ބޭރު ފައިސާއާ ބެހޭ ޤާނޫނުގެ ދަށުން "ކެޓެގަރީ އޭ" ގައި ހިމެނޭ ރިސޯޓުތަކަށް ކޮންމެ ޓޫރިސްޓެއްގެ ބޮލަކަށް 500 ޑޮލަރުގެ ނިސްބަތުން ފައިސާ މާރުކުރެވޭ ގޮތަށް އޮތް އިޚުތިޔާރު އުވާލައި ހުރިހާ ރިސޯޓެއް އެއް ހަމައަކަށް ގެނައުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޤާނޫނީ އިޞްލާޙުތަކެއް ހުށަހަޅައިފިއެވެ.

މި އިޞްލާޙުތައް މިހާރު އެޓާނީ ޖެނެރަލްގެ އޮފީހަށް ފޮނުވާފައިވާ ކަމަށާއި ކައިރި މުސްތަޤުބަލެއްގައި ރައްޔިތުންގެ މަޖިލީހަށް ހުށަހެޅޭނެ ކަމަށް ޤަބޫލުކުރާ ކަމަށް އެމްއެމްއޭއިން ބުނެފައިވެއެވެ.

Advertisement

މިދިޔަ އަހަރުގެ ޖެނުއަރީ މަހު ޢަމަލުކުރަން ފެށި ޤާނޫނުގެ ދަށުން "ކެޓެގަރީ އޭ" ރިސޯޓުތަކަށް ދެ ގޮތެއް އޮތެވެ. އެއީ ބޮލަކަށް 500 ޑޮލަރުގެ ރޭޓުން މާރުކުރުން ނުވަތަ މަހެއްގެ ޖުމްލަ އާމްދަނީގެ 20 އިންސައްތައަށްވާ ޑޮލަރު މާރުކުރުމެވެ. ނަމަވެސް މި ބަދަލު ތަންފީޒުވެއްޖެ ނަމަ ހުރިހާ ރިސޯޓަކުން ވެސް ކޮންމެ މަހެއްގެ ޖުމްލަ އާމްދަނީގެ 20 އިންސައްތައަށްވާ ޑޮލަރު މާރުކުރުން ލާޒިމުވާނެއެވެ.

އެމްއެމްއޭއިން ފާހަގަކޮށްފައިވާ ގޮތުގައި އަގުބޮޑެތި ހައިއެންޑް ރިސޯޓުތަކުން ޢާންމުކޮށް ބޮލަކަށް 500 ޑޮލަރުގެ ރޭޓު ޚިޔާރުކުރާ އިރު ކުދި ރިސޯޓުތަކުން އާމްދަނީގެ 20 އިންސައްތައިގެ ގޮތް ޚިޔާރުކުރެއެވެ. އެ ތަފާތުގެ ސަބަބުން ބޭންކިން ނިޒާމަށް ވަންނަންވާ ވަރަށް ބޮޑު ޢަދަދެއް ގެއްލޭ ކަމަށް އެ އޮތޯރިޓީން ބުނެފައިވެއެވެ.

މި އިޞްލާޙު ތަންފީޒުކުރެވިއްޖެ ނަމަ އަހަރެއްގެ މައްޗަށް ގާތްގަނޑަކަށް 100 މިލިއަން ޑޮލަރު ބޭންކުތައް މެދުވެރިކޮށް އިތުރަށް މާރުވާނެ ކަމަށް އެމްއެމްއޭއިން ލަފާކޮށްފައިވެއެވެ.

ހަމައެއާ އެކު ޑޮލަރުގެ އާމްދަނީ ލިބޭ ޓޫރިޒަމް ނޫން ވިޔަފާރިތައް ހިމެނޭ "ކެޓެގަރީ ސީ" ގެ އާމްދަނީ ތްރެޝްހޯލްޑް 15 މިލިއަން ޑޮލަރުން 25 މިލިއަން ޑޮލަރަށް ބޮޑުކުރަން ވެސް ނިންމާފައިވެއެވެ. މި ބަދަލާ އެކު 25 މިލިއަން ޑޮލަރަށް ވުރެ ދަށުން އާމްދަނީ ލިބޭ ވިޔަފާރިތަކުން ޑޮލަރު މާރުކުރާކަށް ނުޖެހޭނެއެވެ. އެމްއެމްއޭއިން ބުނި ގޮތުގައި އެ ކެޓެގަރީން މިހާރު ވެސް ޑޮލަރު މާރުކުރަނީ 12 ވަރަކަށް ކުންފުނިން ކަމަށް ވާތީ މާރުކުރާ ޖުމްލަ ޢަދަދަށް ބަދަލެއް ނާންނާނެއެވެ.

އެ ކެޓެގަރީގައި ކޮންސްޓްރަކްޝަނާއި ޓެލެކޮމް ފަދަ ތަފާތު ދާއިރާތަކުގެ ވިޔަފާރި ހިމެނޭ ކަމަށާއި ދިވެހި ވިޔަފާރިތައް ނަމަ މާރުކުރާ ޢަދަދު އާމްދަނީގެ ހަތް އިންސައްތައަށް ކުޑަކުރެވޭނެ ފުރުޞަތު ވެސް އެ އިޞްލާޙުތަކުގެ ތެރެއިން ލިބޭނެ ކަމަށް އެމްއެމްއޭއިން ބުނެފައިވެއެވެ. ގެސްޓްހައުސްތައް ހިމެނޭ "ކެޓެގަރީ ބީ" އަށް މި ބަދަލުތަކުގެ ތެރެއިން އެއްވެސް ބަދަލެއް ނާންނާނެއެވެ.

މީގެ އިތުރުން ބޭރު ބޭންކުތަކުގެ ޕީއޯއެސް މެޝިންތައް މެދުވެރިކޮށް ހިންގާ މުޢާމަލާތްތައް ރާއްޖޭގެ ބޭންކް އެކައުންޓެއް ތެރެއިން ދައުރުވާ ގޮތް ހެދުމަށް ނެޝަނަލް ޕޭމެންޓް ސިސްޓަމް ޤާނޫނަށް ވެސް އިޞްލާޙު ގެނައުމަށް ނިންމާފައިވެއެވެ. ހަމައެހެންމެ ރާއްޖޭގައި ހިނގާ ހުރިހާ އޮންލައިން މުޢާމަލާތެއް ދެނެގަތުމަށް ނެޝަނަލް ސްވިޗެއް ޤާއިމުކުރުމުގެ މަސައްކަތް ކުރިއަށް ގެންދާ ކަމަށާއި އެކަމާ ގުޅޭ ޤާނޫނީ އިޞްލާޙު މިހާރު ހުށަހަޅާފައިވާ ކަމަށް ވެސް އެމްއެމްއޭއިން ބުނެފައިވެއެވެ.

މިދިޔަ އަހަރު ރާއްޖޭގެ ފަތުރުވެރިކަމުގެ ދާއިރާއިން 5.6 ބިލިއަން ޑޮލަރުގެ އާމްދަނީ ލިބުނު އިރު އެ ފައިސާގެ ބޮޑު ބައެއް އަދިވެސް ރާއްޖޭގެ ބޭންކިން ނިޒާމަށް ނުވަންނާތީ އެ މައްސަލައަށް ޙައްލު ހޯދުމަށް ކުރިއަށް އޮތް ތަނުގައި ވެސް އިތުރު ފިޔަވަޅުތައް އެޅުމަށް އެމްއެމްއޭއިން ނިންމާފައިވެއެވެ.