އާޖެންޓީނާގެ ފުޓުބޯޅަ ތަރި ލިޔޮނަލް މެސީގެ ބައްޕަ ޖޯޖް މެސީގެ ޖަނާޒާގެ ފޮޓޯ އާއި ވީޑިއޯ ސިއްރުން ނެގި މީހުންނާއި ދެކޮޅަށް ދައުވާ ކުރާނެ ކަމުގެ އިންޒާރު ދީފި އެވެ.

މެސީ ބައްޕަ މަރުވީ ދިގު މުއްދަތަކަށް ބަލިވެ އުޅުމަށް ފަހު 68 އަހަރުގެ މިމަހުގެ އަށްވަނަ ދުވަހު އެވެ. ބައްޕަގެ ޖަނާޒާގައި ބައިވެރިވާން އޭނާ ވަނީ އެމެރިކާއިން އާޖެންޓީނާއަށް ޕްރައިވެޓް ޖެޓުގައި އޮގަސްޓު ނުވަ ވަނަ ދުވަހު ގޮސްފައި އެވެ.

Advertisement

އިއްޔެ ޖަނާޒާގެ ކަންތައްތައް ނިމުނު ފަހުން އާޖެންޓީނާގެ މީޑިއާގެ ބައެއް ވަސީލަތްތަކުން ވަނީ މެސީ ގަބުރުސްތާނުގައި ހިނގާފައި ދާ މަންޒަރު ފެންނަ ފޮޓޯތަކާއި ވީޑިއޯތައް އާންމުކޮށްފައި އެވެ. އެ މަންޒަރުތަކުން ފެންނަނީ މެސީ ވަރަށް މާޔޫސްވެފައި ހުރިތަނެވެ. އޭގެ ކުރިން މެސީ އާޖެންޓީނާއަށް ދިޔަ ވަގުތު ޕްރައިވެޓު ޖެޓުން ފައިބައިގެންދާ މަންޒަރުތައްވެސް އާންމު ކުރި އެވެ.

މެސީގެ އާއިލާއިން ވަނީ ޖޯޖް މަރުވުމުން އެކަން އިއުލާނު ކުރުމަށް ފަހު މީޑިއާއިން އޭނާގެ ޖަނާޒާ ކަވަރު ނުކުރުމަށް އެދިފައި އެވެ. އެ އާއިލާއިން ޖަނާޒާގެ ކަންކަން ކުރިޔަށް ގެންދަން ބޭނުންވަނީ ވަރަށް ސިއްރު ރަސްމިއްޔާތެއް ގޮތަށް ކަމަށް ބުނެފައިވެ އެވެ.

މެސީ ބައްޕަގެ ޖަނާޒާގައި ބައިވެރިވަނިކޮށް ސިއްރުން ނަގާފައިވާ ފޮޓޯއެއް --

އެހެންވެ ޖަނާޒާގެ ކަންކަން ނިމުމުން އާއިލާގެ ފަރާތުން ވަނީ އެ އެދުމާއި ދެކޮޅަށް މަސައްކަތް ކުރި މީހުންނަށް ގާނޫނީ ފިޔަވަޅު އަޅާނެ ކަމަށް ބުނެ ބަޔާނެއް ނެރެފައި އެވެ. އަދި ފޮޓޯ އާންމު ކުރި މީޑިއާތައް ދެނެގަނެ އެ ފަރާތްތަކާއި ދެކޮޅަށް ކޯޓަށް މައްސަލަ ހުށަހެޅުމުގެ މަސައްކަތް ކުރަމުންދާ ކަމަށް ބުންޏެވެ.

މެސީގެ ބައްޕަގެ ޖަނާޒާ އޮތީ އިއްޔެ ހެނދުނު މެސީގެ އުފަން ރަށް އާޖެންޓީނާގެ ރޮސާރިއޯގައި އެވެ.