ނުކުޅެދުންތެރިކަން ހުރުމުގެ ސަބަބުން ވީލްޗެއާގައި އުޅޭ މީހަކަށް މާލެ ސަރަހައްދުގެ ދެ މިސްކިތަކުން ޖާގަ ނުދިން ކަމުގެ ޝަކުވާ ވީޑިއޯ ހެއްކާ އެކީ ހުށަހެޅުމުން އެ ކަންބޮޑުވުމަށް ހައްލެއް ހޯއްދަވައިދެއްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައްޔިތުންނާ ވަކިވަކީން ބައްދަލުކުރައްވަން ރައީސް ހިންގަވާ ޕްރޮގްރާމުގައި ފާއިޒް ނަމަކަށް ކިޔާ މީހަކު ވަނީ އެ މަނިކުފާނާ މި ޝަކުވާ ހިއްސާކޮށްފައެވެ. ފާއިޒް ކިޔައިދިން ގޮތުގައި އަލިކިލެގެފާނު މަގުގައި ހުންނަ ސޮލާހުއްދީން މިސްކިތަށް ގޮނޑީގައި ވަންނަން ދިއުމުން މިސްކިތް ހަޑިވެދާނެ ކަމަށް ބުނެ ވަރަށް ހުތުރު ގޮތަކަށް ދޮރު ބަންދުކޮށްލީއެވެ.

Advertisement

"... ދެން އަޅުގަނޑު ބުނިން ދޮރު ކައިރީ އަރިމަތީގައި ވެސް ބޭންދޭނެނުންތޯއޭ ތިޔަބޭފުޅުންނަށް ފަހުން ސާފު ވެސް ކޮށްލެވޭނެނުންތޯއޭ. ބުނީމާ ވެސް ބުނީ ނުވެއްދޭނެއޭ ވީލްޗެއާ މީހުންނަކަށް މިއިން ޒަމާނަކު ވެސް މި މިސްކިތަކަށް ނުވެެއްދޭނެޔޯ" ފާއިޒް ރައީސަށް ދެންނެވިއެވެ.

ހުޅުމާލޭގެ މިސްކިތަކުން ވެސް ހަމަ އެ ފަދައިން ޢަމަލުކުރި ކަމަށާއި އެހެންވެ މިހާރު އޭނާ ނަމާދުކުރަނީ މުޅީންމެ ގޭގައި ކަމަށް ފާއިޒް ބުންޏެވެ. "އަޅުގަނޑު މިސްކިތަކަށް މިހާރު ނުދަން މިސްކިތުން އަޅުގަނޑަށް ދޮރު ބަންދުކޮށްލީތާ" އޭނާ ބުންޏެވެ.

ރައީސް އެ ވާހަކަ ސިފަކުރެއްވީ ވަރަށް ހިތާމަވެރި ކަމެއްގެ ގޮތުގައެވެ. "ތިޔަ ވިދާޅުވި ކަންތަކުގައި ވެސް މަަސައްކަތް ކޮށްދޭނަން އިނގޭތޯ ރަނގަޅު ގޮތެއް ވޭތޯ. އިރާދަކުރެއްވިއްޔާ ރަނގަޅުވާނެ" ރައީސް ވިދާޅުވިއެވެ.

މީގެ އިތުރުން މާލެ ސަރަހައްދުގައި ބަހަށް އެރުމުގައި ދިމާވާ ދަތިތަކާއި އެންސްޕާ މެދުވެރިކޮށް ލިބޭ ގޮނޑީގެ ފެންވަރު ދަށް ކަމުގެ ކަންބޮޑުވުން ވެސް ފާއިޒް ރައީސްގެ ސަމާލުކަމަށް ގެންނެވިއެވެ. ފާއިޒް ފާހަގަކުރީ މުހިންމު ކަންތައްތަކެއް ކަމަށް ވިދާޅުވެ އެ ހުރިހާ ކަމަކަށް ވެސް ހައްލު ހޯއްދަވައިދެއްވުމަށް މަސައްކަތްޕުޅު ކުރައްވާނެ ކަމަށް ރައީސް ވިދާޅުވިއެވެ.