ގިނަ އަދަދެއްގެ ޓޫރިސްޓުން ގޮވައިގެން ދަތުރު ކުރި ލޯންޗެއް ދިޔަވެ އަޑިއަށް ހިނގައްޖެ އެވެ.

މި ހާދިސާގެ ވީޑިއޯ ސޯޝަލް މީޑީއާގައި ވަނީ އާންމުވެފައި އެވެ. މި ހާދިސާ އާއި ގުޅޭ މައުލޫމާތު އަދި ކަމާބެހޭ އިދާރާތަކުން ހާމައެއް ނުކުރެ އެވެ.

Advertisement

މި ހާދިސާ ހިނގީ ކ. ގިރިފުށީ ކައިރީގައި އެވެ. އެ ލޯންޗަކީ ދިއްފުށްޓަށް އައިސް އުޅޭ ޓޫރިސްޓުންތަކެއް ގޮވައިގެން އެކްސްކާޝަންއަށް ނުކުމެ އުޅުނު ލޯންޗެއް ކަމަށްވެ އެވެ.

ލޯންޗު ދިޔަވަމުން ދިޔައި އިރު އެއްކޮށް އަޑިއަށް ދިއުމުގެ ކުރިން އޭގައި ތިބި ހުރިހާ އެންމެން ވަނީ އެހެން ސަޕްލައި ދޯންޏަކަށް ނަގާފައިވެ އެވެ. ލޯންޗުން ސަލާމަތް ކުރި މީހުންގެ ތެރޭގައި އަންހެނުންނާއި ކުޑަކުދިން ހިމެނެ އެވެ.

އެންމެން ތިބީ ލައިފް ޖެކެޓު އަޅައިގެންނެވެ. ސަޕްލައި ދޯންޏަށް އެންމެން އެރުވިތާ މާގިނައިރެއް ނުވެ ލޯންޗު އެއްކޮން އަޑިއަށްދާ މަންޒަރު ވީޑިއޯއިން ފެނެ އެވެ.

މި ހާދިސާ ހިނގާފައިވާ އިރު މުޅި ރާއްޖެއަށް މިއަދު މޫސުން ގޯހެވެ. ހާއްސަކޮށް މާލެ ސަރަހައްދަށް ގަދަ ވަޔާއި އެކު ދަނީ ވާރޭ ވެހެމުންނެވެ.

މެޓު އޮފީހުން ވަނީ މޫސުމަށް ސަމާލުވުމަށް އިލްތިމާސް ކޮށްފައި އެވެ.