އަލްމަދަރުސަތުލް ޢަރަބިއްޔަތުލް އިސްލާމިއްޔާއަށް ސަރުކާރުގެ ޚަރަދުގައި ބިނާކުރަމުންދާ އާ ޢިމާރާތުގެ މަސައްކަތް ގޮސްފައިވާ ހިސާބު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ބައްލަވައިލައްވައިފިއެވެ.

އެ ސަރަޙައްދަށް ރައީސުލްޖުމްހޫރިއްޔާ ވަޑައިގެންނެވުމުން މަރުޙަބާ ދެންނެވީ ތަޢުލީމާ ބެހޭ ވަޒީރު ޑޮކްޓަރ އިސްމާޢީލް ޝަފީޢު އާއި އާރް.ސީ.ސީގެ މެނޭޖިން ޑިރެކްޓަރ އިބްރާހީމް ރަޝީދެވެ. މި ޕްރޮޖެކްޓަކީ މިނިސްޓްރީ އޮފް އެޑިޔުކޭޝަން ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓުން 12 ނޮވެމްބަރު 2024 ގައި އާރް.ސީ.ސީއާ ޙަވާލުކޮށްގެން ކުރިއަށް ގެންދާ މަޝްރޫޢެކެވެ.

Advertisement

ރައީސުލްޖުމްހޫރިއްޔާގެ މި ޒިޔާރަތުގައި ޢަރަބިއްޔާގެ ބައެއް ދަރިވަރުންނާއި މަތީ ތަޢުލީމު ޙާސިލުކުރުމަށް ޝައުޤުވެރިވެފައި ތިބި ދަރިވަރުން ވަނީ އެމަނިކުފާނާ ބައްދަލުކޮށް ޝުއޫރުތައް ހިއްސާކޮށްފައެވެ. އެ ދަރިވަރުންގެ ވާހަކަތައް އައްސަވައި ހުށަހެޅި ކަންކަމުގައި ސަރުކާރުން ވެދެއްވެން ހުރި އެހީތެރިކަން ފޯރުކޮށްދެއްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ދެއްވައި މަތީ ތަޢުލީމަށް ސަރުކާރުން ދެއްވާ ޚާއްޞަ އިސްކަން ފާހަގަކުރެއްވިއެވެ.

އަށް ފަންގިފިލާގެ މި ޢިމާރާތުގައި ކްލާސްރޫމްތަކުގެ އިތުރުން ޒަމާނީ ވަސީލަތްތައް ޤާއިމުކުރެވޭނެ ކަމަށް ސަރުކާރުން ބުނެއެވެ. 31 ޑިސެމްބަރު 2026 ގެ ނިޔަލަށް ޢިމާރާތް ނިންމައި 2027 ވަނަ އަހަރުގެ ދިރާސީ އާ އަހަރާ އެކު ކިޔަވައިދޭން ފެށުމަށް ވަނީ ރާވައިފައެވެ.

މާލެއިން ޖާގައިގެ ގޮތުން ތަނަވަސް ބިމެއްގައި ޒަމާނީ ޢިމާރާތެއް ބިނާކޮށް ޢަރަބިއްޔާ ބަދަލުކުރުމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެއް ކަމުން މި މަޝްރޫޢަކީ އެމަނިކުފާނު ޚާއްޞަ އިސްކަމެއް ދެއްވައިގެން ކުރިއަށް ގެންދަވާ މަސައްކަތެކެވެ.