އުފަންވިތާ ތިން ދުވަސް ތެރޭ ދައުލަތުގެ ބެލުމުގެ ދަށަށް ގެންދިޔަ ތުއްތު ކުއްޖާގެ މައްސަލައިގައި ޤާނޫނާ އެއްގޮތަށް ޢަމަލުކޮށްފައިވާނެ ކަމަށް ހެލްތް އެންޑް ޖެންޑާ މިނިސްޓްރީން ބުނެފި އެވެ.

އުމުރުން 25 އަހަރުގެ އަންހެނަކު ސޯޝަލް މީޑިއާގައި ހާމަކުރި ގޮތުގައި އޭނާ ވިހޭ އެ ދަރިފުޅު ނުރުހުމުގައި ވަނީ ދައުލަތަށް ނަގާފައި އެވެ. ދައުލަތަށް ނެގިކަން އަންގައި ފޮނުވި ސިޓީ އޭނާ ހާމަކުރި އިރު އޭގައި ބުނެފައިވަނީ އަންހެން މީހާގެ އަތުގެ ނުކުޅެދުންތެރިކަމެއް ހުރުމާއި އަމިއްލަ ނަފްސަށް ގެއްލުން ދިނުމާއި އެހީވާނެ އާއިލާގެ އިތުރު މީހަކު ނެތުމުން އެ ކުއްޖާ ދަތުލަތަށް ނަގަން ނިންމީ ކަމަށެވެ.

Advertisement

މިކަމާއި އޭނާ ވަރަށް ބޮޑަށް ޖެންޑާ މިނިސްޓްރީއަށް ފާޑުކިޔާފައިވަނިކޮށް މިނިސްޓްރީން ނެރުނު ބަޔާނެއްގައި ބުނީ ޤާނޫނުއަސާސީގެ 35 ވަނަ މާއްދާ ކުޑަކުދިންނަށް ލިބެންޖެހޭ ޚާއްޞަ ރައްކާތެރިކަން ކަށަވަރުކުރުމުގެ ޒިންމާ ދައުލަތާއި އާއިލާ އާއި ޖަމާޢަތުގެ ބޮލުގައި އަޅުވައެވެ. ހަމައެއާ އެކު ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ އަށް ވަނަ މާއްދާއިން ލާޒިމުކުރާ ގޮތުގައި ކުއްޖަކާ ގުޅޭ ކޮންމެ ނިންމުމެއްގައި ވެސް އެ ކުއްޖާގެ މަޞްލަޙަތު އެންމެ އިސްކުރަންވާނެ ކަމަށް ބަޔާނުގައިވެއެވެ.

މިނިސްޓްރީގެ ބަޔާނުގައި ބުނެފައިވަނީ ކުއްޖެއްގެ ރައްކާތެރިކަމާ މެދު ކަންބޮޑުވުން އޮތް ނަމަވެސް އެންމެ ފުރަތަމަ ބަލާނީ މައިންބަފައިންގެ ގާތުގައި ބައިތިއްބައިގެން ޙައްޤުތައް ޙިމާޔަތްކުރެވޭތޯ ކަމަށެވެ. އެ ގޮތް ނާކާމިޔާބުވެއްޖެ ނަމަ އާއިލާގެ ތެރެއިން ރައްކާތެރިކަން ދެވޭނެ ފަރާތެއް ހޯދައި އެއިން އެއްވެސް ގޮތެއް ނެތް ޙާލަތުގައި އެންމެ ފަހު ފިޔަވަޅެއްގެ ގޮތުން ދައުލަތުގެ ބެލުމުގެ ދަށަށް ނަގާނެ ކަމަށް ބަޔާނުގައިވެއެވެ.

ރައްކާތެރިކަން ކަށަވަރުނުވާ ޙާލަތުގައި ވަގުތުން ފިޔަވަޅު އެޅުމާއި ކުއްޖާ ވަގުތީ ގޮތުން އެހެން ފަރާތަކާ ޙަވާލުކުރުމުގެ އިޚުތިޔާރު ވެސް ޤާނޫނީ ގޮތުން ލިބިގެންވާ ކަމަށް ވުޒާރާއިން ބުންޏެވެ.

މީގެ އިތުރުން ކުޑަކުދިންނާއި ނާޒުކު ޙާލަތުގައި ދިރިއުޅޭ ފަރާތްތަކާ ގުޅޭ ގޮތުން ޞައްޙަ ނޫން މަޢުލޫމާތު މީޑިއާގެ ވަސީލަތްތައް މެދުވެރިކޮށް ފެތުރުމާ މެދު މިނިސްޓްރީން ކަންބޮޑުވުން ފާޅުކޮށް އެފަދަ މަޢުލޫމާތު ދައުރުކުރުމުގައި ސަމާލުވުމަށް އިލްތިމާސްކޮށްފައިވެއެވެ.

މައުލޫމާތު ލިބިފައިވާ ގޮތުގައި އެ އެ އަންހެން މީހާއަށް ދަރިފުޅު ލިބުނީ ކައިވެނިން ބޭރުގައި އެވެ. އުތުރުގެ ރަށަކަށް ނިސްބަތްވާ އެ އަންހެން މީހާ ވިހެއީ އަތޮޅު ތެރޭގެ ހޮސްޕިޓަލެއްގައި އެވެ. އޭނާ ތުހުމަތު ކުރި ގޮތުގައި ވިހޭ ދަރިފުޅު ދައުލަތުން ވަނީ މާލެ ގެނެސް އާއިލާ އަކާއި ހަވާލުކޮށްފައި އެވެ.