އިންޑިއާގެ އުއްތަރަހާންދު ސްޓޭޓުގެ ޗަމޯލީ ޑިސްޓްރިކްޓުގައި ހަދަމުންދިޔަ ޓަނެލެއް ތެރެއަށް ކުއްލި ގޮތަކަށް ފެނާއި ކިސަޑު ވަދެ ހިނގި ހާދިސާއެއްގައި ހަ މީހަކު މަރުވެއްޖެ އެވެ.

އެ ސްޓޭޓްގެ ޑިޒާސްޓާ މެނޭޖްމެންޓް އޮތޯރިޓީން ނެރުނު ބަޔާނުގައިވާ ގޮތުން ކުއްލި ގޮތަކަށް ބާރު ގަދަ ފެނުގެ އޮއިވަރެއް ޓަނެލް ތެރެއަށް ވަތް އިރު އޭގެ ތެރޭގައި 22 މީހަކު މަސައްކަތް ކުރަމުން ދިޔަ އެވެ. ހާދިސާގައި އިތުރު 14 މީހަކަށް އަނިޔާވެފައިވެ އެވެ.

Advertisement

ރިޕޯޓުތައް ބުނާގޮތުގައި ޓަނެލް ތެރެއަށް ދެމިގަތް ފެންގަނޑުގެ ބާރުމިނުގައި ގިނަ މީހުން ޓަނެލުގެ ނިކުމެވޭ ދިމާލާ ދިމާއަށް ދަމައިގެން ދިޔަ ކަމަށެވެ. ގިނަ ބަޔަކު ޒަހަމްވީ އެހެންވެ ކަމަށް ބުނެފައިވެ އެވެ.

ޒަހަމްވި މީހުންނަށް ހޮސްޕިޓަލުގައި ދަނީ ފަރުވާ ދެމުންނެވެ. އެމީހުންގެ ހާލު ރަނގަޅު ކަމަށް ރިޕޯޓުތައް ބުނެ އެވެ.

މި ހާދިސާގައި ދެ މީހަކު އަދިވެސް ތާށިވެފައި ތިބި ކަމަށާއި އެ ދެ މީހުން ސަލާމަތް ކުރުމުގެ މަސައްކަތް ކުރަމުންދާ ކަމަށް އެ ބަޔާނުގައިވެއެވެ. މި ހާދިސާ ހިނގީ ރޭ އިރުއޮއްސި 6:30 ހާއިރު އެވެ.

އުއްތަރަހާންދު ސަރުކާރުން ބުނީ އެންމެ ބޮޑު އިސްކަމެއް ދެނީ ސަލާމަތީ މަސައްކަތްތަކުގައި ޝާމިލުވާ ފަރާތްތަކަށް މެދުކެނޑުމެއް ނެތި އެހީ ފޯރުކޮށްދިނުމަށެވެ. އަދި އަނިޔާވި މީހުންގެ ހާލު ސަރުކާރުން ގާތުން ބަލަމުންދާ ކަމަށް ބުންޏެވެ.

ފާއިތުވި ދެތިން ދުވަހު އެ ޑިސްޓްރިކްޓަށް ބޯކޮށް ވާރޭ ވެހެމުން ދިޔައެވެ.

މި ހާދިސާގެ އިތުރުން ބޯކޮށް ވާރޭވެހި އެ ސަރަހައްދުގެ ނީތީވެލީ އާއި މައި ރަށް ގުޅުވައިދޭ ދަގަނޑު ބްރިޖެއްވެސް ވަނީ މިދިޔަ ހޯމަ ދުވަހު ވެއްޓިފައި އެވެ.