ތަކެތީގެ އަގު އިންތިހާއަށް ބޮޑުވެ ޑޮލަރުގެ އަގު އުފުލިފައިވާ ކަމަށް ބުނެ މާދަމާ ރޭ މާލޭގައި ބާއްވާ "ދަތިވެއްޖެ" މުޒާހަރާ މަޖީދީ މަގުގައި ބާއްވަން ހުއްދަ ނުދިނަސް މަޖިދީ މަގުގައި ކުރިޔަށް ގެންދާނެ ކަމަށް އިދިކޮޅު އެމްޑީޕީން ބުނެފި އެވެ.

އެ މުޒާހަރާ ބާއްވަން ހަމަޖެހިފައިވަނީ ސޯޝަލް ސެންޓަރު ސަރަހައްދުގައި އެވެ. އެކަމަށް ހުއްދަ ދީފައި ވަނިކޮށް އެމްޑީޕީން ވަނީ ފުލުހުންނާއި ބައްދަލުކޮށް މަޖިދީ މަގުގައި މުޒާހަރާގެ ބައިވެރިން ހިނގުމުގެ ހުއްދައަށް އެދިފައި އެވެ. އެކަމާއި ގުޅިގެން އިއްްޔެ ރައްޔިތުންގެ މަޖިލީހުގެ ޖަލްސާގައި ހޯމް މިނިސްޓަރު އަލީ އިހުސާން ވިދާޅުވީ އެ ހުއްދަ ނުދެވޭނެ ކަމަށެވެ.

Advertisement

އެ ޕާޓީގެ ޤައުމީ މަޖިލީހުން މި މުޒާހަރާ ބާއްވަން ފާސްކުރީ ރުފިޔާގެ އަގު ވެއްޓި ދިރިއުޅުމުގެ ޚަރަދު ބޮޑުވެފައިވާ މައްސަލައިގައި ސަރުކާރުން އެކަށީގެންވާ ފިޔަވަޅެއް ނާޅާ ކަމަށް ބުނެ ރައްޔިތުންގެ ކަންބޮޑުވުން ސަރުކާރަށް އިއްވުމުގެ ބޭނުމުގައެވެ. މަޖީދީ މަގު ޚިޔާރުކުރީ ވީހާ ވެސް ގިނަ ރައްޔިތުންނަށް ބައިވެރިވެ އަޑު އިއްވޭނެ ފުރުޞަތު ހޯދައިދިނުމަށް ކަމަށް އެ ޕާޓީން ބުނެފައިވެއެވެ.

މުޒާހަރާ އިޢުލާނު ކުރުމާ ގުޅިގެން ފުލުހުންގެ ގްރައުންޑް ކޮމާންޑަރުން ވަނީ ޕާޓީގެ އިންތިޒާމު ކޮމިޓީއާ ބައްދަލުކޮށްފައެވެ. މާލޭގެ ބޮޑެތި މަގުތަކުގައި މަރާމާތުގެ މަސައްކަތް ހިނގަމުންދާތީ މަޖީދީ މަގު ނޫން ތަނެއް ނެތް ކަމަށް ފުލުހުން އެ ބައްދަލުވުމުގައި ފާހަގަކުރިއެވެ. ކުރީ ފަހަރުތަކެކޭ އެއްގޮތަށް ފަހު ވަގުތު ހުރަސް އެޅާނެ ކަމުގެ ބިރު ޕާޓީގެ ފަރާތުން ހުށަހެޅުމުން "މިފަހަރު އެހެން ނުވާނެ" ކަމަށް ގްރައުންޑް ކޮމާންޑަރުން ވިދާޅުވިއެވެ.

އެ ޕާޓީން ބުނާ ގޮތުގައި މިނިސްޓަރުގެ މި ވާހަކަފުޅު ދެއްކެވީ ފުލުހުންގެ ގްރައުންޑް ކޮމާންޑަރުން ދެއްވި ޔަޤީންކަމާ ޚިލާފަށް ފުލުހުންގެ ބަހުގެ އިތުބާރު ގެއްލޭ ގޮތަށެވެ.

އެ ޕާޓީން ވަނީ މިނިސްޓަރުގެ ވާހަކަފުޅު ކުށްވެރިކޮށް ސުލްހަވެރި އިޙްތިޖާޖަކީ ޑިމޮކްރެސީގެ އަސާސީ ޙައްޤެއް ކަމަށް ބުނެ އެ ޙައްޤު ނިގުޅައިގަތުން ބަލައިނުގަންނަ ކަމަށް ބުނެފައެވެ. ފުލުހުންގެ ބަހާ އެއްގޮތަށް މަޖީދީ މަގުގައި މި ހިނގާލުން ކުރިއަށް ގެންދާނެ ކަން ހާމަކޮށް ވީހާ ވެސް ގިނަ ރައްޔިތުން ބައިވެރިވުމަށް ޕާޓީން ވަނީ ގޮވައިލައިފައެވެ.

ހަމައެއާ އެކު މުޒާހަރާގެ ބައިވެރިންނަށް ރައްކާތެރިކަން ފޯރުކޮށްދީ އިޙްތިޖާޖުގެ ޙައްޤު ބޭނުންކުރެވޭނެ މާޙައުލެއް ޤާއިމުކޮށްދިނުމަށް ސަލާމަތީ ޚިދުމަތްތަކަށް ވެސް އެ ޕާޓީން ވަނީ ގޮވައިލައިފައެވެ.