އިޤުތިޞާދީ އަދި ތަރައްޤީގެ ދާއިރާތަކަށް އިސްކަންދެއްވައިގެން ދެ ޤައުމުގެ ގުޅުން އިތުރަށް ހަރުދަނާކުރެއްވުމާ ގުޅޭ ގޮތުން ރައީސް ޑރ. މުޙައްމަދު މުޢިއްޒު ޔުނައިޓެޑް އަރަބް އެމިރޭޓްސް (ޔޫއޭއީ) ގެ ރައީސް ޝައިޚު މުޙައްމަދު ބިން ޒާއިދު އަލް ނަހްޔާނާ ފޯނުން ގުޅުއްވައި މަޝްވަރާކުރައްވައިފިއެވެ.

ރާއްޖޭގައި ހުންނަ ޔޫއޭއީ އެމްބަސީން ސޯޝަލް މީޑިއާގައި ރޭ ހާމަކުރި ގޮތުގައި ރައީސް މުޢިއްޒު ޔޫއޭއީގެ ރައީސަށް ގުޅުއްވައި ދެ ޤައުމުގެ ދެމެދުގައި އޮތް ގުޅުން ބަދަހިކުރެއްވުމާ ބެހޭ ގޮތުން ފުޅާ ދާއިރާއެއްގައި ވާހަކަފުޅު ދެއްކެވިއެވެ.

Advertisement

އެ މަޝްވަރާތަކުގައި ޚާއްޞަކޮށް އިޤުތިޞާދީ ދާއިރާއާއި ތަރައްޤީގެ މައްސަލަތަކަށް ދެ ބޭފުޅުން އިސްކަން ދެއްވި ކަމަށް އެ ޕޯސްޓުގައި ބުނެފައިވެއެވެ.

މީގެ އިތުރުން ދެ ޤައުމުގެ ރައްޔިތުންގެ ފާގަތިކަމަށް ލިބެން ހުރި ފުރުޞަތުތައް ދެނެގަތުމާ ގުޅޭ ގޮތުންވެސް ދެ ލީޑަރުން ޚިޔާލު ބަދަލުކުރެއްވިއެވެ.

"އެއްބާރުލުން އިތުރުކުރުމަށާއި ތަރައްގީގެ ކަންކަމުގައި ދިވެހިރާއްޖެ އާއި ޔޫއޭއީގެ ބައިވެރިވުން އިތުރުކުރުމުގެ ޔަގީންކަން ދެ ލީޑަރުން ތަކުރާރު ކުރެއްވި" ކަމަށް ޔޫއޭއީ އެމްބަސީން ބުނެފައިވެއެވެ.

ގަލްފު ސަރަޙައްދުގެ ޤައުމުތަކުގެ ތެރެއިން ވިޔަފާރީގެ ގޮތުން ރާއްޖެއާ އެންމެ ގާތް ގުޅުމެއް އޮންނަ އެއް ޤައުމަކީ ޔޫއޭއީ ކަމަށް ވާ އިރު ރާއްޖޭގެ ފަތުރުވެރިކަމުގެ ޞިނާޢަތަށް ބޭނުންވާ ތަކެތި އެ ޤައުމުން އެތެރެކުރެއެވެ.

ހަމައެއާއެކު ރާއްޖެއަށް ފަތުރުވެރިން ގެނައުމުގައިވެސް ޔޫއޭއީން މުހިންމު ދައުރެއް އަދާކުރެއެވެ.