ރާއްޖޭގެ އެކި ރަށްރަށުގައި މަދަނީ ޖަމިއްޔާތަކުން ހިންގާ މުޖުތަމައުގެ ތަރައްޤީގެ މަޝްރޫޢުތަކަށް އެހީތެރިވުމުގެ ގޮތުން ބޭންކް އޮފް މޯލްޑިވްސް (ބީއެމްއެލް) އިން ފަސް ޖަމިއްޔާއެއް މިއަދު ހޮވައިފިއެވެ.

މި ފަންޑުގެ ދަށުން ކޮންމެ މަޝްރޫޢަކަށް 200,000 ރުފިޔާ ހިލޭ އެހީގެ ގޮތުގައި ދޭނެ އެވެ. އެހީ ދޭ މަޝްރޫއުތަކުގެ ގޮތުގައި ހޮވިފައިވަނީ ތިމާވެށީގެ މަސައްކަތްތަކާއި ދަނޑުވެރިކަމާއި ތަޢުލީމީ ދާއިރާގެ އެކި މަޝްރޫޢުތަކެވެ.

Advertisement

މިފަހަރު އެހީއަށް ހޮވައިފަވަނީ އަމިއްލަ ޖަމިއްޔާތައް ކަމަށްވާ ދިއްދޫ ކުރިމަގު ހއ. ދިއްދޫ، ޔުނިޓީ ސްޕޯޓްސް އެކަޑަމީ ށ. ފުނަދޫ، ބްލޫ ގިލްޑް ފައުންޑޭޝަން ށ. ކަނޑިތީމު، ކަލައިދޫ ވިންގްސް ލ. ކަލައިދޫ އަދި ލާމު ފާމާސް އެސޯސިއޭޝަން ލ. ފޮނަދޫ އަދި ލ. ގަމެވެ.

ހއ. ދިއްދޫގައި ޑިޖިޓަލް ވަސީލަތްތައް ހިމެނޭ "ހައިވް" ގެ ނަމުގައި މަރުކަޒެއް ޤާއިމުކުރުމުގެ ފުރުޞަތު ދިއްދޫ ކުރިމަގު ޖަމިއްޔާއަށް ލިބިފައިވާ އިރު ށ. ފުނަދޫގައި މާމުލި ކުޅި އާލާކޮށް އިކޯ ޕާކެއް ހެދުމުގެ މަޝްރޫޢު ޔުނިޓީ ސްޕޯޓްސް އެކަޑަމީއަށް ވަނީ ލިބިފައެވެ.

ދެން ހޮވުނު ތިން ޖަމިއްޔާގެ ތެރެއިން ލާމު ފާމާސް އެސޯސިއޭޝަނުން ހިންގާނީ ލ. ފޮނަދޫ އަދި ލ. ގަމުގައި ދަނޑުވެރިންނަށް ޚާއްޞަ "ފަހިގޮވާން ވެލިއު-އެޑެޑް އެގްރޯ-ޕްރޮސެސިން ހަބް" އެއް ޤާއިމުކުރުމުގެ މަޝްރޫޢެކެވެ. ށ. ކަނޑިތީމުގެ އަތޮޅު ސްކޫލުގައި ދަރިވަރުންގެ ހުނަރު ތަރައްޤީކުރެވޭނެ "މޭކަ ސްޕޭސް" އެއް ޤާއިމުކުރުން ބްލޫ ގިލްޑް ފައުންޑޭޝަނާ ހަވާލުކޮށްފައިވާ އިރު ލ. ކަލައިދޫ ބަނދަރުގައި ފެރީ ބޭނުންކުރާ ފަރާތްތަކަށް ފާޚާނާ އާއި ލައިބްރަރީ އަދި ޑިޖިޓަލް ނޯޓިސް ބޯޑު ހިމެނޭ ހިޔާ ގަނޑެއް ތަރައްޤީކުރުމުގެ މަޝްރޫޢު ކަލައިދޫ ވިންގްސް ޖަމިއްޔާއަށް ވަނީ ލިބިފައެވެ.

ބީއެމްއެލް އިން ބުނީ "އެ ބޭންކްގެ އަމާޒަކީ ދިވެހި މުޖުތަމައު ބާރުވެރިކުރުވައި ރާއްޖޭގެ ދެމެހެއްޓެނިވި ތަރައްގީއަށް އެއްބާރުލުން ދިނުން" ކަމަށެވެ.

ބޭންކް ފަންޑުގެ ދަށުން މިހާތަނަށް 14 މަޝްރޫޢަކަށް އެހީ ފޯރުކޮށްދީފައިވާ އިރު ކުރިން ހިންގި ކޮމިއުނިޓީ ފަންޑް މެދުވެރިކޮށް 100 މަޝްރޫޢަކަށް ވެސް ބީއެމްއެލް އިން ވަނީ މާލީ އެހީ ދީފައެވެ.