އެމްޑީޕީން ޑޮލަރުގެ ތާށިކަމާ ގުޅުވައި ސަރުކާރަށް އަމާޒުކުރާ ފާޑުކިޔުންތަކަށް ތަފާސްހިސާބުތައް ދައްކަވައި ބޭންކުތައް މެދުވެރިކޮށް ރަސްމީ ރޭޓުގައި ޑޮލަރު ދޫކުރާ މިންވަރު ކުރިއާ އަޅާބަލާއިރު އެތައް ގުނައެއް މައްޗަށް ގޮސްފައިވާ ކަމަށް ވިދާޅުވެ އިކޮނޮމިކް މިނިސްޓަރު މުޙައްމަދު ސައީދު ރައްދު ދެއްވައިފިއެވެ.

ސޯޝަލް މީޑިއާގައި ޢާންމުކުރެއްވި ވީޑިއޯއެއްގައި ސައީދު ވިދާޅުވީ 2021 ވަނަ އަހަރު ބޭންކު ކާޑުތަކަށް މަހެއްގެ މައްޗަށް އެވްރެޖްކޮށް 10 މިލިއަން ޑޮލަރު ދޫކުރިއިރު މިހާރު އެ ޢަދަދު 39 މިލިއަން ޑޮލަރަށް އުފުލިފައިވާ ކަމަށެވެ. ހަމައެހެންމެ އިމްޕޯޓް ވިޔަފާރިތަކަށް ޓީޓީގެ ގޮތުގައި 2021 ގައި މަހަކު 6.7 މިލިއަން ޑޮލަރު ދޫކުރެވުނުއިރު މިހާރު އެ މިންވަރު 26.6 މިލިއަން ޑޮލަރަށް އިތުރުވެފައިވާ ކަމަށް މިނިސްޓަރު ވިދާޅުވިއެވެ. ކުރީ ސަރުކާރުގައި ފަސް އިންސައްތައިގައި ހުރި ސަޕޯޓް 30 އާއި 40 އިންސައްތައާ ދެމެދުގެ މިންވަރަކަށް ކުރިއަރާފައިވާ ކަމަށް ވެސް ސައީދު ވިދާޅުވިއެވެ.

Advertisement

ރާއްޖެއިން ބޭރުގައި ތަޢުލީމު ޙާޞިލުކުރާ ދަރިވަރުންނަށް 2021 ގައި 1.9 މިލިއަން ޑޮލަރު ދޫކުރިއިރު މިހާރު 3.6 މިލިއަން ޑޮލަރު ދޫކުރާ ކަމަށެވެ. ބޭސްފަރުވާއަށް ދަތުރުކުރާ ދިވެހިންނަށް ކުރިން މަހަކު ތިން ލައްކަ ޑޮލަރު ވެސް ހަމަނުވާއިރު މިހާރު ތިން މިލިއަން ޑޮލަރު ރަސްމީ ރޭޓުގައި ފޯރުކޮށްދޭ ކަމަށް މިނިސްޓަރު ވިދާޅުވި އެވެ.

ސައީދު ވިދާޅުވީ އެއީ ޑޮލަރު ދޫކުރާ ވިޔަފާރިވެރިންނާއި ކިޔަވާ ދަރިވަރުންނާއި، ސިއްހީ ފަރުވާއަށް ބޭރަށްދާ މީހުންނަށް ޑޮލަރު ބޭންކު މެދުވެރިކޮށް ދޭ މިންވަރަކީ އެމްއެމްއޭއާއި ބީއެމްއެލް އިން ދުވަހަކު ވެސް މީގެ ކުރިން ޑޮލަރު ދޫނުކުރާ އަދަދުތަކެއް ކަމަށެވެ.

ޑޮލަރުގެ ކަޅު ބާޒާރު ދިރެނީ ބޭންކިން ނިޒާމުގެ ތެރެއަށް ޑޮލަރު ނުވަދެ ބޭރުގައި ވިއްކާތީ ކަމަށް ސައީދު ވިދާޅުވިއެވެ. އެކަމަށް ބާރު ލިބެނީ ބައެއް ނޫސްތަކުގެ ސުރުޚީތަކާއި އެމްޑީޕީގެ ވެރިން ރޭޓު މައްޗަށް ޖެއްސުމަށް ދައްކަވާ ވާހަކަތަކުން ކަމަށް އެ މަނިކުފާނު ތުހުމަތު ކުރެއްވިއެވެ. މިފަދަ ވާހަކަތައް ފެތުރުމަކީ ސިޔާސީ ބޭނުމަށް މީހުން މުޒާހަރާއަށް ނެރެން ރާވައިގެން ހިންގާ ކަމެއް ކަމަށް ވެސް ސައީދު ސިފަކުރެއްވިއެވެ.

ކުރީގެ ސަރުކާރުގެ ޢަމަލުތައް ހަނދާން ކޮށްދެއްވައި ސައީދު ވިދާޅުވީ ނަޝީދުގެ ވެރިކަމުގައި ޑޮލަރުގެ ރޭޓު ހިފެހެއްޓުމަށް ފުލުހުން ބައިތިއްބެވި ކަމަށެވެ. އެއާޕޯޓް ޖީއެމްއާރަށް ވިއްކައިލުމާއި ދައުލަތުގެ ކުންފުނިތަކުގެ ހިއްސާ ވިއްކުމާއި ކޮވިޑްގެ ތެރޭގައި ބޭކާރު ގޮތެއްގައި ފައިސާ ޗާޕުކުރުމުގެ ސަބަބުން ރުފިޔާގެ އަގު ވެއްޓުނީ އެމްޑީޕީގެ ނިންމުންތަކުން ކަމަށް ސައީދު ވިދާޅުވިއެވެ.

މީގެ އިތުރުން މި ސަރުކާރުން ވަނީ އެމްޑީޕީ ސަރުކާރުން ނެގި 1.2 ބިލިއަން ޑޮލަރުގެ ލޯނު ދައްކައި ރަހުނު ކޮށްފައި ހުރި ސްކޫލްތަކާއި ހޮސްޕިޓަލްތައް ސަލާމަތްކޮށްފައި ކަމަށް ސައީދު ވިދާޅުވިއެވެ. ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް ނިންމައި 10 ބިލިއަން ޑޮލަރުގެ ބޮޑެތި މަޝްރޫޢުތައް ރާވައި ކުރިއަށް ގެންދާ ކަމަށް ވެސް މިނިސްޓަރު ވިދާޅުވިއެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ ދެމެހެއްޓެނިވި ގޮތެއްގައި ރާއްޖޭގެ އިޤުތިޞާދު ކުރިއެރުވުން ކަމަށް ސައީދު ވިދާޅުވިއެވެ.