ޖުޑީޝަލް ސާވިސް ކޮމިޝަން (ޖޭއެސްސީ) އިން ސިވިލް ކޯޓަށް ދެ ފަނޑިޔާރަކު އަދި ކްރިމިނަލް ކޯޓަށް ތިން ފަނޑިޔާރަކު އައްޔަންކޮށް އެ ބޭފުޅުން މިއަދު ހެނދުނު ބޭއްވި ރަސްމިއްޔާތެއްގައި މަގާމުގެ ހުވާކުރައްވައިފިއެވެ.

އެ ރަސްމިއްޔާތުގައި ހުވާކުރެއްވުމުގެ އިތުރުން ފަނޑިޔާރުންނަށް މަގާމުގެ ލިޔުން ވެސް ހަވާލުކޮށްފައިވެއެވެ.

Advertisement

ސިވިލް ކޯޓުގެ ގާޒީކަމަށް އައްޔަންކުރެއްވީ ގއ. ކަނޑުހުޅުދޫ ރީލްމަންޒިލް، މުހައްމަދު ނިޝާތު އަދި ރ.ހުޅުދުއްފާރު، ރޯޒްވިލާ އާސިޔާ އަޒީމާ އެވެ.

ޤައުމީ ޔުނިވާސިޓީން ބެޗްލާސް އޮފް ލޯ އާއި މާސްޓާ އޮފް ލޯ ހާސިލް ކުރައްވާ ނިޝާތު ޝަރުއީ ދާއިރާގައި މަސައްކަތް ކުރައްވާތާ 15 އަހަރަށްވުރެ ގިނަ ދުވަސް ވެއްޖެ އެވެ. އޭނާ އަދާ ކުރެއްވި މަގާމުތަކުގެ ތެރޭގައި ކަނޑުހުޅުދޫ އިސް މެޖިސްޓްރޭޓްގެ މަގާމާއި، ޑެޕިއުޓީ ސްޓޭޓް އެޓާނީގެ މަގާމާއި އެންޓި ކޮރަޕްޝަން ކޮމިޝަންގެ އެކި މަގާމުތަކާއި ބާ ކައުންސިލްގެ ޖެނެރަލް ކައުންސެލް އަދި ސެކްރަޓަރީ ޖެނެރަލްގެ މަގާމު ހިމެނެއެވެ.

އަޒީމާ ވަނީ ޤައުމީ ޔުނިވާސިޓީން ބެޗްލާ އޮފް ޝަރީޢާ އެންޑް ލޯ އާއި ޔުނިވާސިޓީ އޮފް ބާމިންހަމް އިން މާސްޓާ އޮފް ލޯ ހާސިލުކުރައްވައިފައެވެ. އަޒީމާ ވަނީ ރައްޔިތުންގެ މަޖިލީހުގެ ލީގަލް އޮފިސަރުގެ މަގާމާއި ލީގަލް އެފެއާޒްގެ ޑެޕިއުޓީ ޑިރެކްޓަރުގެ މަގާމު 2014 ވަނަ އަހަރުގެ އޮގަސްޓް 27 އިން 2021 ވަނަ އަހަރުގެ ފެބްރުއަރީ 28 އަށް ފުރުއްވައިފައެވެ.

ކްރިމިނަލް ކޯޓުގެ ފަނޑިޔާރު ކަމަށް ހަމަޖެއްސެވީ ޅ. ކުރެންދޫ ނޫރާނީމާގެ ސުލައިމާން މުހައްމަދާއި، ހއ.ދިއްދޫ ޑޭޒީމާގެ އަހުމަދު ތައުފީގު އަދި ތ. ވޭމަންޑޫ ޑްރީމް މުހައްމަދު އަބްދުﷲ އެވެ.

މީގެ ތެރެއިން ސުލައިމާން ވަނީ ކޮލެޖް އޮފް އިސްލާމިކް ސްޓަޑީޒް އިން ބެޗްލާ އޮފް ޝަރީޢާ އެންޑް ލޯ ހާސިލުކުރައްވައިފައިވާ ފައެވެ. މީގެ ކުރިން ހިންނަވަރާއި ކުރެންދޫ މެޖިސްޓްރޭޓް ކޯޓުގެ އިސް މެޖިސްޓްރޭޓުކަން ކުރައްވާފައިވާ ސުލައިމާން އަކީ ޝަރުޢީ ދާއިރާގައި 12 އަހަރަށް ވުރެ ދިގު ތަޖުރިބާއެއް ލިބިވަޑައިގެންފައިވާ ބޭފުޅެކެވެ.

ތައުފީގު ވަނީ މޯލްޑިވްސް ކޮލެޖް އޮފް ހަޔާ އެޑިއުކޭޝަނުން ބެޗްލާސް އޮފް ލޯ އަދި މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން މާސްޓާ އޮފް ކޮމްޕަރޭޓިވް ލޯ ހާސިލުކުރައްވައިފައެވެ. ތައުފީގަކީ ޕްރޮސެކިއުޓާ ޖެނެރަލްގެ އޮފީހުގެ ސީނިއާ ޕަބްލިކް ޕްރޮސެކިއުޓާގެ މަގާމު ފުރުއްވައި އެޓާނީ ޖެނެރަލް އޮފީހުގައި ވެސް ޚިދުމަތްކުރައްވާފައިވާ ޝަރުޢީ ދާއިރާގައި 18 އަހަރަށް ވުރެ ގިނަ ދުވަހުގެ ތަޖުރިބާ ހޯއްދަވާފައިވާ ބޭފުޅެކެވެ.

މުޙައްމަދު ޢަބްދުﷲ ވަނީ އިންޑިއާގެ ކަރުނާޓަކާ ލޯ ޔުނިވާސިޓީން ބެޗްލާ އޮފް އާޓްސް އެންޑް ބެޗްލާ އޮފް އެލްއެލްބީ ހާސިލުކުރައްވައި 2017 ވަނަ އަހަރުން ފެށިގެން ޕީޖީ އޮފީހުގެ ސީނިއާ ޕަބްލިކް ޕްރޮސެކިއުޓާގެ ގޮތުގައި ޝަރުޢީ ދާއިރާގައި އަށް އަހަރަށް ވުރެ ގިނަ ދުވަހު މަސައްކަތްކުރައްވައިފައެވެ.