ކޮލަމްބިއާގެ ހުޅަނގު ސަރަޙައްދަށް ހޯމަ ދުވަހު އައި ވަރުގަދަ ބިންހެލުމެއްގައި މަދުވެގެން 20 މީހުން މަރުވެ ގިނަ ޢިމާރާތްތަކަށް ބޮޑެތި ގެއްލުންތައް ލިބިއްޖެއެވެ.

ރިކްޓާ މިންގަނޑުން 7.4 ގެ ބާރުމިނުގައި އައި މި ބިންހެލުން އައީ އެގައުމުގެ ވެރިރަށް ބޮގޮޓާއާ 400 ކިލޯމީޓަރު (250 މޭލު) ހުޅަނގުން ޗޮކޯ ސަރަޙައްދަށެވެ. 

Advertisement

މި ބިން ހެލުމުގައި ކޮލަމްބިއާގެ ޕެރެއީރާ ސިޓީން 18 މީހުން މަރުވެފައިވާއިރު މެނިޒާލެސް ސިޓީން ދެ މީހުން މަރުވެފައިވާ ކަމަށް ރިޕޯޓުތައް ބުނެއެވެ. ކޮލަމްބިއާގެ ހުޅަނގު ދެކުނުގައި އޮންނަ ކާލީ ސިޓީގައި މަދުވެގެން 25 ޢިމާރާތެއް ބިމާ ހަމަވެ އެކަކު މަރުވެފައިވެ އެވެ.

ބޮގޮޓާގައި ބިންހެލުމާ އެކު ވެހިކަލްތަކާއި ޢިމާރާތްތަކުގެ އެލާމްތައް އެޅެން ފެށުމުން މީހުން މަގުތައް މައްޗަށް ނުކުތުމުން މާބޮޑު ގެއްލުމެއް ލިބިފައިނުވާކަމަށްވެ އެވެ. މެދެޔީން ސިޓީގައި އެޕާޓްމެންޓު ޢިމާރާތްތަކުން ސައިރެން އެޅި މީހުން ނިދާ ހެދުމުގައި ގެތަކުން ނުކުތްކަމަށް ރިޕޯޓުތައް ބުނެ އެވެ.

މި ބިންހެލުން އައިސްފައި ވަނީ ޖޫން މަސް ތެރޭ ވެނެޒުއެލާއަށް ރިކްޓާ މިންގަނޑުން 7.2 އާއި 7.5 ބާރުމިނުގެ ދެ ބިންހެލުމެއް އައިސް 6,000 އަށް ވުރެ ގިނަ މީހުން މަރުވެފައިވަނިކޮށެވެ. އެގައުމުގައި މަރުވި މީހުންނާއި ހާލުގައި ޖެހުނު މީހުންގެ އަދަދުވެސް ލައްކައަކަށްވުރެ ގިނަ އެވެ.