އިންޑިއާގެ ކޮލްކަތާއިން ޗެންނާއީއަށް ދަތުރުކުރި އިންޑިގޯ އެއާލައިނުގެ މަތިންދާބޯޓެއްގެ ވައި އިންޖީނު ފެއިލްވެ ކުއްލި ހާލަތުގައި ޖައްސައިފި އެވެ.

ކުއްލި ހާލަތުގައި ބޯޓު ޖެއްސީ ބޯޓު ދަތުރު ކުރަމުން ދިޔަ މަންޒިލް ކަމަށްވާ ޗެންނާއީ އިންޓަނޭޝަނަލް އެއާޕޯޓުގައި އެވެ.

ރިޕޯޓުތައް ބުނާގޮތުގައި މި ފްލައިޓުގައި 224 ފަސިންޖަރުން ތިއްބެވެ. މިހާދިސާގައި އެއްވެސް މީހަކަށް ގެއްލުމެއް ނުލިބެ އެވެ.

އެއާޕޯޓްސް އޮތޯރިޓީ އޮފް އިންޑިއާ (އޭއޭއައި) ގެ އޮފިޝަލުންނާ ހަވާލާދީ ބުނެފައިވާ ގޮތުގައި ރޭގަނޑު 11:29 ގައި އެ ބޯޓުގެ ޕައިލެޓް ފުލް އެމެޖެންސީ ޑިކްލެއާ ކުރީ ޖައްސަން ތައްޔާރުވަމުން ދަނިކޮށް ވާތް ފަރާތު އިންޖީނު ފެއިލްވުމާ ގުޅިގެންނެވެ.

ޕައިލެޓް އެއާ ޓްރެފިކް ކޮންޓްރޯލަށް އެކަން އެންގުމާ އެކު ވައިގެ ބަނދަރުގެ ކަމާ ގުޅޭ ފަރާތްތަކުން ވަނީ ކުއްލި ހާލަތުގެ ރައްކާތެރިކަމުގެ ފިޔަވަޅުތައް ހިންގައިފައެވެ. 

މި ހާދިސާއާ ގުޅިގެން އެއާޕޯޓުގެ އެހެން އޮޕަރޭޝަންތަކަށް ބުރޫއެއް ނާރައި ހުރިހާ ކަމެއް ހިނގީ އާންމު އުސޫލުން ކަމަށް ވައިގެ ބަނދަރުގެ އޮފިޝަލުން ބުނެފައިވެއެވެ.

އިންޑިގޯއިން ރާއްޖެއަށްވެސް އިންޑިއާއިން ޑައިރެކްޓު ފްލައިޓުތައް ބާއްވަ އެވެ.

މި ފަހަކަށް އައިސް އިންޑިއާގެ އެއާލައިންތަކުގެ ފްލައިޓުތަކުގައި މައްސަލަތައް އިތުރުވާކަމަށް ރިޕޯޓުތައް ބުނެ އެވެ.

އެގޮތުން މިދިޔަ ހަފްތާގައި އެއާ އިންޑިއާގެ ފްލައިޓެއް ވައިގެ ތެރޭގައި ކުއްލިއަކަށް ތިރިވުމުގެ ހާދިސާއެއް ހިނގާފައިވެ އެވެ. ތަހުގީގުގައި ފަހުން އެނގުނު ގޮތުގައި އެ ހާދިސާ ހިނގީ ފްލައިޓުގެ ސިސްޓަމެއް ފެއިލްވެގެންނެވެ.

އެހެން ނަމަވެސް ހާދިސާ ހިނގި އިރު ޕައިލެޓު ބޯޓުގެ ފަހަތުގައި ހުރި މައްސަލައެއް ފެންމަތިވެފައި އެވެ. ރިޕޯޓުތައް ބުނާގޮތުގައި ޕައިލެޓު ވަނީ ހާދިސާއަށް ފަހު ހެދި ދެ ޓެސްޓަކުން މަސްތުވާތަކެއްޗަށްވެސް ޕޮސިޓިވް ވެފައި އެވެ.