ހޯމްލޭންޑު ސެކިއުރިޓީ މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ފައިރޫޝް މިއަދު އިސްތިއުފާ ދެއްވައިފި އެވެ.

މި ސަރުކާރުގައި ފައިރޫޝް އެންމެ ފުރަތަމަ އައްޔަންކުރެއްވީ ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުގެ މަގާމަށެވެ. ހޯމްލޭންޑު ސެކިއުރިޓީގެ ސްޓޭޓް މިނިސްޓަރުގެ މަގާމަށް އޭނާ ބަދަލުކުރެއްވީ އޮކްޓޯބަރު، 2024 ގަ އެވެ.

Advertisement

ފައިރޫޝް އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ މަގާމުން ވަކިވާން ނިންމެވީ ވަރަށް ބޮޑަށް ވިސްނުމަށް ފަހު ކަމަށެވެ. އޭނާ ވިދާޅުވީ މިއީ ރައްޔިތުންނަށް ޚިދުމަތް ކުރެއްވުމުގެ މި ބާބު ނިންމައިލުމަށް އެންމެ އެކަށީގެންވާ ވަގުތު ކަމަށް ދެކެވަޑައިގަންނަވާ ކަމަށެވެ.

ފައިރޫޝް ވަނީ ޚިދުމަތް ކުރެއްވުމުގެ ފުރުސަތު ލިބިވަޑައިގެންނެވީތީ ޝުކުރު އަދާކުރައްވަމުން ޚާއްޞަކޮށް އެކުގައި މަސައްކަތް ކުރެއްވި ބޭފުޅުންނާއި މުއައްސަސާތަކަށް ޝުކުރު އަދާކުރެއްވިއެވެ.

އެ ބޭފުޅާގެ އިސްތިއުފާއާ ގުޅިގެން ދެން އެ މަގާމާ ހަވާލުވެވަޑައިގަންނަވާނެ ބޭފުޅެއް އަދި ހާމަކޮށްފައެއް ނުވެއެވެ.

ފައިރޫޝް ވަނީ މީގެ ކުރިން އެސިސްޓެންޓު ކޮމިޝަނަރު އޮފް ޕޮލިސްކަންވެސް ކުރައްވާފައި އެވެ.