މައިންބަފައިންގެ ރުހުމެއް ނެތި ހޮސްޕިޓަލުގައި އޮތް ތުއްތު ކުއްޖަކު މަންމައާ ވަކިކޮށް ގެންގޮސްފައިވާ މައްސަލައެއް ފެންމަތިވެ އެ ހާދިސާ ބެލުމުގެ ޤާނޫނީ ބާރު ލިބިފައިވާ މުސްތަޤިއްލު އިދާރާތަކުން އެއްވެސް ފިޔަވަޅެއް ނާޅަކީ ކީއްވެތޯ ސުވާލުކޮށް ކުރީގެ އެޓާނީ ޖެނެރަލް އާޒިމާ ޝަކޫރު ކަންބޮޑުވުން ފާޅުކުރައްވައިފި އެވެ.

އުމުރުން 25 އަހަރުގެ އަންހެނަކު ސޯޝަލް މީޑިއާގައި ހާމަކުރި ގޮތުގައި އޭނާ ވިހޭ އެ ދަރިފުޅު ނުރުހުމުގައި ވަނީ ދައުލަތަށް ނަގާފައި އެވެ. ދައުލަތަށް ނެގިކަން އަންގައި ފޮނުވި ސިޓީ އޭނާ ހާމަކުރި އިރު އޭގައި ބުނެފައިވަނީ އަންހެން މީހާގެ އަތުގެ ނުކުޅެދުންތެރިކަމެއް ހުރުމާއި އަމިއްލަ ނަފްސަށް ގެއްލުން ދިނުމާއި އެހީވާނެ އާއިލާގެ އިތުރު މީހަކު ނެތުމުން އެ ކުއްޖާ ދަތުލަތަށް ނަގަން ނިންމީ ކަމަށެވެ.

Advertisement

މިކަމާއި ގުޅިގެން ޖެންޑާ މިނިސްޓްރީން ނެރުނު ބަޔާނުގައި ބުނެފައިވަނީ އުފަންވިތާ ތިން ދުވަސް ތެރޭ ދައުލަތުގެ ބެލުމުގެ ދަށަށް ގެންދިޔަ ތުއްތު ކުއްޖާގެ މައްސަލައިގައި ޤާނޫނާ އެއްގޮތަށް ޢަމަލުކޮށްފައިވާނެ ކަމަށެވެ.

މި މައްސަލައިގަ ކަންބޮޑުވުން ފާޅުކޮށް އާޒިމާ ސޯޝަލް މީޑިއާގައި ވިދާޅުވެފައިވާ ގޮތުގައި ޤާނޫނީ ގޮތުން ބެލެނިވެރިކަމުގެ ޙައްޤުތައް ނިގުޅައިގަތުމުގެ ބާރު ވަކި ޙާލަތްތަކެއްގައި ލިބިދީފައި އޮތް ނަމަވެސް މައިމީހާގެ ގާތުން ކިރު ދޭ ޢުމުރުގެ ތުއްތު ކުއްޖެއް ގެންދާ ނަމަ އެކަން ކުރެވޭނީ ނުހަނު ސީރިއަސް ޙާލަތެއްގައި ކަމަށް ދެކޭ ކަމަށެވެ. ހަމައެއާއެކު މައިންބަފައިންގެ ހުއްދައާ ނުލައި ހޮސްޕިޓަލަކުން ކުޑަކުއްޖެއް އެހެން ފަރާތަކާ ނުވަތަ މުއައްސަސާއަކާ ހަވާލުކުރުމުގައި ޢަމަލުކުރަންޖެހޭ ވަކި އުސޫލުތަކެއް ކަނޑައެޅިފައި އޮންނަ ކަމަށެވެ.

މި ހާދިސާ ތަޙުޤީޤުކޮށް ބެލުމުގެ ޤާނޫނީ ބާރު ލިބިގެންވާ ގިނަ މުއައްސަސާތަކެއް ރާއްޖޭގައި ޤާއިމުވެފައި ހުރި އިރު އެ ތަންތަނަކީ ރަސްމީ ޝަކުވާއެއް ހުށަހެޅުމެއް ނެތި ވެސް މައްސަލަ ބެލުމުގެ އިޚުތިޔާރު ލިބިފައިވާ މުސްތަޤިއްލު ތަންތަނެވެ. އެހެންނަމަވެސް ހިއުމަން ރައިޓްސް ކޮމިޝަން (އެޗްއާރުސީއެމް) އާއި ޗިލްޑްރެންސް އޮމްބަޑްސްޕާސަން ފަދަ އިދާރާތަކުން މި ކަމާ ގުޅޭ ގޮތުން އެއްވެސް ބަހެއް ބުނެފައި ނުވާތީ ސުވާލު އުފެދޭ ކަމަށް އާޒިމާ ވިދާޅުވެފައިވެ އެވެ.

މިފަދަ ހާދިސާތައް ބެލުމަށް މުސްތަޤިއްލު މުއައްސަސާތައް އެކުލަވައިލެވިފައި ހުންނަ ސަބަބަކީ ވެސް މިފަދަ ދަނޑިވަޅުތަކުގައި ރައްޔިތުންގެ ޙައްޤުތައް ޙިމާޔަތްކުރުން ކަމަށް ވާއިރު ކަމާ ބެހޭ ފަރާތްތައް ހަނު ތިބުމުން އާންމުންގެ މެދުގައި ކަންބޮޑުވުން އިތުރުވާނެ ކަމަށް ވިދާޅުވި އެވެ.

މިނިސްޓްރީގެ ބަޔާނުގައި ބުނެފައިވަނީ ކުއްޖެއްގެ ރައްކާތެރިކަމާ މެދު ކަންބޮޑުވުން އޮތް ނަމަވެސް އެންމެ ފުރަތަމަ ބަލާނީ މައިންބަފައިންގެ ގާތުގައި ބައިތިއްބައިގެން ޙައްޤުތައް ޙިމާޔަތްކުރެވޭތޯ ކަމަށެވެ. އެ ގޮތް ނާކާމިޔާބުވެއްޖެ ނަމަ އާއިލާގެ ތެރެއިން ރައްކާތެރިކަން ދެވޭނެ ފަރާތެއް ހޯދައި އެއިން އެއްވެސް ގޮތެއް ނެތް ޙާލަތުގައި އެންމެ ފަހު ފިޔަވަޅެއްގެ ގޮތުން ދައުލަތުގެ ބެލުމުގެ ދަށަށް ނަގާނެ ކަމަށް ބަޔާނުގައިވެއެވެ.

މައުލޫމާތު ލިބިފައިވާ ގޮތުގައި އެ އެ އަންހެން މީހާއަށް ދަރިފުޅު ލިބުނީ ކައިވެނިން ބޭރުގައި އެވެ. އުތުރުގެ ރަށަކަށް ނިސްބަތްވާ އެ އަންހެން މީހާ ވިހެއީ އަތޮޅު ތެރޭގެ ހޮސްޕިޓަލެއްގައި އެވެ. އޭނާ ތުހުމަތު ކުރި ގޮތުގައި ވިހޭ ދަރިފުޅު ދައުލަތުން ވަނީ މާލެ ގެނެސް އާއިލާ އަކާއި ހަވާލުކޮށްފައި އެވެ.