ހަނގުރާމައަށް ފަހު ގާޒާ ހިންގާނެ ގޮތުގެ ޕްލޭނާ މެދު އިސްތިއުމާރީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އެމެރިކާގެ ރައީސް ޑޮނަލްޑް ޓްރަމްޕްގެ ޅީދަރިކަލުން ޖެރެޑް ކުޝްނާ އާ ދެމެދު ވަރުގަދަ ދެބަސްވުންތަކެއް އުފެދިފައިވާ ކަމަށް އިޒްރޭލުގެ ޗެނެލް 14 އިން ރިޕޯޓުކޮށްފިއެވެ.

އެ ޗެނެލުން ބުނީ ފާއިތުވި ދުވަސްތަކުގައި ދެ ފަރާތުގެ މަޝްވަރާތައް ވަރަށް ބޮޑަށް ހޫނުވެފައިވާ ކަމަށެވެ. ސަރަޙައްދީ އަދި ބައިނަލްއަޤުވާމީ ބައިވެރީންނާ ގުޅިގެން ތައްޔާރުކުރަމުން އަންނަ އެ ޕްލޭން ތަންފީޒުކުރުމަށް ނަތަންޔާހޫ ހުރަސް އަޅާ ކަމުގެ ތުހުމަތު ކުޝްނާ ސީދާ ކޮށްފައިވާ ކަމަށް ރިޕޯޓުގައިވެއެވެ.

Advertisement

އެ ޕްލޭނަށް ތާއީދުކުރާ ފަރާތްތަކުން ދެކޭ ގޮތުގައި ޣައްޒާގައި އާ މަރުހަލާއަކަށް ދިއުމަށް ވަގުތުން ޢަމަލީ ފިޔަވަޅުތައް އެޅުމަކީ ކޮންމެހެން ބޭނުންތެރި ކަމެކެވެ. ނަމަވެސް ނަތަންޔާހޫ ބުނަނީ ސިޔާސީ ނުވަތަ އިދާރީ އެއްވެސް އިންތިޒާމެއް ޤަބޫލުކުރެވޭނީ ސެކިއުރިޓީ ޝަރުޠުތައް ފުރިހަމަ ކުރުމަށް ފަހުގައި ކަމަށެވެ.

އޭނާގެ މި ނިންމުން މަޝްވަރާތަކުގެ ތެރޭގައި ނަތަންޔާހޫ ވަނީ ކުޝްނާއަށް އަންގައިފައިވާ ކަމަށް ޗެނެލް 14 އިން ބުނެފައިވެއެވެ. އެގޮތުން ޣައްޒާ މެނޭޖުކުރުމުގެ ނުވަތަ އެތަނުގެ އޮނިގަނޑު ބަދަލުކުރުމުގެ އެއްވެސް ފޯމިއުލާއަކަށް އިޒްރޭލުން ރުހޭނީ ގާޒާއިން އެއްކޮން ހަތިޔާރު ނައްތައިލެވުމުން ކަމަށް ބުނެ އެވެ.

ފަލަސްޠީނުގެ ޖަމާޢަތްތަކުގެ އަތުގައި ހުރި ހުރިހާ ހަތިޔާރަކާއި އަސްކަރީ ވަސީލަތެއް ދޫކޮށް ނެގުމަކީ ގާޒާއިން ހަތިޔާރު ނައްތައިލުމަށް ކޮންމެހެން ބޭނުންވާ ކަމެއް ކަމަށް އިޒްރޭލުން ބުނެއެވެ.

ހަނގުރާމައަށް ފަހު ގާޒާ ހިންގާނެ ގޮތާ މެދު ބައިނަލްއަޤުވާމީ ފަރާތްތަކުން އިންތިޒާމުތައް ހަމަޖައްސައި ގާޒާ އަލުން ބިނާކުރުމަށް މަސައްކަތްކުރަމުން ދާއިރު އިސްތިއުމާރީ އިޒްރޭލުގެ ސަރުކާރުން ދެމިތިބީ ސެކިއުރިޓީ ޔަޤީންކަން ހޯދުން، އެހެން ހުރިހާ ކަމެއްގެ ކުރިއަށް ގެންނަން ޖެހޭ ކަމަށް ބުނާ ބުނުމުގައެވެ.

މި ދެބަސްވުމާ ހެދި ގާޒާގެ މުސްތަޤުބަލުގެ ޕްލޭން ކުރިއަށް ގެންދެވޭނެ ގޮތާ މެދު ސުވާލު އުފެދިފައިވެއެވެ.