ބައިނަލްއަޤުވާމީ ޒުވާނުންގެ ދުވަސް މިއަދު ފާހަގަ ކުރާއިރު އިޒްރޭލުގެ ޖަލުތަކުގައި ފަލަސްޠީނުގެ 4،769 ޒުވާނުން ހައްޔަރުކޮށްފައި އެބަ ތިބި ކަމަށް ފަލަސްޠީނުގެ އަސީރުންގެ ކޮމިޝަނުން ބުނެފިއެވެ.

ކޮންމެ އަހަރެއްގެ އޮގަސްޓް 12 ވަނަ ދުވަހު ފާހަގަކުރާ ބައިނަލްއަޤުވާމީ ޒުވާނުންގެ ދުވަހާ ގުޅިގެން އެ ކޮމިޝަނުން ބުނީ ހައްޔަރުކޮށްފައި ތިބި ޒުވާނުންގެ ތެރެއިން 18 އަހަރާއި 40 އަހަރާ ދެމެދުގެ 4،713 ފިރިހެނުންނާއި 56 އަންހެނުން ހިމެނޭ ކަމަށެވެ. އޮކްޓޫބަރު 2023 އިން ފެށިގެން އިސްރާއީލުގެ ޖަލުތަކުގައި މަރުވި 91 ފަލަސްޠީނު އަސީރުންގެ ތެރެއިން 41 މީހުންނަކީ ޒުވާނުން ކަމަށް ވެސް އޭނާ ބުންޏެވެ.

Advertisement

އޭގެ ތެރެއިން 40 މީހެއްގެ ހަށިގަނޑު އަދިވެސްވީ އިސްރާއީލުގެ ބެލުމުގެ ދަށުގައިއެވެ. އަދި ތަފާތު ޢުމުރުފުރާތަކުގެ އެތައް އަސީރެއްގެ ހަށިގަނޑު ވެސް ހިފަހައްޓާފައިވާ ކަމަށް އެ ކޮމިޝަނުން ބުނެފައިވެ އެވެ.

ފަލަސްޠީނު ޒުވާނުންނާ ބެހޭ ގޮތުން އަސީރުންގެ ކޮމިޝަނުން ބުނީ ފަލަސްޠީނުގެ ޒުވާނުންނަކީ އެގައުމުގެ ރައްޔިތުންގެ ޖިހާދުގެ މައި ތަނބު ކަމަށެވެ. އެ ޒުވާނުންނަކީ އިސްތިޢުމާރާއި އަނިޔާއާއި އޮބެހެއްޓުމުން މިނިވަންވުމަށް ޙަޤީޤީ ހަނގުރާމަ ކުރާ ފަރާތްތައް ކަމަށް ބުނެފައިވެ އެވެ.

މިނިވަންކަމާއި މުސްތަޤިއްލުކަމުގެ އުންމީދުތައް ޙާޞިލުވެ އަމާންކަމާއި ހަމަޖެހުމުގެ ތެރެއިން ޢާންމު ދިރިއުޅުމެއް ލިބެންދެން އެ ޒުވާނުން ހިތްވަރާ އެކު ދެމި ތިބޭނެ ކަމަށް ވެސް ބުންޏެވެ.

ބައިނަލްއަޤުވާމީ ޖަމާޢަތްތަކާއި ޚާއްޞަކޮށް ޒުވާނުންނާ ގުޅޭ ޖަމިއްޔާތައް ފަލަސްޠީނު ޒުވާނުންނަށް އަމާޒުކުރެވޭ ޙަމަލާތައް ކުށްވެރިކޮށް އިސްތިއުމާރުގެ ހިފެހެއްޓުންތަކުން އެ ޒުވާނުން ސަލާމަތްވެ މިނިވަން ދިރިއުޅުމެއް ހޯދުމުގެ ޙައްޤު ކަށަވަރުކޮށްދިނުމަށް އަޑު އުފުލުމަށް ވެސް އަސީރުންގެ ކޮމިޝަނުން ގޮވައިލައިފައިވެއެވެ.

ފަލަސްޠީނާއި އިސްރާއީލުގެ ޙައްޤުތަކާ ބެހޭ ޖަމާޢަތްތަކުން ބުނާ ގޮތުގައި އިސްރާއީލުގެ ޖަލުތަކުގައި ޖުމްލަ 9،400 އަށް ވުރެ ގިނަ ފަލަސްޠީނު އަސީރުން ހައްޔަރުކޮށްފައި ތިބި އިރު އޭގެ ތެރޭގައި 92 އަންހެނުންނާއި 370 އަށް ވުރެ ގިނަ ކުޑަކުދިން ހިމެނެއެވެ.

އެ އަސީރުންނަށް އަނިޔާކުރުމާއި ކާބޯތަކެތި ނުދީ ބެހެއްޓުމާއި ޞިއްޙީ ފަރުވާ ނުދިނުމުގެ ސަބަބުން އެތައް ބަޔަކު މަރުވެފައިވެއެވެ. އޮކްޓޫބަރު 7 2023 ގައި ޣައްޒާއާ ދެކޮޅަށް ގަތުލުޢާންމުގެ ހަނގުރާމަ ފެށި ފަހުން އިސްރާއީލުން ފަލަސްޠީނު އަސީރުންނާ ދެކޮޅަށް ހިންގާ އިންސާނީ ޙައްޤުތަކާ ޚިލާފު ޢަމަލުތައް ވަނީ އިތުރުކޮށްފައެވެ.