ފިރިހެނުންގެ ޖިސްމާނީ ދުޅަހެޔޮކަމަށް ގުދުރަތީ ގޮތުން އެހީތެރިވެދޭ ކާނާއެއްގެ ގޮތުގައި ބަރަބޯ އޮށުގެ ދައުރު ބޮޑުކަމަށް ދިރާސާތަކުން ދައްކައިފިއެވެ.

ސްޕެނިޝް ބަހުން "ޕެޕީޓާ" ގެ ނަމުން ވެސް މަޝްހޫރު ބަރަބޯ އޮށަކީ ކުރީމީ މުރުމުރު ރަހައެއް ހުންނަ ކޮންމެ ތަނެއްގައި ހުއްޓަސް ފަސޭހައިން ކެވޭ ގޮތަށް ހުންނަ ލުއި ކެއުމެކެވެ. އަހަރުގެ ހުރިހާ ދުވަސްވަރެއްގައި ވެސް ލިބެން ހުންނަ މި އޮށުގައި ފިރިހެނުންގެ ހަށިގަނޑަށް ބޭނުންވާ ގިނަ ނިއުޓްރިއެންޓްތައް އެކުލެވިގެންވެއެވެ.

Advertisement

އިންޑިއަން ޖާނަލް އޮފް ޔޫރޮލޮޖީގައި ޝާއިޢުކޮށްފައިވާ ދިރާސާއެއް ދައްކާ ގޮތުން އުމުރުން ދުވަސްވަމުންދާއިރު ބަރަބޯ އޮށް ގަވައިދުން ކާނަމަ ކުޑަކަމު ދިއުމުގެ މައްސަލަތައް ދިމާވުން ފިރިހެނުންނަށް ކުޑައެވެ.

ޕްރޮޓީނުގެ މައްޗަށް ބެލިޔަސް ބަރަބޯ އޮށް ފާހަގަކޮށްލެވެއެވެ. ޔުނައިޓެޑް ސްޓޭޓްސް ޑިޕާޓްމެންޓް އޮފް އެގްރިކަލްޗާ (ޔޫއެސްޑީއޭ) ގެ ނިއުޓްރިޝަން ޗާޓް ބުނާ ގޮތުން 100 ގްރާމް ބަރަބޯ އޮށުގައި ގާތްގަނޑަކަށް 23.33 ގްރާމް ޕްރޮޓީން ހިމެނެއެވެ.

ބަރަބޯ އޮށުގައި ތެލުގެ ބައި ގިނަ ނަމަވެސް އެ ކެއުމުން ފަލަވާ ކަމެއް ނެތް ކަމަށް ހެކިދޭ ހޯދުންތައް ވެއެވެ. މައިކަލް ޓީ. މަރޭ އާއި ޖޯސެފް ޕިޒޯނޯ ލިޔެފައިވާ ދި އެންސައިކްލޮޕީޑިއާ އޮފް ހީލިންގ ފޫޑްސް" ފޮތުގައި ބުނެފައިވަނީ އެމެރިކާގެ 26،000 މީހުން ބައިވެރިވި ދިރާސާއަކުން ދެއްކީ އެންމެ ގިނައިން ނަޓްސް އަދި ސީޑްސް ކެއި މީހުންގެ ފަލަވުމުގެ ނިސްބަތް ދަށް ކަމަށެވެ.

ހަމައެހެންމެ ޒިންކް ގިނައިން ހިމެނޭތީ ސެލް އާކުރުމާއި ބޮލުގެ އިސްތަށިގަނޑު ދުޅަހެޔޮކޮށް ބެހެއްޓުމަށް ބަރަބޯ އޮށް އެހީތެރިވެދެއެވެ. ފޮސްފަރަސް ގިނައިން ހިމެނުމުން މެޓަބޮލިޒަމް ރަނގަޅުކޮށްދީ ހަކަތަ އިތުރުކޮށްދެއެވެ.

މެގްނީޒިއަމް ގިނަވުމުގެ ސަބަބުން ހިތުގެ މަސައްކަތާއި ލޭ ނާރުތައް ހަމައަކަށް އެޅުވުމާއި ބަނޑު ހަޖަމުކުރުމުގެ ނިޒާމަށް ފައިދާ ކުރެއެވެ. ހާއްސަކޮށް ފިރިހެނުންގެ ނިދި ރަނގަޅު ކުރުމާއި ޑިޕްރެޝަން ދަށްކޮށްދިނުމުގައި ވެސް ބަރަބޯ އޮށް ދައުރެއް އަދާކުރެއެވެ.

ކޮންމެ ޢުމުރެއްގެ ފިރިހެނެއް ނަމަވެސް ޞިއްޙަތަށް ސަމާލުވުމީ މުހިންމު ކަމެއް ކަމަށާއި ދުވާލުގެ ކެއުމުގައި ބަރަބޯ އޮށް ހިމެނުމަކީ އެކަން ފެށުމަށް ފަސޭހަ ގޮތެއް ކަމުގައި ދިރާސާތަކުގައި ބުނެފައިވެ އެވެ.