ރިސޯޓުތަކުގެ އާމްދަނީގެ 20 އިންސައްތަ މާރުކުރަން މަޖުބޫރުކުރުމާ މެދު ކަންބޮޑުވުން ފާޅުކުރައްވައި ނަޝީދު ވިދާޅުވީ އެއީ ޓޫރިޒަމް ސިނާޢަތަށް ލިބޭނެ ބޮޑު ގެއްލުމެއް ކަމަށެވެ. އެމަނިކުފާނު ވިދާޅުވީ 20 ޕަސެންޓަކީ ފައިދާ އެއް ނޫންކަމަށާއި އެމީހުން ރިސޯޓޫ ވިޔަފާރި ރާއްޖޭގައި ކުރަނީ ލޯނު ނަގައިގެން އައިސް ތިބި ބައެއް ކަމަށެވެ.

އަދި އެ މީހުންގެ އަމިއްލަ ފައިސާއަށް ސަރުކާރުން މިގޮތަށް އަރައިގަތުމުން ޑޮލަރު އިތުރަށް މަދުވުން ނޫން ކަމެއް ނުވާނެ ކަމަށް އެމަނިކުފާނު ވިދާޅުވިއެވެ. ޑޮލަރުގެ މައްސަލައަށް ޙައްލު ހޯދާނެ ގޮތް އެމްޑީޕީއަށް އެނގޭ ކަމަށް ވިދާޅުވެ ސަރުކާރުން ސިޔާސަތު ބަދަލުކުރުމަށް ނަޝީދު ތަކުރާރުކޮށް އެދިވަޑައިގެންނެވިއެވެ.

ޚިޔާލުފާޅުކުރުމާއި އެއްވެ އުޅުމުގެ މިނިވަންކަމަކީ ޤާނޫނު އަސާސީން ކަށަވަރުކޮށްދީފައިވާ ޙައްޤެއް ކަމަށާއި ރައްޔިތުންގެ ޝަކުވާތައް ސަރުކާރަށް ހުށަހެޅުމަކީ ސިޔާސީ ޕާޓީތަކުގެ ޒިންމާއެއް ކަމަށް ވެސް ނަޝީދު މި އިހުތިޖާޖުގައި ވިދާޅުވިއެވެ.